ភ្នំពេញ៖ ឯកឧត្តម នរៈ រតនវឌ្ឍនោ តំណាងឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា បានលើកឡើងនៅចំពោះមុខសិស្សានុសិស្សចំនួន៣៥០នាក់ នៅវិទ្យាល័យព្រែកលៀប (សាលាជំនាន់ថ្មី) ថា ការសេពគ្រឿងញៀនគឺមានផលប៉ះពាល់ជាច្រើនដល់ខ្លួនយើងជាអ្នកសេពផង និងដល់សង្គមជាតិទាំងមូលផង។

ការថ្លែងរបស់ឯកឧត្តម នរៈ រតនវឌ្ឍនោ យ៉ាងដូច្នេះនាឱកាសអញ្ជើញចូលរួមបើកកម្មវិធីទស្សនាទានព្រះពុទ្ធសាសនា ប្រធានបទ«យុវជនត្រូវនៅឆ្ងាយពីគ្រឿងញៀន» ដើម្បីអប់រំសិស្សវិទ្យាល័យព្រែកលៀប (សាលាជំនាន់ថ្មី) នៅព្រឹកថ្ងៃទី២០ ខែមិថុនា ឆ្នាំ២០២២នេះ ។

ឯកឧត្តម បានថ្លែងទៀតថា កម្មវិធីទស្សនាទានព្រះពុទ្ធសាសនា ត្រូវបានប្រសូត្រចេញក្រោមគំនិត​ផ្តួចផ្តើម​ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជា​ណាចក្រ​កម្ពុជា ​និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រៀបចំដឹកនាំដោយនាយកដ្ឋាន​ស្រាវជ្រាវផ្សព្វផ្សាយពុទ្ធសាសនាផ្សារភ្ជាប់សង្គម ជាចលករដោយមានការសហការជាមួយ​ក្រសួង​អប់រំ យុវជន និងកីឡា​ និងអគ្គនាយកដ្ឋានវិទ្យុ​ ទូរទស្សន៍រដ្ឋ និងឯកជន ដែលរហូតមកដល់​ពេលនេះ​ បានរៀបចំកម្មវិធីទស្សនាទានព្រះពុទ្ធសាសនា ​បានចំនួន៤២លើករួចមកហើយ។

ឯកឧត្តម ​ ក៏បានថ្លែងការអរគុណចំពោះក្រុមការងារដែលពាក់ព័ន្ធទាំងអស់ ដែលសម្រឹតសម្រាំង​ប្រធាន​បទដ៏មាន​សារៈប្រយោជន៍ ​យកមកធ្វើការអប់រំសិស្សានុសិស្សនៅទីនេះ ​ឱ្យសិក្សាស្វែងយល់​ពីផល​ប៉ះពាល់​យ៉ាង​ធ្ងន់ធ្ងរ​ចំពោះអ្នកប្រើប្រាស់​គ្រឿងញៀន ​ពីព្រោះវាជាសារធាតុដ៏កាចសាហាវ​ដែលធ្វើ​ឱ្យប៉ះពាល់សុខភាពរបស់យើង។

សារធាតុគ្រឿងញៀន វាជាចលករ ​ក៏ដូចជាការជម្រុញឱ្យយុវជន និងយុវវ័យភ្លើតភ្លើនហ៊ានប្រព្រឹត្ត​អំពើអបាយមុខក្នុងសង្គមគ្រួសារ ​ហ៊ានប្រព្រឹត្តអំពើ​ហិង្សា ​បំផ្លាញ​ទ្រព្យសម្បត្តិក្នុងក្រុមគ្រួសារ ដែល​ធ្វើឱ្យបាត់បង់កិត្តិយសគ្រួសារក្នុងសង្គម។

ឯកឧត្តម នរៈ រតនវឌ្ឍនោ​ បានអំពាវនាវ​ដល់​សិស្សានុសិស្សទាំងអស់ ​ត្រូវចៀសឱ្យឆ្ងាយពីការ​ប្រើប្រាស់​គ្រឿងញៀន​ងាក​មករកការសិក្សា​និងការប្រតិបត្តិ​ព្រះធម៌វិន័យដែល​នឹងនាំយើង​ឆ្ពោះទៅ​រកភាពជោគជ័យលើជីវិត។

លោក ឆុំ សុភក្តិ នាយកវិទ្យាល័យព្រែកលៀប បាន​សម្តែង​មនោសញ្ចេតនា​រីករាយ​យ៉ាងក្រៃលែង​ដែល​ក្រុមការងារពាក់ព័ន្ធទាំងអស់សហការគ្នាយ៉ាងល្អ​ជាមួយសាលាចុះមកអប់រំ សិស្សានុសិស្ស​ទាំង៣៥០នាក់ ឱ្យយល់ដឹងពីផលប៉ះពាល់នៃការសេពគ្រឿងញៀន​ ជាពិសេសចំពោះព្រះភិក្ខុ វិមលោ ផល ចាន់ថេត ធ្វើការអប់រំតាមបែបពុទ្ធឱវាទដល់សិស្សានុសិស្សទាំង៣៥០នាក់ ដើម្បីឲ្យពួកគេក្លាយខ្លួនជាមនុស្សមានសីលធម៌ សុជីវធម៌ល្អ ក្នុងការរស់នៅក្នុងសង្គម តាម​រយៈធម៌ព្រះសម្មាសម្ពុទ្ធ គឺជាឱសថដ៏​សក្ដិសិទ្ធិ​ ក្នុងការ​អប់រំចិត្តឲ្យពួកគេមានសេចក្តីថ្លៃថ្នូរល្អ៕

អត្ថបទ រដ្ឋា