ភ្នំពេញ៖ នាយឧត្តមសេនីយ៍ គន់ គីម អនុប្រធាន និងអគ្គលេខាសមាគមអតីតយុទ្ធជនកម្ពុជា បានថ្លែងថា គុណបំណាច់របស់អតីតយុទ្ធជន មិនត្រូវបានបោះបង់ចោលនោះទេ គឺកំពុងមានការយកចិត្តទុកដាក់ខ្ពស់បំផុត ពីរាជរដ្ឋាភិបាល តាមរយៈការផ្ដល់នូវប្រាក់បៀវត្ស ប្រាប់ឧបត្ថម្ភ ការផ្ដល់នូវដីធ្លី និងសាងសង់ផ្ទះ ចំពោះអតីតយុទ្ធជនក្រីក្រនៅទូទាំងប្រទេស។

ក្នុងពិធីរំលឹកខួបលើកទី១៥ នៃទិវាសមាគមអតីតយុទ្ធជនកម្ពុជា នៅថ្ងៃទី១៨ ខែមិថុនា ឆ្នាំ២០២២ នាយឧត្តមសេនីយ៍ គន់ គីម មានប្រសាសន៍ថា ដើម្បីគោរពនូវវីរភាព និងគុណបំណាច់ដ៏ធំធេង របស់​អតីត​យុទ្ធជន ចំពោះជាតិមាតុភូមិ និងប្រជាជនកម្ពុជា ទើបមានការប្រារព្ធទិវាអតីតយុទ្ធជន​កម្ពុជា ២១មិថុនា ជារៀងរាល់ឆ្នាំ ក្នុងគោលបំណងផ្សព្វផ្សាយឱ្យប្រជាជនទូទាំងប្រទេស បានយល់ដឹងកាន់តែទូលំទូលាយបន្ថែមទៀត អំពីអតីតយុទ្ធជន ។

ឯកឧត្តម បន្តថា ក្នុងរយៈពេល ១៥ឆ្នាំកន្លងទៅនេះ សម្ដេចតេជោ ហ៊ុន សែន ជាប្រធានសមាគម​អតីតយុទ្ធជនកម្ពុជា​ បានគិតគូរយ៉ាងខ្លាំង ​អំពីសុខទុក្ខរបស់អតីតយុទ្ធជនកម្ពុជា ​ហើយទន្ទឹមនេះ ថ្នាក់​ដឹកនាំគ្រប់លំដាប់ថ្នាក់ទៀត ​ក៏បានយកចិត្តទុកដាក់ថែរក្សា ​ដល់អតីតយុទ្ធជនផងដែរ ពិសេស​ទៅទៀតនោះ គឺការផ្តល់អទិភាពជូនសមាជិកសមាគមអតីតយុទ្ធជន ទទួលបាននូវការចាក់​វ៉ាក់សាំង​ការពារជំងឺកូវីដ១៩ បានគ្រប់ៗគ្នា ​ក្នុងរយៈកាលកន្លងទៅនេះ ។

ឯកឧត្តម គន់ គីម ក៏បានលើកយកចំណុចសំខាន់មួយចំនួន នៃសារលិខិតរបស់សម្ដេចតេជោ ដែល​មានខ្លឹមសារថា ក្នុងឱកាសខួបលើកទី១៥នេះ​ សម្ដេច​បានអំពាវនាវដល់បងប្អូនអតីតយុទ្ធជន សូម​បន្តរក្សាស្មារតី វីរភាពដ៏ឧត្តុង្គឧត្តម​ និងសេចក្តីថ្លៃថ្នូរ ​ជាប្រជាពលរដ្ឋល្អឆ្នើមរបស់ជាតិមាតុភូមិ ដើម្បី​បន្តធ្វើជាគំរូល្អក្នុងសង្គមជាតិ រាជរដ្ឋាភិបាល ​និងប្រជាជនកម្ពុជាទូទាំងប្រទេសពិតជាចងចាំជានិច្ច នូវកាលះបង់និងគុណបំណាច់ដ៏ធំធេងរបស់បងប្អូន​ អតីតយុទ្ធជនគ្រប់រូប​ ចំពោះជាតិមាតុភូមិ ។

ជាមួយនេះ ឯកឧត្តម​ក៏បានជំរុញឱ្យថ្នាក់ដឹកនាំសមាគមគ្រប់ថ្នាក់ត្រូវ​បន្តយកចិត្តទុកដាក់ដល់​អតីត​យុទ្ធជនដែលកំពុងរស់នៅតាមឃុំសង្កាត់ ​ដោយត្រូវបែងចែកភារកិច្ចគ្នាចុះជួបសំណេះសំណាល ផ្សារភ្ជាប់ទំនាក់ទំនង​ឱ្យកាន់តែជិតស្និទ្ធជាមួយបងប្អូនតាមគ្រួសារ ​តាមខ្នងផ្ទះនីមួយៗ ។

ឯកឧត្តមនាយឧត្តមសេនីយ៍ បាននាំនូវការសួរសុខទុក្ខ និងសេចក្តីនឹករឭក​ ពីសំណាក់សម្ដេចតេជោ ហ៊ុន សែន ដល់​លោកយាយ លោកតា បងប្អូន មីងមា ​និងសាច់ញាតិ​ទាំងអស់របស់អតីតយុទ្ធជន ដែល​សម្ដេចមានសេចក្តីនឹករឭកជាខ្លាំង​ និងសូមជូនពរឲ្យបងប្អូនអតីតយុទ្ធជនយើងទាំងអស់ មានសុខភាពល្អទាំងអស់គ្នា ៕ អត្ថបទ បាន សុខរិទ្ធិ