ភ្នំពេញ៖ អគ្គិសនីមិនមានផលប៉ះពាល់ដល់ការផ្គត់ផ្គង់ ឬការខ្វះខាតអគ្គិសនីសម្រាប់ចែកចាយនោះឡើយនៅក្នុងវិបត្តិសកល ព្រោះកម្ពុជាមានថាមពល​ស្អាត​សម្រាប់ផ្គត់ផ្គង់ច្រើន ជាពិសេសមានការ​ឧបត្ថម្ភ​ធន​ពី​រាជរដ្ឋាភិបាល ដែលអាចធានានិរន្តរភាព​ដល់ឧស្សាហកម្ម,រោងចក្រ សហគ្រាស ​និងការ​ប្រើប្រាស់របស់​ប្រជាជន​គ្រប់គ្រាន់។

ឯកឧត្តម កែវ រតនៈ ប្រតិភូរាជរដ្ឋាភិបាល ​ទទួលបន្ទុកជាអគ្គនាយកអគ្គិសនីកម្ពុជា លើកឡើងក្នុង​កិច្ច​សម្ភាសន៍​ជាមួយភ្នាក់ងារសារព័ត៌មាន ស្តីពីការផ្គត់ផ្គង់ និងការចែកចាយអគ្គិសនីក្នុង​ពេល​បច្ចុប្បន្ន នេះថា វិបត្តិកូវីដ ១៩ និងវិបត្តិសកលបញ្ហារុស្សី និងអ៊ុយក្រែន រួមមាន៖ អាមេរិក, អង់គ្លេស និងនៅទ្វីបអឺរ៉ុបទាំងមូល ​និងប្រទេសក្នុង​ អាស៊ានមួយចំនួន ​គឺបានឡើងថ្លៃអគ្គិសនីរួចហើយ ក្នុងនោះ​សម្រាប់កម្ពុជាក៏នឹងត្រូវឡើងថ្លៃអគ្គិសនីដូចគ្នា, បច្ចុប្បន្នអគ្គិសនីកម្ពុជា ដែលជាក្រុមហ៊ុនរដ្ឋ បាននិងកំពុងប្រឈមនឹងការខាតចំណូលដោយសារ ប្រេងឡើងថ្លៃ, ថ្លៃនាំចូលអគ្គិសនី និងថ្លៃនាំចូលធ្យូងថ្មជាដើម។

ឯកឧត្តម បន្តថា កត្តាដែលធ្វើឲ្យអគ្គិសនីនៅកម្ពុជាមិនឡើងថ្លៃ ​គឺដោយសារកម្ពុជាមានវារីអគ្គិសនី និងថាមពល ស្អាត ហើយមានការនាំចូលថាមពលស្អាតបន្ថែម ​បច្ចុប្បន្នកម្ពុជាមានថាមពលស្អាត ៦១% ​ដោយបានជួយកាត់ បន្ថែមដល់ថាមពលប្រើប្រាស់ប្រេង និងធ្យូងថ្ម ។

ចំណែកកត្តាមួយមួយទៀតដែលធ្វើឲ្យអគ្គិសនីមិនឡើងថ្លៃ ដោយសាររាជរដ្ឋាភិបាលជួយ​ឧបត្ថម្ភ​ធនជំនួស​ ជាក់ស្តែងក្នុងឆ្នាំកន្លងមកនេះ អគ្គិសនីកម្ពុជាជួយឧបត្តម្ភធនជាង ១១០ លានដុល្លារ​អាមេរិច ហើយបច្ចុប្បន្ន ​កំពុងជួយ​ឧបត្ថម្ភ​ធន​បន្ថែមទៀត ខណៈថ្លៃដើមនៃការផលិត​បានហក់​ឡើងខ្ពស់ ​។ ចំណែកថ្លៃនៃការផ្គង់ផ្គង់ ​បានរក្សាជាធម្មតា ពោលគឺមិនឡើងថ្លៃ។

នៅក្នុងផែនការរបស់អាជ្ញាធរអគ្គិសនីកម្ពុជា ​នៅក្នុងឆ្នាំ ២០២២ នេះ ​បង្ហាញឲ្យដឹងថា ប្រភពអគ្គិសនី​របស់​កម្ពុជា សរុប ​មានចំនួនប្រមាណ ៤ ០០០ មេហ្គាវ៉ាត់ បានប្រភពអគ្គិសនីក្នុងស្រុក មានជាង ៣ ០០០ មេហ្គាវ៉ាត់, រួមមាន៖ ប្រភពធ្យូងថ្ម ៦៧៥ មេហ្គាវ៉ាត់ និងប្រភពដុតប្រេងជាង ៦៤១ មេហ្គាវ៉ាត់។

ចំណែកថាមពលកកើតឡើងវិញសរុបមានជិត ១ ៨០០ មេហ្គាវ៉ាត់ បានមកពីវារីអគ្គិសនី ជាង ១ ៣៣១ មេហ្គាវ៉ាត់, ថាមពលពន្លឺព្រះអាទិត្យជាង ៤៣៦ មេហ្គាវ៉ាត់ ​និងថាមពលជីវម៉ាស់ ជាង ៣០ មេហ្គាវ៉ាត់។

ដោយឡែកការនាំចូលអគ្គិសនីវិញ មានជិត ១ ៣៣១ មេហ្គាវ៉ាត់ នាំចូលពីថៃ មានចំនួន ២៧៧ មេហ្គាវ៉ាត់, វៀតណាម ៣៣២ មេហ្គាវ៉ាត់ ​និងពីប្រទេសឡាវ មានចំនួន ៥២១ មេហ្គាវ៉ាត់៕

អត្ថបទ៖ សុន រ៉ាឌី