កំពត៖ ខេត្តកំពតបានបើកយុទ្ធនាការចាក់វ៉ាក់សាំងការពារជំងឺកូវីដ១៩ ដូសជំរុញទី៥ ដល់មន្រ្តីជួរមុខ និងពលរដ្ឋដល់ថ្ងៃកំណត់ត្រូវចាក់ នៅថ្ងែទី៨ ខែមិថុនា ឆ្នាំ២០២២ ហើយគិតមកដល់ ថ្ងៃទី១៩ ខែមិថុនានេះ រដ្ឋបាលខេត្តកំពតបានផ្តល់វ៉ាក់សាំងការពារជំងឺកូវីដ១៩ ដូសជំរុញទី៥ ជិតពីរពាន់នាក់ ហើយការចាក់ដូសទី៥ សម្រាប់ពលរដ្ឋទូទៅនឹងឡើងចាប់ពីថ្ងៃទី២០ ខែមិថុនានេះតទៅ។

ប្រធានកម្មវិធីផ្តល់ថ្នាំបង្ការ នៃមន្ទីរសុខាភិបាលខេត្តកំពត លោក ស៊ីន ចូវ បានប្រាប់ឲ្យដឹងថា ដំណើរការចាក់វ៉ាក់សាំងការពារជំងឺកូវិដ១៩ គ្រប់ដូសទាំងអស់ នៅតែបន្តធ្វើឡើងតាមធម្មតា នៅ​តាម​មណ្ឌលសុខភាព និងមន្ទីរពេទ្យបង្អែក ​និងមន្ទីរពេទ្យឯកជនមួយចំនួន សរុបទាំងអស់មាន ៧២ទីតាំនៅក្នុងខេត្ត។

លោក បានបន្តថា ដំណើរនៃការចាក់វ៉ាក់សាំងមិនសូវមមាញឹកទេក្នុងពេលបច្ចុប្បន្ននេះ ហើយ​មន្ត្រីជួរ​មុខ​បានមកទទួលវ៉ាក់សាំងដូសទី៥ បានចំនួន១៩០៧នាក់។ ប៉ុន្តែលោកសន្និដ្ឋានថា ចាប់ពីថ្ងៃទី២០ ខែមិថុនានេះទៅ ការងារចាក់វ៉ាក់សាំងអាចនឹងមមាញឹកជាងមុន ដោយសារដូសទី៥ ចាប់ផ្តើមបើកចាក់ជូនប្រជាពលរដ្ឋទូទៅ ម្យ៉ាងទៀតពលរដ្ឋដែលដល់ថ្ងៃកំណត់ត្រូវមកចាក់ដូសទី៣ និងទី៤ក៏មានច្រើន។

តាមរបាយការណ៍លទ្ធផលនៃការចាក់វ៉ាក់សាំងការពារជំងឹកូវីដ១៩ ​ជូនពលរដ្ឋខេត្តកំពត គិត​ត្រឹមថ្ងែទី១៩ ខែមិថុនា ឆ្នាំ២០២២នេះ សម្រេចបាន៖ ដូសទី១ ជាង៥៤ម៉ឺននាក់ ស្មើនឹង៨១.៥២% , ដូសទី២ជាង ៥១ម៉ឺននាក់ ស្មើនឹង ៩៤.៥៦% , ដូសទី៣ ជាង៣១ម៉ឺននាក់ ស្មើនឹង៦២.១៤% , ដូសទី៤ បានជាង៥ម៉ឺននាក់ ស្នើ១៩.២២% និងដូសទី៥ ចាក់បាន ១.៩០៧នាក់ ស្មើនឹង៤.៩៨% បើធៀបនឹងដូសទី៤ ។

លោកប្រធានកម្មវិធីផ្តល់ថ្នាំបង្ការ បានអំពាវនាវដល់ក្រុមមនុស្សគ្រប់ប្រភេទដែលដល់​ថ្ងៃកំណត់​ត្រូវចាក់វ៉ាក់សាំង ​សូមនាំគ្នាទៅចាក់នៅមន្ទីរពេទ្យបង្អែក​ ឬមណ្ឌលសុខភាព ដែលនៅជិតផ្ទះ​របស់​បងប្អូនផ្ទាល់។ ខេត្តកំពតទទួលវ៉ាក់សាំងការពារកូវីដ១៩ សរុបចំនួន ១,២៧៤,៣២៦ដូស បាន​ប្រើប្រាស់ ១,២០០,៧៣៧ដូស នៅសល់ក្នុងស្តុក ចំនួន ៧៣,៥៨៨ដូស៕អត្ថបទ៖ អន សារឹម