កំពង់ចាម៖ នាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគម​អតីតយុទ្ធជនកម្ពុជា បានបញ្ជាក់ថា រាជរដ្ឋាភិបាលកម្ពុជា គឺមិនភ្លេចគុណ និងបោះបង់អតីតយុទ្ធជនចោលឡើយ ទោះបីនៅកាលៈទេសៈណាក៏ដោយ។

នាយឧត្តមសេនីយ៍ គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ សមាគមអតីតយុទ្ធ ជនកម្ពុជា និងជាតំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ​កម្ពុជា និងជាប្រធានសមាគមអតីតយុទ្ធជនកម្ពុជា ក្នុងពិធីខួបលើកទី១៥ នៃទិវាអតីតយុទ្ធជនកម្ពុជា ២១ ខែមិថុនា ២០២២ ដែលបានធ្វើឡើងនៅសាលាខេត្តកំពង់ចាម នាព្រឹកថ្ងៃទី១៧ ខែមិថុនា នេះ បានលើកឡើងបញ្ជាក់ថា ខណៈប្រទេសជាតិ ​បាននឹងកំពុងមានសុខសន្តិភាព និងមានការ​អភិវឌ្ឍ​រីកចម្រើន គុណបំណាច់របស់អតីតយុទ្ធជន ​គឺមិនត្រូវបានបោះបង់ចោលនោះទេ ពោល​គឺមាន​ការយកចិត្តទុកដាក់ខ្ពស់ បំផុតពីរាជរដ្ឋាភិបាល ឲ្យសក្តិសមទៅនឹងអ្វីដែលអតីតយុទ្ធជន​បាន​លះបង់ទាំង​កម្លាំង​កាយចិត្តក្នុងការ ការពារបូរណភាពទឹកដី ​និងប្រជាជនកម្ពុជា។

បច្ចុប្បន្ននេះ សម្តេចតេជោ ហ៊ុន សែន តែងតែលើកស្ទួយជីវភាពអតីតយុទ្ធជនជានិច្ច ជាក់ស្តែងគឺ ការសាងសង់​លំនៅឋាន​ជូនអតីតយុទ្ធជនឱ្យរស់នៅសមរម្យផផងដែរ។

នាយឧត្ដមសេនីយ៍ ​បានជំរុញលើកទឹកចិត្តសមាជិកសមាជិកា ​ដែលជាអតីតយុទ្ធជនទាំងអស់ ចូល​រួមគាំទ្រ​រាជរដ្ឋាភិបាលកម្ពុជាបន្តទៀត ដោយបច្ចុប្បន្ននេះ ​រាជរដ្ឋាភិបាលកម្ពុជា ក្រោមការដឹកនាំ​របស់សម្តេចតេជោ ហ៊ុន សែន ​បានគិតគូរសុខទុក្ខអតីតយុទ្ធជនគ្រប់ពេលវេលា ពោលគឺក្នុង​កាលៈទេសៈកូវីដ-១៩នេះ ​សម្តេចតេជោ​ បានខិតខំប្រឹងប្រែងស្វះស្វែងរកវ៉ាក់សាំងមកចាក់បង្ការ​ជំងឺកូវីដ-១៩ជូនអតីតយុទ្ធជនក្នុងជួរមុខទៀតផង។

នាយឧត្តមសេនីយ៍ ​គន់ គីម ​បានអំពាវនាវឲ្យក្រុមគ្រួសារអតីតយុទ្ធជនទាំងអស់ ​បន្តចូលរួមទទួល វ៉ាក់សាំង​បង្ការជំងឺកូវីដ-១៩ទាំងដូសទី១ ដូសទី២ និងដូសជំរុញបន្ថែមទៀត៕

អត្ថបទ៖ ថុង សីហា