កំពង់ឆ្នាំង៖ ស្រ្តីមេម៉ាយទីទ័លក្រ ឈ្មោះ អ៊ុល ចិន្តា និង​កូនស្រី រស់នៅភូមិព្រៃមាន់ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ដែលបាន​ជួប​ឧប្បទ្ទវហេតុ​ភ្លើង​ឆេះ​ផ្ទះ​គ្មាន​សល់ កាល​ពី​យប់​ថ្ងៃ​ទី១៣ ខែមិថុនា ឆ្នាំ២០២២ ដោយឆ្លងចរន្តអគ្គិសនី បានទទួលថវិកា និងគ្រឿងឧបភោគបរិភោគ​មួយ​ចំនួន​ទៀត​ ជា​អំណោយ​របស់​ឯក​ឧត្តម​បណ្ឌិត​សភាចារ្យ អ៊ុក រ៉ាប៊ុន រដ្ឋមន្រ្តី​ក្រសួង​​អភិវឌ្ឍន៍​ជនបទ និងជាប្រធានក្រុមការងារថ្នាក់កណ្ដាល​ចុះមូលដ្ឋានស្រុករលាប្អៀរ។

 នៅព្រឹកថ្ងៃទី១៨ ខែមិថុនា ឆ្នាំ២០២២ ឯកឧត្តម គឹម វាសនា អគ្គាធិការ នៃ​អគ្គាធិការដ្ឋាន​ក្រសួង​អភិវឌ្ឍន៍ជនបទ តំណាងឯក​ឧត្តម​បណ្ឌិត​សភាចារ្យ អ៊ុក រ៉ាប៊ុន រួមនឹងលោក សោម វឺន ប្រធានគណបក្សស្រុក, លោក សេង វិចិត្រ អភិបាលស្តីទីស្រុករលាប្អៀរ និងអាជ្ញាធរ ភូមិ-ឃុំ ផងដែរ បានអញ្ជើញចុះសួរសុខទុក្ខ និងសម្តែងនូវការ​សោកស្តាយ​ចំពោះ​ស្រ្តីមេម៉ាយទីទ័លក្រ ដែល​បាត់បង់​ផ្ទះ​​ដោយឧប្បទ្ទវហេតុភ្លើងឆេះនេះ។

 ក្នុងឱកាសនេះ ឯកឧត្ដម និងក្រុមការងារ បាននាំយកគ្រឿងឧបភោគបរិភោគ និងថវិកា ឯកឧត្តម បណ្ឌិតសភាចារ្យ ផ្តល់ជូនដល់ដៃស្ត្រីរងគ្រោះ និងបានឲ្យ​អាជ្ញាធរ​មូលដ្ឋាន​ជួយ​ចាត់ចែ​ង​សាង​សង់​ទី​ជម្រកជូនស្ត្រីមេម៉ាយ និងកូនស្រីបានរស់នៅនៅវិញផងដែរ៕ អត្ថបទ៖ ហុង វាស្នា