ភ្នំពេញ៖ ពិព័រណ៍ការងារឆ្នាំនេះ នឹងរៀបចំឡើងរយៈពេល២ថ្ងៃ នៅថ្ងៃទី២៣-២៤ ខែមិថុនា ឆ្នាំ២០២២ ក្នុងបរិវេណអគារ KAMPUS ដែល​មាន​អាសយដ្ឋាន​ អគារ៥០២ មហាវិថីព្រះមុនីវង្ស ជិតស្ពានអាកាសក្បាលថ្នល់ ដោយនាំមកនូវឱកាសការងារប្រមាណ ៣២០០កន្លែង ពីក្រុមហ៊ុន​ធំៗជាច្រើន ដើម្បីផ្តល់ជូនយុវជន សិស្ស/និស្សិត និងអ្នកស្វែងរកការងារធ្វើ។

ពិព័រណ៍ការងារនេះ ត្រូវបានរៀបចំឡើងដោយ ទីភ្នាក់ងារជាតិមុខរបរ និងការងារ (NEA) នៃក្រសួងការងារ ​និងបណ្តុះបណ្តាលវិជ្ជាជីវៈ ​ដោយសហការជាមួយសហភាពសហព័ន្ធ យុវជនកម្ពុជា។

ពិព័រណ៍ការងារប្រចាំឆមាស ជាការព្រឹត្តិការណ៍ដ៏មានសារសំខាន់ក្នុងការជ្រើសរើសបុគ្គលិក និង​ស្វែងរកការងារតាមរយៈការប្រមូលផ្តុំ និងផ្សព្វផ្សាយឱកាសការងារពីសំណាក់និយោជក ក្រុមហ៊ុន​ឯកជន ដើម្បីជួបផ្ទាល់ជាមួយយុវជន​ សិស្ស/និស្សិត និងអ្នកស្វែងរកការងារ ​ដើម្បី​ដាក់​ពាក្យស្នើសុំ​ការងារ ជួប​សម្ភាសន៍​ផ្ទាល់ ​ព្រមទាំងទទួល ​បានការប្រឹក្សាយោបល់​អាជីព​ និងការងារ ក្នុងការ​ត្រៀម​ចូល ទីផ្សារការងារ ។

យុវជន និងអ្នកស្វែងរកការងារ ​អាចចាប់យក​ឱកាសការងារ ពីពិព័រណ៍នេះ​ឲ្យបានទាន់ពេល​វេលា​ដោយចូលរួមទស្សនា, ជួបសួរព័ត៌មានពីដែលកំពុងត្រូវការជ្រើសរើសបុគ្គលិក​ និងរៀបចំប្រវត្តិរូប​ឲ្យបានច្រើនដើម្បីត្រៀមដាក់ពាក្យស្នើសុំការងារពីក្រុមហ៊ុនធំៗជាច្រើន។

ដើម្បីទទួលព័ត៌មានបន្ថែម សូមទាក់ទងមជ្ឈមណ្ឌលការងារ រាជធានីភ្នំពេញ នៃទីភ្នាក់ងារជាតិ​មុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬគេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕ អត្ថបទ៖ ឌី ពៅយី