ភ្នំពេញ៖ នៅថ្ងៃទី២១ខែមិថុនារៀងរាល់ឆ្នាំកម្ពុជា តែងតែ​ប្រារព្ធ​ទិវាអតីតយុទ្ធជនកម្ពុជា ហើយនៅ​ក្នុងឆ្នាំ២០២២នេះ គឺខួបលើកទី១៥ ​នៅក្នុងឱកាសនេះដែរ ​បណ្តាអតីតយុទ្ធជន​ អរគុណរដ្ឋាភិបាល​ដែល​គិតគូរ​ដល់ពួកគាត់ ​និងបានអំពាវនាវអោយយុវជនជំនាន់ក្រោយ រួមគ្នាថែរក្សាសុខសន្តិភាព ជម្រុញប្រទេសជាតិបន្តការអភិវឌ្ឍ និងរីកចំរើន។

បើតាមបណ្តាអតីតយុទ្ធជនដែលជាអតីតទាហាន និងនគរបាលនៅខេត្តកណ្តាល បានថ្លែងប្រាប់BTV នៅថ្ងៃទី២១ ខែមិថុនា នេះថា បច្ចុប្បន្ននេះ ពួកគាត់មានការពេញចិត្តជាខ្លាំង ដែលរៀងរាល់ឆ្នាំ រាជរដ្ឋាភិបាល បានកំណត់យក ថ្ងៃទី២១ មិថុនា ​ជាទិវាអតីតយុទ្ធជនកម្ពុជា ដើម្បីរំឭកដល់គំរូវីរភាព និងគុណបំណាច់ដ៏ធំធេងរបស់វីរយុទ្ធជន យុទ្ធនារី នៃកងកម្លាំងប្រដាប់​អាវុធ និងប្រជាពលរដ្ឋគ្រប់ស្រទាប់ដែលបានពលិកម្មយ៉ាងអង់អាចក្លាហាន ដើម្បីបុព្វហេតុជាតិមាតុភូមិ ហើយ ការចូលរួមធ្វើពលិកម្មនៅគ្រប់ដំណាក់កាលនៃប្រវត្តិសាស្ត្រនេះ គឺបានរួមចំណែកយ៉ាងសំខាន់ក្នុងកិច្ចការពារបូរណភាពទឹកដី ​ការកសាងសុខសន្តិភាព និង​ស្ថិរភាពសង្គមសម្រាប់កម្ពុជា សំដៅធានាឱ្យមានការអភិវឌ្ឍសេដ្ឋកិច្ច និងសង្គមដើម្បី​ជាឧត្តម​ប្រយោជន៍​សម្រាប់ជាតិមាតុភូមិ និងប្រជាជនកម្ពុជា។

ចំណែកឯប្រជាពលរដ្ឋ ក៏បានលើកឡើងថ្លែងអំណរគុណ ទៅដល់បណ្តាអតីតយុទ្ធជនកម្ពុជា ដែល​បានធ្វើ​ពលីកម្មចូលសមរភូមិប្រយុទ្ធដើម្បី​បញ្ចប់​សង្គ្រាម ​រហូតធ្វើអោយកម្ពុជា មានសុខសន្តិភាព អភិវឌ្ឍន៍ ​រីកចំរើនរហូតមកដល់បច្ចុប្បន្ន ​ហើយបច្ចុប្បន្នយើងក៏បានមើលឃើញថា រាជរដ្ឋាភិបាល​បាន​យកចិត្តទុកដាក់ខ្ពស់ក្នុងការអនុវត្តគោលនយោបាយនានា ​ដើម្បី​លើក​កម្ពស់​សុខុមាលភាព និង​ជីវភាព​រស់នៅរបស់បងប្អូនអតីតយុទ្ធជនឱ្យបានល្អប្រសើរជាបន្តបន្ទាប់ ក្នុងនោះនៅពេលអតីត​យុទ្ធជន​មានជំងឺគឺបានផ្តល់ការព្យាបាល​ដោយឥតគិតថ្លៃផងដែរ។

សូមបញ្ជាក់ថា តាមសារលិខិតសម្តេចតេជោ ហ៊ុន សែន ​នាយករដ្ឋមន្ត្រីកម្ពុជា​ និង ជាប្រធាន​សមាគម​អតីតយុទ្ធជនកម្ពុជា ​នៅក្នុងឱកាសខួបលើកទី១៥​ ទិវាអតីតយុទ្ធជនកម្ពុជា ​២១ មិថុនា ឆ្នាំ២០២២នេះ បានឱ្យដឹងថា ​បច្ចុប្បន្ននៅកម្ពុជាមានអតីតយុទ្ធជនចំនួន​១០ម៉ឺន៣ ​៧៩៧នាក់ និងមាន​អ្នកនៅក្នុងបន្ទុកចំនួន ១៥ម៉ឺន០ ៥៣៩នាក់កំពុងទទួលប្រាក់របបសន្តិសុខ​សង្គមប្រចាំខែពីរដ្ឋ៕ អត្ថបទ ស៊ុម សុខជា