ភ្នំពេញ៖ នៅថ្ងៃទី១៨ ខែមិថុនាស្អែកនេះ គឺជាថ្ងៃដ៏បវរសួស្តី ពោរពេញដោយក្តី​សោមនស្ស​រីករាយ​នៃព្រះរាជពិធីបុណ្យចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខែ្មរ ក្នុងសេរីភាពសេចក្ដី​ថ្លៃថ្នូរ​ និងសុភមង្គល គម្រប់ព្រះជន្មាយុ៨៦ យាងចូល៨៧ព្រះវស្សារបស់ព្រះអង្គ ។

នៅថ្ងៃនេះដែរបណ្តាប្រជាពលរដ្ឋ និងមន្ត្រីរាជការ នាំគ្នាសូមព្រះបរមរាជានុញ្ញាត​សម្តែងនូវ​អំណរ​សាទរ​ឥតឧបមា​ចូលរួម​ថ្វាយព្រះសព្ទសាធុការពរជ័យ បវរសួស្តីសិរីមង្គល វិបុលសុខ មហាប្រសើរដោយក្តីស្មោះស្ម័គ្របំផុតចំពោះ ​សម្តេចព្រះវររាជមាតាជាតិខ្មែរ ដែល​ព្រះអង្គបាន​លះបង់ព្រះកាយពល ក្នុងព្រះរាជសកម្មភាពដ៏​ឧត្ដុង្គឧត្តម ដើម្បីបុព្វហេតុជាតិមាតុភូមិ​អង្គរ​ជាទីស្នេហា ​និងប្រជារាស្ត្រជាកូនចៅ ចៅទួតរបស់ព្រះអង្គ ជាពិសេសក្នុងវិស័យមនុស្សធម៌ អប់រំសង្គមកិច្ច ​និង​សុខុមាលភាព​ទូទៅ ។

នាឱកាសបវរមហាប្រសើរនេះទៀត (ទូលព្រះបង្គុំ ក៏ដូច)បណ្តាពលរដ្ឋដែលជាកូនជាចៅ ចៅទួត ក៏សូមលើកហត្ថបួងសួងដល់គុណបុណ្យព្រះរតនត្រ័យកែវទាំងបី និងវត្ថុ​ស័ក្ដិសិទ្ធិ​ទាំងឡាយ​ក្នុងលោក មានព្រះបារមីទេវតាថែរក្សាព្រះ​មហា​ស្វេតច្ឆត្រ បុណ្យបារមីនៃដួងព្រះវិញ្ញាណក្ខន្ធ​អតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ ជាពិសេសបុណ្យ​បារមីដួង​ព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ សូមព្រះអង្គមេត្តាតាមជួយបីបាច់ថែរក្សាប្រោះព្រំ នូវព្រះសព្ទសាធុការពរជ័យគ្រប់ប្រការថ្វាយចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ សូមព្រះអង្គទ្រង់ប្រកប​ ដោយព្រះរាជសុខភាពល្អបរិបូរណ៍​ ព្រះបញ្ញាញាណភ្លឺថ្លាឈ្លាសវៃ ព្រះកាយពលរឹងមាំ​ ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ដល់ប្រជារាស្ត្រខ្មែរគ្រប់ៗរូបជានិច្ចនិរន្តតរៀងទៅ ៕ អត្ថបទ ស៊ុម សុខជា