មណ្ឌលគិរី៖ ឯកឧត្តម ថង សាវុន អភិបាលខេត្តមណ្ឌលគិរី អមដំណើរដោយកងកម្លាំងមន្ទីរអង្គភាពពាក់ព័ន្ធ និងអាជ្ញាធរស្រុក បានអញ្ជើញចុះចែកពូជស្រូវដល់ប្រជាកសិករចំនួន ១០០គ្រួសារ រស់នៅភូមិស្រែធំ ឃុំសុខសាន្ត ស្រុកកោះញែក នាថ្ងៃទី១៦ មិថុនា ២០២២។

ឯកឧត្តម ថង សាវុន អភិបាលខេត្តមណ្ឌលគិរី មានប្រសាសន៍ថា ពូជស្រូវផ្ការំដួល ដែលបានចែក​ជូន​បងប្អូននាពេលនេះ ជាពូជល្អ បាយឆ្ងាញ់ លក់បានតម្លៃខ្ពស់ក្នុងទីផ្សារ ដូច្នេះប្រជាពលរដ្ឋ​ដែល​ទទួលបានពូជស្រូវនេះ ត្រូវយកទៅបង្កបង្កើនផល និងរក្សាទុកពូជសម្រាប់ឆ្នាំក្រោយៗទៀត។

ឯកឧត្ដម បានបញ្ជាក់ថា​ ការបង្ករបង្កើនផលស្រូវរបស់ប្រជាកសិករនាពេលបច្ចុប្បន្ន មានភាព​ងាយស្រួល​ជាងសម័យមុន​ ដោយសារកសិករបានប្រើប្រាស់​ឧបករណ៍​ភ្ជួររាល់​ប្រភេទគ្រឿងចក្រ។

ឯកឧត្តម អភិបាលខេត្ត បាន​ផ្ដាំផ្ញើដល់ប្រជាពលរដ្ឋទាំងអស់ ​ត្រូវរស់នៅស្អាត​ ហូបស្អាត មាន​អនាម័យ ដើម្បីចៀសវាងជំងឺឆ្លងផ្សេងៗ ​នាំឱ្យខាតបង់ថវិកា និងពេលវេលា។

លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ​បានឱ្យដឹងថា ជា​រៀងរាល់ឆ្នាំ មន្ទីរតែងតែចែកពូជស្រូវល្អៗ​ ជូនដល់ប្រជាកសិករនៅទូទាំងខេត្ត។

លោក បានបញ្ជាក់ថា គិតចាប់ពីដើមរដូវវស្សាមកត្រឹមពាក់កណ្តាលខែមិថុនានេះ ល្បឿនការងារ​បង្កបង្កើន​ផលស្រូវរដូវវស្សា ផ្ទៃដីភ្ជួររាស់សរុបចំនួនជាង ១៥០០០ហិកតា។ ស្រូវ អនុវត្តបាន​ចំនួន ៩៤៥៩ហិកតា នៃផែនការឆ្នាំ កើនលើសឆ្នាំមុនចំនួនជាង ៩០០ហិកតា។

ស្រែចម្ការអនុវត្តបានចំនួនជាង១០០០ហិកតា ស្រូវស្រាលពង្រោះ អនុវត្តបានចំនួនជាង៣០០០ហិកតា។ ស្រូវកណ្ដាលពង្រោះ អនុវត្តបានចំនួនជាង៤០០០ហិកតា។ ស្រូវធ្ងន់ពង្រោះ អនុវត្តបាន ១០០០ហិកតា។

លោក បានបន្ថែមថា ផលស្រូវសរុបទូទាំងខេត្ត កាលពីឆ្នាំ២០២១ ​មានចំនួន៨៦ពាន់តោន។ បរិមាណផលស្រូវសរុបសម្រាប់នាំចេញ ​ជាង ៥២ពាន់តោន ក្នុងនោះ​បាននាំចេញស្រូវសេរីរាង្គ​ទៅអឺរ៉ុបចំនួនជាង ៤០០០តោន៕អត្ថបទ៖ អ៊ិត ភីរុណ