​រុស្ស៊ី៖ លោក Dmitry Muratov និពន្ធ​នាយក​ជនជាតិ​រុស្ស៊ី​របស់​សារព័ត៌មាន​ឯករាជ្យ Novaya Gazeta កាលពី​ថ្ងៃ​ចន្ទ​បាន​លក់​ដេញថ្លៃ​មេដាយ​មាស​ពានរង្វាន់​ណូបែល​សន្តិភាព​របស់​លោក​ក្នុង​តម្លៃ ១០៣.៥​លាន​ដុល្លារ​អាមេរិកដើម្បី​ជួយ​ដល់​កុមារ​អ៊ុយ​ក្រែ​ន​ដែល​បាន​ភៀសខ្លួន​ ដោយសារ​សង្គ្រាម​នៅ​ក្នុង​ប្រទេស​អ៊ុយ​ក្រែ​ន​។

​មេដាយ​នេះ​ត្រូវ​បាន​លក់​ទៅ​ឱ្យ​អ្នកដេញថ្លៃ​ទូរស័ព្ទ​ ដែល​មិន​ស្គាល់​អត្តសញ្ញាណ​នៅ​កន្លែង​លក់​នៅ​ទីក្រុង New York ​ដែល​រៀបចំ​ដោយ​កម្មវិធី​ដេញថ្លៃ​បេតិកភណ្ឌ​។​ លោក Muratov បាន​ឈ្នះ​ពាន​រង្វាន់​នេះ​ក្នុង​ឆ្នាំ2021 រួមជាមួយ​អ្នក​សារ​ព័ត៌មាន Maria Ressa ជនជាតិ​ហ្វីលីពីន ដោយ​គណៈកម្មការ​ផ្ដល់​កិត្តិយស​ដល់​ពួកគេ​ សម្រាប់​កិច្ច​ខិតខំ​ប្រឹងប្រែង​ការពារ​សិទ្ធិ​បញ្ចេញមតិ​។ ​លោក​ស្ថិត​ក្នុង​ចំណោម​ក្រុម​អ្នកសារព័ត៌មាន ​ដែល​បាន​បង្កើត​ក្រុមហ៊ុន​សារព័ត៌មាន Novaya Gazeta ក្នុង​ឆ្នាំ​1993 បន្ទាប់ពី​ការ​ដួល​រលំ​អតីត​សហភាពសូវៀត​។

ឆ្នាំនេះ សារព័ត៌មាន​នេះ​ក្លាយ​ជា​សារព័ត៌មាន​ដ៏​ធំ​តែ​មួយ​គត់​រិះគន់ប្រធានាធិបតី​រុស្ស៊ី​លោក Vladimir Putin និង​យុទ្ធវិធី​នានា​របស់​លោក​ទាំង​នៅ​ក្នុង ​និង​ក្រៅ​ប្រទេស​។​ ​ការ​ដេញ​ថ្លៃ​ផ្សាយ​ផ្ទាល់​នេះ​បាន​កើត​ឡើង​ចំ​ថ្ងៃ​ទិវា​ជនភៀសខ្លួន​ពិភពលោក។ កាលពីមុន​ពានរង្វាន់​ណូ​បែប​សន្តិភាព​ដូចនេះ ត្រូវ​បាន​ផ្ដល់​តម្លៃ​ខ្ពស់​បំផុត ៤.៧៦​លាន​ដុល្លារ​អាមេរិក​កាលពី​ឆ្នាំ​2014៕

អត្ថបទ៖ សុខមាន