ភ្នំពេញ៖ ឯកឧត្តមសាស្ត្រាចារ្យ សេង ផល្លី អនុប្រធានអចិន្ត្រៃយ៍ក្រុមប្រឹក្សាយុវជនគ្រឹះស្ថានឧត្ដមសិក្សា នៃសហភាពសហព័ន្ធយុវជនកម្ពុជា (សសយក) បានជំរុញទៅយុវជន ត្រូវថែរក្សាសុខភាពឲ្យបានល្អ និងខិតខំរៀនសូត្រ ដើម្បីមាន សុខភាពមាំមួន និងក្លាយជាទំពាំងស្នងឫស្សីដ៏មានសក្ដានុពល សម្រាប់ប្រទេសជាតិ ។

ក្នុងសិក្ខាសាលាស្តីពីសុខភាពយុវជន និងសុខភាពកម្ពុជា នៅសាកលវិទ្យាល័យអន្តរជាតិ នាថ្ងៃទី១៧ ខែមិថុនា ឆ្នាំ២០២២ ឯកឧត្តម សេង ផល្លី មានប្រសាសន៍ថា មានសុខភាពល្អ គឺមានអ្វីៗទាំងអស់ ដោយអាចសម្រេចបានជោគជ័យ ​ទៅតាមបំណងប្រាថ្នាដែលចង់បាន ព្រោះការ​មានសុខភាពល្អនេះ ការរៀនសូត្រ ឬការប្រកបការងារផ្សេងៗគឺមានអារម្មណ៍ល្អ ។

ឯកឧត្តម បានបន្តថា សុខភាពគឺសំខាន់ជាងអ្វីទាំងអស់​ ទោះបីមានទ្រព្យសម្បត្តិសម្បូរហូរហៀរ បុណ្យ​សក្តិខ្ពង់ខ្ពស់ ការងារល្អៗ ប៉ុន្តែបើមានសុខភាពមិនល្អ ​ឈឺទ្រុឌទ្រោម នឹងបាត់បង់​អ្វីៗទាំងអស់ ស្របនឹងសុភាសិតសកលពោលថា ​«សុខភាពគឺជាមាសប្រាក់ និងសុភមង្គល» «មានសុខភាពល្អជាមុនសិន ទើបអាចមានអ្វីៗតាមក្រោយ» យើងទាំងអស់គ្នាពិតជាទទួលស្គាល់ថា សុខភាពពិតជាមានសារៈសំខាន់ណាស់សម្រាប់មនុស្ស និងសម្រាប់សង្គមជាតិទាំងមូល ។

ឯកឧត្តម សេង ផល្លី បានបន្ថែមថា យុវជនដែលជាទំពាំងស្នងឫស្សី​ សម្រាប់គ្រួសារ និងប្រទេស​ជាតិ ត្រូវថែរក្សាសុខភាពឲ្យបានល្អ មានទាំងការបរិភោគអាហារដែលផ្ដល់នូវសុខភាព ការហាត់​ប្រាណ ព្រោះនៅពេលយើងមានសុខភាពល្អ នឹងធ្វើឲ្យគ្រួសារមានសុភមង្គល និងការធ្វើអ្វីៗក៏ល្អ​ប្រសើរផងដែរ ។

ជាមួយនេះ ឯកឧត្តមអនុប្រធានអចិន្ត្រៃយ៍ក្រុមប្រឹក្សាយុវជនគ្រឹះស្ថានឧត្ដមសិក្សា ​បាន​សម្ដែង​នូវការ​គាំទ្រចំពោះការរៀបចំនូវសិក្ខាសាលានេះ​ ពិតជាមានសារៈសំខាន់និងផ្តល់អត្ថប្រយោជន៍​យ៉ាងច្រើន​ដល់អ្នកចូលរួម ​និងមនុស្សទូទៅ ។

បើតាមសាស្ត្រាចារ្យមហាបរិញ្ញាបណ្ឌិត សាបូ អូហ្សាណូ សាកលវិទ្យាធិការ សាកលវិទ្យាល័យ​អន្តរជាតិ បានឲ្យដឹងថា ការរៀបចំឱ្យមានអង្គសិក្ខាសាលានេះឡើង ក្នុងគោលបំណងផ្តល់​ចំណេះ​ដឹង បទពិសោធថ្មីៗបន្ថែមទៀត ទាក់ទងទៅនឹងសុខភាពរបស់យុវជន ​និងសុខភាពសាធារណៈ ៕ អត្ថបទ៖ បាន សុខរិទ្ធិ