អូស្ត្រាលី៖ រដ្ឋវិចតូរៀ ដែលជារដ្ឋរងផលប៉ះពាល់ខ្លាំងបំផុតដោយសារជំងឺ COVID-19នៅប្រទេសអូស្ត្រាលី រាយការណ៍ករណីឆ្លងប្រចាំថ្ងៃជំងឺដ៏កាចសាហាវមួយនេះ ទាបបំផុត ចាប់តាំងពីខែមិថុនា ស្របពេលដែលវិធានការបិទរដ្ឋ ពន្យឺតការឆ្លង។
លោក ដានៀល អ៊ែនឌ្រូ គឺជាអភិបាលរដ្ឋវិចតូរៀ បាននិយាយនៅថ្ងៃអង្គារនេះថា ករណីឆ្លងថ្មី ៧០នាក់ និងករណីស្លាប់ថ្មី ៥នាក់ ត្រូវបានរាយការណ៍នៅក្នុងរដ្ឋរបស់លោក នារយៈពេល២៤ម៉ោងចុងក្រោយ។ ករណីស្លាប់ទាំង៥នាក់ ជាប់ពាក់ព័ន្ធនឹងករណីឆ្លងនៅក្នុងមណ្ឌលថែទាំមនុស្សចាស់ជរា។
វាគឺជាករណីឆ្លងជំងឺ COVID-19ទាបបំផុត ចាប់តាំងពីករណីឆ្លង ៦៧នាក់ ត្រូវបានរាយការណ៍ កាលពីថ្ងៃទី ៣០ ខែមិថុនា។
ដោយឡែក ករណីឆ្លងជាមធ្យមចុងក្រោយរយៈពេល១សប្តាហ៍ គឺ១០៤នាក់ក្នុង១ថ្ងៃ ពោល គឺធ្លាក់ចុះពីករណីឆ្លងប្រចាំថ្ងៃ ១៨៤នាក់ កាលពីរយៈពេល១សប្តាហ៍មុន។
ការបិទរដ្ឋរយៈពេល៦សប្តាហ៍ គ្រោងនឹងបញ្ចប់នៅថ្ងៃទី១៣ ខែកញ្ញាខាងមុខនេះ ហើយរដ្ឋាភិបាលអូស្ត្រាលី នឹងគូសបញ្ជាក់ពីផែនការរបស់ខ្លួនក្នុងការបើកសេដ្ឋកិច្ចឡើងវិញ នៅថ្ងៃអាទិត្យ សប្តាហ៍ក្រោយ។
ទោះបីជាយ៉ាងណាក៏ដោយ អត្រាឆ្លង មិនត្រូវបានគេរំពឹងថានឹងធ្លាក់ចុះទ្វេដងនោះទេ នៅថ្ងៃទី១៣ ខែកញ្ញា ខាងមុខនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
