ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសថា នឹងផ្ដល់ប្រាក់ឧបត្ថម្ភបន្ថែមទៀត ដល់ប្រជាពលរដ្ឋដែលរងផលប៉ះពាល់ ដោយសារបញ្ហាវិបត្តិនៃជំងឺកូវីដ-១៩ និងបញ្ហាអតិផរណា ។

ក្នុងឱកាសអញ្ជើញរំលឹកខួបទី៤៥ឆ្នាំ ទិវា​នៃការរចងចាំដំណើរឆ្ពោះទៅការផ្ដួលរំលំរបបប្រល័យ​ពូជ​សាសន៍ ប៉ុល ពត នៅថ្ងៃទី២០ ខែមិថុនា ឆ្នាំ២០២២ សម្ដេចតេជោនាយករដ្ឋមន្ត្រី មានប្រសាសន៍ថា កម្ពុជាធ្លាប់ជាប្រទេសកសាងសេដ្ឋកិច្ចដ៏លំបាក ក្លាយជាប្រទេសមួយ ដែលមានការអភិវឌ្ឍ ទៅ​ជា​ប្រទេស​មានប្រាក់ចំណូលមធ្យមកម្រិតទាប ​និងមាន​មហិច្ឆតា​ឆ្នាំ២០៣០ និងក្លាយទៅជាប្រទេស​ដែល​មានប្រាក់ចំណូលកម្រិតខ្ពស់ ​ហើយទម្លាក់អត្រានៃភាពក្រីក្រ ។

សម្ដេច បានបន្តថា កម្ពុជាបច្ចុប្បន្ន កំពុងប្រឹងប្រែងទប់ស្កាត់កុំឲ្យអត្រានៃភាពក្រីក្រ ធ្លាក់ដោយ​សារ​បញ្ហាជំងឺកូវីដ-១៩ ខណៈរាជរដ្ឋាភិបាល​បាន​ចិញ្ចឹម​ពលរដ្ឋ​ប្រមាណ​ជិត ៣លាននាក់​ប៉ះពាល់​ដោយ​ជំងឺដ៏កាច់សាហាវនេះ ​ហើយត្រៀមឧបត្ថម្ភពលរដ្ឋបន្ថែមទៀត ​រងការប៉ះពាល់ពីកត្តាជំងឺកូវីដ-១៩ និងកត្តាអតិផរណា ។

គួរបញ្ជាក់ថា ចាប់ពីខែមិថុនា ឆ្នាំ២០២០ ដល់ខែឧសភា ឆ្នាំ២០២២​ រាជរដ្ឋាភិបាលកម្ពុជា បានជួយ​ឧបត្ថម្ភប្រាក់ប្រចាំខែដល់ពលរដ្ឋក្រីក្រ រងផលប៉ះពាល់​ដោយសារបញ្ហាជំងឺកូវីដ-១៩ អស់​ទឹក​ប្រាក់ចំនួនជាង ៦៨០លានដុល្លារអាមេរិក ​ខណៈប្រាក់ឧបត្ថម្ភមួយ​ចំនួនទៀត បានផ្ដល់​សម្រាប់​គាំទ្រ​សុខភាពសង្គម ​មានស្ត្រីមានផ្ទៃពោះ ​និងជនពិការជាដើម ៕ អត្ថបទ បាន សុខរិទ្ធិ