អ៊ុយក្រែន៖ នាយករដ្ឋមន្ត្រីអង់គ្លេសលោក Boris Johnson បាននិយាយកាលពីថ្ងៃសុក្រក្នុងអំឡុងដំណើរទស្សនកិច្ចដ៏គួរឱ្យភ្ញាក់ផ្អើលរបស់លោកទៅកាន់ទីក្រុង Kyiv ថា ភស្តុតាងទាំងអស់បញ្ជាក់ថា កងកម្លាំងរុស្ស៊ីបានបង្កការស្លាប់ និងរងរបួសយ៉ាងធ្ងន់ធ្ងរនៅក្នុងប្រតិបត្តិការដែលនៅតែបន្តរបស់ពួកគេនៅអ៊ុយក្រែន។
ក្នុងសន្និសីទសារព័ត៌មានរួមគ្នាជាមួយប្រធានាធិបតីអ៊ុយក្រែនលោក Volodymyr Zelenskyy លោក Johnson បានសន្យាបន្តផ្តល់ជំនួយយោធា និងការបណ្តុះបណ្តាលលើយុទ្ធោបករណ៍ថ្មីៗ។ ទោះបីជាលោកមិនបានថ្លែងលម្អិតអំពីជំនួយនេះក៏ដោយ ប៉ុន្តែលោកបាននិយាយថា ចក្រភពអង់គ្លេសនឹងដឹកនាំកម្មវិធីដែលអាចបណ្តុះបណ្តាលទាហានអ៊ុយក្រែនរហូតដល់ 10,000នាក់រៀងរាល់ 120ថ្ងៃនៅក្នុងទីតាំងដែលមិនបានបញ្ជាក់នៅខាងក្រៅប្រទេសអ៊ុយក្រែន។ លោក Johnson បានបន្តសន្យាថា រដ្ឋាភិបាលរបស់លោកនឹងធ្វើការ ដើម្បីពង្រឹងការដាក់ទណ្ឌកម្មលើប្រទេសរុស្ស៊ី និងដើម្បីនាំចេញគ្រាប់ធញ្ញជាតិដែលកំពុងត្រូវបានរារាំងក្នុងសង្គ្រាមរបស់រុស្ស៊ី។
ដំណើរទស្សនកិច្ចដ៏គួរឱ្យភ្ញាក់ផ្អើលរបស់លោក Johnson បានធ្វើឡើងមួយថ្ងៃបន្ទាប់ពីមេដឹកនាំប្រទេសបារាំង អ៊ីតាលី អាល្លឺម៉ង់ និងរ៉ូម៉ានីបានជួបលោក Zelenskyy និងបានស្ទង់មើលលើការបំផ្លាញដែលបង្កឡើងដោយរុស្ស៊ី។ មេដឹកនាំអ៊ុយក្រែនបាននិយាយថា រុស្ស៊ីត្រូវតែសងថ្លៃខាតបង់ខ្ពស់បំផុតសម្រាប់សង្គ្រាមនៅអ៊ុយក្រែន និងទូទាត់សងសម្រាប់ការខាតបង់សេដ្ឋកិច្ចរបស់ប្រទេសនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
