កាលពីថ្ងៃទី១៨ ខែមិថុនា ឆ្នាំ២០២២ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ជាប្រធាន បានចាត់ឱ្យឯកឧត្តម យូ ឡាណា អគ្គលេខាធិការ​រងទី២ កាក​បាទ​ក្រហម​កម្ពុជា ចុះសាកសួរសុខទុក្ខ និងនាំយកអំណោយមនុស្សធម៌ទៅចែកជូនដល់ចាស់ជរា ជន​ពិការ និងប្រជាពលរដ្ឋដែលមានជីវភាពខ្វះខាត ចំនួន២៧០គ្រួសារ រស់នៅភូមិ ចំនួន៧ ក្នុងឃុំឈូក ស្រុកក្រូចឆ្មា ខេត្តត្បូងឃ្មុំ ដែលពិធីចែកអំណោយប្រព្រឹត្តទៅ នៅចំនួន ២ទីតាំង ផ្សេងគ្នា ក្នុងនោះទីតាំងទីមួយធ្វើនៅវត្តសម្ដេចតេជោសែនប៊ុនរ៉ានី ហៅវត្តក្របីក្រៀក ចំនួន ១៤០​គ្រួសារ ក្នុងភូមិក្របៅក្រៀក និងទីតាំងទីពីរនៅវត្តឧប្បលវត្តី ហៅវត្តឈូក ចំនួន១៣០គ្រួសារ ក្នុងភូមិឈូក ។ 

នាឱកាសចុះសាកសួរសុខទុក្ខលោកតាលោកយាយ បងប្អូនប្រជាពលរដ្ឋទាំងពីរកន្លែងខាងលើ ឯកឧត្តម យូ ឡាណា បានពាំនាំ នូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចកិត្តិព្រឹទ្ធបណ្ឌិតប្រធាន តែងតែគិតគូរជាប់ជានិច្ច ចំពោះសុខទុក្ខប្រជាពលរដ្ឋ ជាពិសេស​ជន​រងគ្រោះ និងងាយរងគ្រោះគ្រប់ប្រភេទ ដោយមិនប្រកាន់ពីនិន្នាការនយោបាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោលទីណាមានការលំបាក ទីនោះ​មាន​កាក​បាទក្រហមកម្ពុជា។ ឯកឧត្តមអគ្គលេខាធិការរងទី២ក៏បានអំពាវនាវសូមឱ្យបងប្អូនប្រជាពលរដ្ឋកុំមានការធ្វេសប្រហែសត្រូវបន្តយកចិត្តទុកដាក់ថែរក្សាសុខភាព អនាម័យ ព្រមទាំង​សូមចូលរួម​ចាក់​វ៉ាក់សាំង​ការពារ​ជំងឺ​កូវីដ១៩ ឱ្យគ្រប់ៗគ្នា តាមការកំណត់របស់ក្រសួងសុខាភិបាល។ 

អំណោយមនុស្សធម៌ដែលបានផ្តល់ជូន ក្នុង១គ្រួសារៗទទួលបាន៖ អង្ករ២៥គីឡូក្រាម មី១កេស ទឹកស៊ីអ៊ីវ១យួរ ត្រីខ១យួរ ឃីត១កញ្ចប់(សារុង ក្រម៉ា មុង ភួយ) ជែលលាងដៃ១ដប និងថវិកាចំនួន២ម៉ឺនរៀល ។

ជាមួយគ្នានេះ ឯកឧត្តមអគ្គលេខាធិការរងទី២ ក៏បាននាំទេយ្យវត្ថុរបស់កាកបាទក្រហមកម្ពុជា ទៅប្រគេនព្រះសង្ឃគង់នៅវត្តចំនួន២ រួមមាន៖ វត្តសម្ដេចតេជោសែន ប៊ុន រ៉ានី ហៅវត្តក្របីក្រៀក ក្នុងភូមិក្របៅក្រៀក និងវត្តឧប្បលវត្តី ហៅវត្តឈូក ក្នុងភូមិឈូក ដោយក្នុងមួយវត្តនីមួយៗទទួលបាន៖ អង្ករ១០០គីឡូក្រាម មី៥កេស ត្រីខ៥យួរ ទឹកសុទ្ធ៥កេស និងបច្ច័យ១លានរៀលផងដែរ ដោយឡែក ព្រះចៅអធិការវត្ត១អង្គ បច្ច័យ២០ម៉ឺនរៀល និងព្រះសង្ឃ៤អង្គក្នុង១អង្គ១០ម៉ឺនរៀល៕