​បាល់ទាត់៖ ​ភ្នាក់ងារ​របស់​កីឡាករ​បាល់ទាត់​ប្រេ​ស៊ី​ល Antony ត្រូវបាន​គេ​ដឹងថា បាន​ហោះហើរ​មកកាន់​ទឹកដី​អង់គ្លេស​កាលពីដើម​សប្តាហ៍​ដើម្បី​ចរចា​លើ​ការផ្ទេរ​មកកាន់ Manchester United​។ ​​ខ្សែប្រយុទ្ធ​វ័យក្មេង​រូបនេះត្រូវបាន​គេ​ដឹងថា ​មាន​ទំនាក់ទំនង​ផ្ទេរ​មកកាន់ Manchester United ដើម្បី​រួមរស់​ជាមួយ​អតីត​អ្នកចាត់ការ​របស់ខ្លួន​វិញ​គឺ​លោក Erik ten Hag ដែល​មកកាន់​តំណែង​នៅ Old Trafford​។

​​អាចនិយាយបាន Antony ជា​គោលដៅ​បន្ទាប់​ផងដែរ​សំរាប់ Manchester United បន្ទាប់​ពីក្លិប​មួយ​នេះ​បរាជ័យ​ក្នុងការនាំយក​ខ្សែប្រយុទ្ធ Benfica, Darwin Nunez ដែល​ត្រូវបាន​គេ​ដឹង​ឈានដល់​កិច្ចព្រមព្រៀង​ជាមួយ Liverpool​។​ ​​សូមបញ្ជាក់ថា Antony បាន​ក្លាយជា​សមាជិក​សំខាន់​របស់ Ajax ក្នុង​រយៈពេល ១៨ខែ​កន្លងមក​បន្ទាប់ពី​ផ្លាស់​ពី​ក្លិប​ប្រេ​ស៊ី​ល Sao Paulo ហើយ​ក្លិប​ប្រេ​ស៊ី​ល​មួយ​នេះ​ក៏​នឹង​ទទួលបាន​លាភសក្ការ​ផងដែរ ​ប្រសិន​ការផ្ទេរ​បានសំរេចដែលជា​ផ្នែក​មួយ​នៃ​កិច្ចសន្យា​កន្លងមក​។ ​​តម្លៃ​នៃ​ការផ្ទេរ​របស់​កីឡាករ​ប្រេ​ស៊ី​ល Antony ពី Ajax ត្រូវបាន​គេ​ដឹងថា​ក្នុង​រង្វង់​ពី ៥០ ទៅ ៦០លាន​អឺរ៉ូ​។ ​Manchester United បច្ចុប្បន្ន​ក៏​កំពុង​ចរចា​ទិញ​ខ្សែប្រយុទ្ធ Barcelona, Frankie de Jong ផងដែរ​៕

​អត្ថបទ​៖​នាង សុភា​វុ​ធ