ចិន៖ អ្នកនាំពាក្យក្រសួងការបរទេសចិនលោក Wang Wenbin បាននិយាយកាលពីថ្ងៃព្រហស្បតិ៍ថា ក្រុងប៉េកាំងមិនដូចសហរដ្ឋអាមេរិកទេ ផ្ទុយទៅវិញប្រទេសចិនកំពុងស្វែងរកសន្តិភាពនៅក្នុងប្រទេសអ៊ុយក្រែន ហើយវាអាស្រ័យទៅលើមនុស្សដែលសម្រេចថា តើនរណាជាអ្នកស្ថិតនៅខាងភាគីត្រឹមត្រូវនៃប្រវត្តិសាស្ត្រ ជាការឆ្លើយតបទៅនឹងការរិះគន់របស់ក្រុង Washington ចំពោះជំហររបស់ចិនក្នុងជម្លោះនេះ។
សហរដ្ឋអាមេរិកបានរិះគន់ខ្លាំងៗលើប្រទេសចិន ដែលពុំបានថ្កោលទោសការវាយប្រហាររបស់រុស្ស៊ីនៅក្នុងប្រទេសអ៊ុយក្រែន ព្រមទាំងកិច្ចសហប្រតិបត្តិការរបស់ខ្លួនជាមួយក្រុង Moscow។ កាលពីថ្ងៃពុធ អ្នកនាំពាក្យក្រសួងការបរទេសអាមេរិកបានចោទក្រុងប៉េកាំងពីបទឈរនៅខាងរុស្ស៊ី ជួយបន្ទរការឃោសនារបស់ខ្លួន មិនទទួលស្គាល់អំពើឃោរឃៅរបស់រុស្ស៊ីនៅអ៊ុយក្រែន មុនពេលនិយាយថា ប្រទេសណាដែលឈរនៅខាងលោក Vladimir Putin នឹងរកឃើញខ្លួនឯងឈរនៅលើភាគីខុសនៃប្រវត្តិសាស្ត្រដោយជៀសមិនរួច។
លោក Wang Wenbin បាននិយាយថា ចំពោះបញ្ហាអ៊ុយក្រែន ចិនតែងតែវាយតម្លៃដោយឯករាជ្យលើស្ថានភាពជាមូលដ្ឋាននៃបរិបទប្រវត្តិសាស្ត្រ និងស្ថានភាពពិតនៃបញ្ហា។ យើងតែងតែឈរនៅខាងសន្តិភាព និងយុត្តិធម៌។ ក្រសួងនេះនិយាយថា ខណៈដែលក្រុង Washington កំពុងដុតបញ្ឆេះឲ្យមានជម្លោះឆាបឆេះកាន់តែខ្លាំងនៅក្នុងប្រទេសអ៊ុយក្រែន ក្រុងប៉េកាំងវិញកំពុងជំរុញឲ្យមានសន្តិភាព៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
