ភ្នំពេញ៖ សម្ដេចវិបុលសេនាភក្តី សាយ ឈុំ ប្រធានព្រឹទ្ធសភាជាតិ បានណែនាំទៅអាជ្ញាធរមូលដ្ឋាន ពិសេសក្រុមប្រឹក្សាឃុំ-សង្កាត់ ទើបនឹងជាប់ឆ្នោតថ្មីៗ ត្រូវខិតខំប្រឹងប្រែងបម្រើប្រជាពលរដ្ឋ តាមតួនាទីភារកិច្ចរបស់ខ្លួន ដោយគ្មានលក្ខខ័ណ្ឌណាមួយនោះទេ ។

ក្នុងឱកាសអញ្ជើញជាអធិបតី ក្នុងពិធីសម្ពោធដាក់ឲ្យប្រើប្រាស់អគាររដ្ឋបាលថ្មី នៅវិទ្យាល័យជាស៊ីមជ្រោយចង្វារ ស្ថិតក្នុងខណ្ឌជ្រោយចង្ការ សម្ដេចវិបុលសេនាភក្តី មានប្រសាសន៍ថា ដំណើរការរៀបចំការបោះឆ្នោត ជ្រើសរើសក្រុមប្រឹក្សាឃុំសង្កាត់ ប្រព្រឹត្តិទៅដោយរលូន មានសណ្ដាប់ធ្នាប់ សេរី ត្រឹមត្រូវយុត្តិធម៌ និងតម្លាភាព ដោយមានការចូលរួមពីគ្រប់គណបក្សមាននិន្នាការផ្សេងៗគ្នា និងគ្មានការគំរាមកំហែង បង្ខិតបង្ខំ ឬអំពើហិង្សាឡើយ ខណៈការរាប់សន្លឹកឆ្នោត មានតម្លាភាព សុក្រិតភាព និងប្រសិទ្ធភាព ដោយរាប់នៅនឹងកន្លែងបោះឆ្នោតតែម្ដង ។

សម្ដេចបានបន្តថា ចំពោះការបោះឆ្នោតនេះ ឃើញថាប្រជាពលរដ្ឋមានការគាំទ្រភាគច្រើន​លើសលុប​លើគណបក្សប្រជាជនកម្ពុជា ព្រោះពួកគាត់ត្រូវការគណបក្សប្រជាជនកម្ពុជា ដើម្បីដឹកនាំសង្គម ទាំងនៅថ្នាក់ជាតិ ថ្នាក់ក្រោមជាតិ រួមទាំងថ្នាក់ឃុំ-សង្កាត់ ។

សម្ដេចប្រធានព្រឹទ្ធសភា បានបន្ថែមថា អាស្រ័យហេតុនេះ អាជ្ញាធរគ្រប់លំដាប់ថ្នាក់ បន្តផ្សារភ្ជាប់ឲ្យកាន់តែជិតស្និទ្ធជាមួយប្រជាពលរដ្ឋក្នុងមូលដ្ឋាន ជាពិសេសមេឃុំ ចៅសង្កាត់ និងថ្នាក់ដឹកនាំឃុំ-សង្កាត់ ត្រូវតែរួមគ្នាឲ្យកាន់តែសកម្មថែមទៀត ក្នុងការបម្រើប្រជាជន​នៅតាមមូលដ្ឋានរបស់ខ្លួននីមួយៗ តាមតួនាទី ភារកិច្ច និងសមត្ថកិច្ចរបស់ខ្លួន ដោយគ្មានលក្ខខ័ណ្ឌ ។

ពាក់ព័ន្ធនឹងវិស័យអប់រំវិញ សម្ដេចវិបុលសេនាភក្តី សាយ ឈុំ បានថ្លែងថា ជានិច្ចកាល​រាជរដ្ឋាភិបាលតែងតែផ្ដល់អាទិភាពទី១ លើការអភិឌ្ឍធនធានមនុស្ស ដើម្បីលើកស្ទួយ និងអភិវឌ្ឍវិស័យអប់រំកម្ពុជា ពោលគឺបន្តធានានូវសេវាអប់រំ ដែលមានគុណភាព ប្រកប​ដោយសមធម៌ និងបរិយាប័ន្ន ព្រមទាំងលើកកម្ពស់ឱកាសការសិក្សាពេញមួយជីវិត សម្រាប់ទាំងអស់គ្នា ។

ជាមួយនេះ សម្ដេចអំពាវនាវដល់គ្រប់សាលារៀន យកចិត្តទុកដាក់ខ្ពស់ ចំពោះកម្មវិធីសិក្សា ដែលអាចជួយសិស្សទទួលបាននូវគុណវុឌ្ឍិមួយចំនួន ដូចជាអាចយល់ដឹងអំពីអ្វីដែលខុស និងអ្វីដែលត្រូវ មានគំនិតច្នៃប្រឌិត ចេះគោរព និងចេះប្រើពាក្យសំដី និងអាកប្បកិរិយា​គួរសម​ចំពោះមនុស្សគ្រប់រូប ចេះគោរពស្រឡាញ់ខ្លួនឯង គ្រួសារ និងអ្នកដទៃ ចូលចិត្ត​សកម្មភាព​ដែលនាំ​មកនូវសុខភាពល្អ និងការរីកចម្រើនទាំងផ្នែករាយកាយ និងបញ្ញា ៕ អត្ថបទ៖ បាន សុខរិទ្ធិ