​UN៖ ស្នងការ​ជាន់ខ្ពស់​អង្គការសហប្រជាជាតិ​ទទួលបន្ទុក​សិទ្ធិមនុស្ស​លោកស្រី Michelle Bachelet បាន​និយាយ​កាលពី​ថ្ងៃ​ពុធ​ថា លោកស្រី​មិន​ត្រូវ​បាន​ផ្តល់​ឱកាស​ឱ្យ​និយាយ​ ជាមួយ​ជនជាតិ​អ៊ុយ​ហ្គ័​រដែលកំពុង​ជាប់ឃុំ ឬ​ក្រុម​គ្រួសារ​របស់​ពួកគេ​ ក្នុងអំឡុងពេល​ដំណើរ​ទស្សនកិច្ច​របស់​លោកស្រី​ ទៅ​កាន់​ប្រទេស​ចិន​កាលពី​ខែ​មុន​នោះ​ទេ​។

លោកស្រី Bachelet និយាយថា លោកស្រី​ត្រូវ​បាន​ចូលរួម​ដោយ​មន្ត្រី​រដ្ឋាភិបាល​ចិន ​ក្នុងអំឡុងពេល​ដំណើរ​ទស្សនកិច្ច​ទៅកាន់​ក្នុង​តំបន់ Xinjiang ជា​កន្លែង​ដែល​ប្រទេស​ចិន​បាន​ធ្វើការ​បង្ក្រាប​យ៉ាង​ឃោរឃៅ​ លើ​ជនជាតិ​អ៊ុយ​ហ្គ័​រមាន​ជនជាតិភាគតិច​មូស្លីម​រស់នៅ​ភាគច្រើន​។​ ថ្លែង​ទៅកាន់​ក្រុម​ប្រឹក្សា​សិទ្ធិមនុស្ស​អង្គការសហប្រជាជាតិ​នៅ​ទីក្រុង​ហ្សឺ​ណែវ ស្នងការ​ជាន់ខ្ពស់​រូប​នេះ​បាន​និយាយ​ថា ដំណើរ​ទស្សនកិច្ច​នេះ​មិន​មែន​ជា​បេសកកម្ម​ស៊ើបអង្កេត​នោះ​ទេ ប៉ុន្តែ​ជា​ឱកាសមួយ​ដើម្បី​ជំរុញ​ការ​គោរព​សិទ្ធិមនុស្ស​។​ លោកស្រី Bachelet និយាយ​ថា លោកស្រី​ត្រូវបាន​ផ្តល់ឱកាស​ឱ្យ​និយាយ​ជាមួយ​តំណាង​ស្ថាប័ន​សំខាន់ៗ និង​អង្គការ​ស៊ីវិល​នៅ​ក្រៅ​តំបន់ Xinjiang ដោយ​គ្មាន​វត្តមាន​មន្ត្រី​សាធារណៈ​។​

​នៅមុន​ដំណើរ​ទស្សនកិច្ច​នេះ លោកស្រី​បាន​និយាយ​ទៅកាន់​អតីត​អ្នក​ជាប់ឃុំ​ជនជាតិ​អ៊ុយ​ហ្គ័​រ និង​គ្រួសារ​ដែល​បាន​បាត់បង់​ទំនាក់ទំនង​ជាមួយ​មនុស្ស​ជាទី​ស្រលាញ់​របស់​ពួកគេ​។​ ចិន​បាន​បដិសេធ​យ៉ាង​ដាច់អហង្ការ​ ចំពោះ​ការចោទប្រកាន់​ពី​ការរំលោភ​សិទ្ធិមនុស្ស​នៅ​តំបន់ Xinjiang។ កាលពី​ថ្ងៃ​ចន្ទ​លោកស្រី Bachelet បាន​និយាយថា លោកស្រី​នឹង​មិន​ស្វែងរក​អាណត្តិ​ថ្មី​រយៈពេល 4ឆ្នាំ​ទៀត​នោះ​ទេ ដោយ​លើកឡើង​ពី​បំណង​ប្រាថ្នា​ចង់​វិល​ត្រលប់​ទៅកាន់​ប្រទេស​ឈី​លី​ ប្រទេស​កំណើត​របស់​លោក​ស្រី​វិញ​។ អគ្គលេខាធិការ​អង្គការសហប្រជាជាតិលោក Antonio Guterres បាន​បង្ហាញ​ការ​គាំទ្រ​ចំពោះ​លោកស្រី Bachelet បន្ទាប់ពី​សហរដ្ឋអាមេរិក និង​ក្រុម​សិទ្ធិមនុស្ស​កំពូល​ៗ​មួយ​ចំនួន​ បាន​រិះគន់​ការ​ធ្វើ​ដំណើរ​ទៅកាន់​ប្រទេស​ចិន​រយៈពេល​ 6​ថ្ងៃ​របស់​លោកស្រី៕​

អត្ថបទ៖ ប៊ុនថន