ភ្នំពេញ៖ ដើម្បីទប់ស្កាត់ការវាយការលុកពីជំងឺកូវីដ-១៩ និងមិនចង់ឲ្យប្រទេសកម្ពុជាបិទខ្ទប់ ព្រោះជំងឺកូវីដ-១៩ ដូចកាលពីឆ្នាំមុន ពលរដ្ឋនៅរាជធានីភ្នំពេញ នាថ្ងៃទី២០ ខែមិថុនានេះ បន្តទៅចាក់វ៉ាក់សាំងដូសជំរុញទី៥ តាមការកំណត់របស់គ្រូពេទ្យ។

ពលរដ្ឋរស់នៅរាជធានីភ្នំពេញ ដែលចូលចាក់វ៉ាក់សាំងក្នុងមន្ទីរពេទ្យកុមារជាតិ រាជធានីភ្នំពេញ បានប្រាប់BTVឲ្យដឹងថា ការស្ម័គ្រចិត្តមកចាក់វ៉ាក់សាំងដូសជំរុញទី៥នេះ គឺដើម្បីការពារកុំឲ្យឆ្លង​ជំងឺកូវីដ-១៩ និងមិនចង់ឲ្យប្រទេសកម្ពុជាបិទខ្ទប់ដូចកាលពីឆ្នាំមុន ​ព្រោះជំងឺកូវីដនោះទេ។ ពួកគេបញ្ជាក់ថា បើ ទោះបីចាក់វ៉ាក់សាំងដូសទី៥រួចក្តី ​ការអនុវត្តវិធានការរាជរដ្ឋាភិបាលនៅតែបន្ត ដើម្បីធានាសុវត្ថិការរស់នៅ ​នាពេលបច្ចុប្បន្ន។

លោកវេជ្ជបណ្ឌិត លាន គឹមស្រេង ប្រធានក្រុមការងារចាក់វ៉ាក់សាំងកូវីដ-១៩ នៅមន្ទីរពេទ្យកុមារ ជាតិ បានឱ្យដឹងដែរថា បច្ចុប្បន្ន ក្រុមអាទិភាព និងប្រជាពលរដ្ឋទូទៅ បានចូលចាក់វ៉ាក់សាំង​បង្ការជំងឺ កូវីដ-១៩ ចាប់ពីដូសមូលដ្ឋាន​ រហូតដល់ដូសជំរុញទី៥​ នៅមន្ទីរពេទ្យកុមារជាតិ ក្នុង​មួយ​ថ្ងៃមាន​ចំនួនពី ៤០០ ទៅឆ្នាំ៥០០នាក់​ ប៉ុន្តែភាគច្រើនអ្នកមកចាក់វ៉ាក់សាំងដូសជំរុញទី៥។ ក្រៅពីនេះ លោកវេជ្ជបណ្ឌិត ​បានអំពាវនាវដល់ប្រជាពលរដ្ឋ ដែលមិនទាន់ទទួល​បានការចាក់​វ៉ាក់សាំង​តាមការកំណត់របស់គ្រូពេទ្យ ​ត្រូវ​រួសរាន់​ទៅចាក់វ៉ាក់សាំងឲ្យបានគ្រប់ៗគ្នា ដើម្បីទប់ទល់​នឹងការវាយលុកពីជំងឺកូវីដ-១៩ បើទោះបី ​បច្ចុប្បន្នស្ថានភាពជំងឺកូវីដ-១៩ ​មានភាពល្អប្រសើរក្តី។

យោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ​ក្នុងក្រប ខណ្ឌទូទាំងប្រទេស ​បានបង្ហាញថា គិតត្រឹមថ្ងៃទី១៩ ខែមិថុនា នេះ ​ពលរដ្ឋនៅភ្នំពេញ បានចាក់​វ៉ាក់សាំង ដូសជំរុញទី៣ ចំនួនជាង១លាននាក់ ​ដូសជំរុញទី៤ ​បានជាង៨សែននាក់ និងដូសជំរុញទី៥ បានជាង៣ ម៉ឺននាក់៕ អត្ថបទ៖ ទូច សោភ័ណ