កំពត-កែប៖ មន្ត្រីជលផលខេត្តកំពត-កែប បានណែនាំឱ្យប្រជានេសាទ ចូលរួមក្នុងកិច្ចការងារអភិរក្សអណ្តើកសមុទ្រឲ្យល្អបន្ថែមទៀត ដែលជាសត្វកម្រនៅលើពិភពលោក។

ក្នុងសិក្ខាសាលា ស្តីអំពីការអភិរក្សអណ្តើកសមុទ្រ នៅខេត្តកំពត កាលពីថ្ងៃទី១៥ ខែមិថុនា ម្សិលមិញ កញ្ញា ឡេង ផល្លា អ្នកជំនាញសមុទ្រ របស់អង្គការសម្ព័ន្ធសត្វព្រៃ និងធម្មជាតិ បានឱ្យដឹងថា អណ្តើកសមុទ្រជាសត្វកម្រ ហើយនៅលើពិភពលោក ដែលមាន៧ប្រភេទ ក្នុងនោះកម្ពុជា មានដល់៥ប្រភេទ ប៉ុន្តែមន្ត្រី និងអ្នកជំនាញនៅមិនទាន់សិក្សាដឹងនោះទេ អំពីចំនួន​ពិតប្រាកដ នៃប្រភេទអណ្តើកនីមួយៗ ។

នាយខណ្ឌរដ្ឋបាលជលផលខេត្តកំពត លោក ស សុរិន បានបញ្ជាក់ថា ការយល់ដឹងរបស់​ប្រជា​ពលរដ្ឋ​នៅមានកម្រិត ​កិច្ចចូលរួមសហការក៏មិនទាន់​បានល្អ គេនៅប្រទះឃើញមាន​ការ​លួចសម្លាប់ និងការ​ចរាចរ​សាច់​អណ្តើកកើត​មានឡើងនៅឡើយ។

អណ្តើកសមុទ្រ ជាសត្វកម្រ មានទម្ងន់ខ្លួនចាប់ពី៨​ ទៅ៧០គីឡូក្រាម ។ អណ្តើក បង្កកំណើត​នៅអាយុខុសៗគ្នាគឺ ចន្លោះពីអាយុ១២ ទៅ៥០ឆ្នាំ។ អណ្តើកសមុទ្រ ​ធ្វើដំណើររាប់ពាន់គីឡូម៉ែត្រ ដើម្បីបង្កាត់ពូជ​ និងធ្វើដំណើរទៅកាន់ទីកន្លែងបង្កាត់ពូជ។ ​វាចំណាយពេលចាប់ពីពីរ ទៅបួនឆ្នាំ ទើបធ្វើការបង្កាត់ពូជម្តងទៀត។ ​ហើយអាចបង្កាត់ពូជរហូតដល់វាមានអាយុ៨០ឆ្នាំ ។ អណ្តើកសមុទ្រពងបានពី១ ទៅ៨សំបុកក្នុងមួយរដូវកាល។ កូនអណ្តើកញាស់ភ្លាម ធ្វើការហែល​ដោយមិនស៊ីចំណីរយៈពេលបីថ្ងៃ កូនអណ្តើកស៊ីពួកផ្លង់តុង ពពុះទឹក និងពងត្រីជាអាហារ ។

កញ្ញា ឡេង ផល្លា អ្នកជំនាញសមុទ្រ របស់អង្គការសម្ព័ន្ធសត្វព្រៃ​ និងធម្មជាតិ បានបញ្ជាក់ថា ចាប់ពីឆ្នាំ២០១៧មក ក្រុមអ្នកជំនាញ ​បានធ្វើការងារជាច្រើនក្នុងការអភិរក្សអណ្តើកសមុទ្រ នៅ​ក្នុងនោះ បានកត់ត្រាអណ្តើកសមុទ្រចូលក្នុងនិន្នន័យកម្ពុជា​ចំនួន២០ក្បាល និងជួយ​សង្គ្រោះ​អណ្តើកសមុទ្រ៤១ក្បាល ​ចាប់ពីខែតុលាឆ្នាំ២០២១​ ដល់ខែឧសភា ឆ្នាំ២០២២៕ អត្ថបទ៖ អន សារឹម