​រុស្ស៊ី៖ យោធា​រុស្ស៊ី​បាន​និយាយ​កាលពី​ថ្ងៃអាទិត្យ​ថា ​មានការ​បាត់បង់​ច្រើន​នៅ​ក្នុង​ជួរ​កងទ័ព​អ៊ុយ​ក្រែ​ន ហើយ​យោធាអ៊ុយ​ក្រែ​ន​កំពុង​ត្រូវ​បាន​បង្ខំ​ឱ្យ​ដាក់​បុគ្គលិក​ ដែល​មិនបាន​ត្រៀមខ្លួន​ជាមុន​ចូល​ទៅ​ក្នុង​សមរភូមិ​។ អ្នកនាំពាក្យ​ក្រសួងការពារជាតិ​រុស្ស៊ី​លោក Igor Konashenkov បាន​និយាយថា ការ​វាយប្រហារ​របស់​រុស្ស៊ី​បាន​បំផ្លាញ​អាវុធ​ដែល​ផ្គត់ផ្គង់ដោយ​ប្រទេស​លោកខាងលិច​។

​នៅក្នុង​សន្និសីទ​ប្រចាំថ្ងៃ​លោក Konashenkov បាន​និយាយថា កងកម្លាំង​របស់​រុស្ស៊ី​បាន​គ្រប់គ្រង​ភូមិ Metiolkine នៅ​ខាងក្រៅ​ទីក្រុង Sievierodonetsk។​ លោក​បាន​និយាយថា ប៉ុស្តិ៍​ទីបញ្ជាការ​អ៊ុយ​ក្រែ​ន​មួយកន្លែង​នៅក្នុង​ទីក្រុង Dnipropetrovsk ត្រូវបានវាយប្រហារ​ដោយ​មី​ស៊ី​ល​របស់​រុស្ស៊ី​ ក្នុង​អំឡុងពេល​កិច្ចប្រជុំ​របស់​បុគ្គលិក​ទីបញ្ជាការ​អ៊ុយ​ក្រែ​ន​។ នៅក្នុង​ការវាយប្រហារ​នេះ ឧ​ត្ត​ម​សេនីយ៍ និងទាហាន​ជាង 50នាក់នៃ​កងកម្លាំងប្រដាប់អាវុធអ៊ុយ​ក្រែ​ន​បាន​ស្លាប់។​ ​លោក Konashenkov និយាយថា មី​ស៊ី​ល​របស់​រុស្ស៊ីបាន​បំផ្លាញ​រថភ្លើង​យោធា​អ៊ុយ​ក្រែ​ននៅក្នុងទីក្រុង Dnipropetrovsk ព្រមទាំង​កាំភ្លើង​ធំ M777 ចំនួន​ 10​គ្រឿង និង​រថពាសដែករ​ហូ​តដល់ 20គ្រឿង​នៅក្នុង​ទីក្រុង Mykolaiv ដែល​ត្រូវបាន​ផ្គត់ផ្គង់​ទៅឱ្យ​អ៊ុយ​ក្រែ​ន​ពី​បណ្តា​ប្រទេស​លោកខាងលិច៕

អត្ថបទ៖ ប៊ុនថន