ភ្នំពេញ៖ ដើម្បីទប់ស្កាត់ការវាយការលុកពីជំងឺកូវីដ-១៩ និងធានានិរន្តរភាពការសិក្សា កុមារ និងយុវវ័យអាយុពី១២ ដល់ក្រោម១៨ឆ្នាំ រស់នៅរាជធានីភ្នំពេញ នៅថ្ងៃទី២១ខែមិថុនានេះ បន្តទៅចាក់វ៉ាក់សាំងដូសជំរុញទី៤ ប្រភេទPfizer។

កុមារ និងយុវវ័យអាយុពី១២ ដល់ក្រោម១៨ឆ្នាំ មកចាក់វ៉ាក់សាំងដូសទី៤ ស្ថិតក្នុងរាជធានីភ្នំពេញ នៅថ្ងៃទី២១ខែមិថុនានេះ បានប្រាប់BTVឲ្យដឹងថា ការស្ម័គ្រចិត្តមកចាក់វ៉ាក់សាំងដូសជំរុញទី៤ គឺដើម្បីការពារខ្លួនកុំឲ្យឆ្លងជំងឺកូវីដ-១៩ និងមិនចង់ឲ្យមានការបិទសាលារៀនដូចកាលពីឆ្នាំមុន ព្រោះជំងឺកូវីដ-១៩នោះទេ។

ពួកគាត់ បន្តថា កាលពីឆ្នាំមុនរៀនតាមអនឡាញពិបាកសិក្សា ​ប៉ុន្តែនៅឆ្នាំនេះ ចូលសាលារៀនវិញ​មានភាពងាយស្រួលច្រើនជាងមុន។ ជាមួយគ្នានេះ អាណាព្យាល បានបង្ហាញការសប្បាយចិត្ត និងអគុណដល់រាជរដ្ឋាភិបាល ដែលអនុញ្ញាតដល់កូនៗ​របស់ពួកគាត់ទទួល​បានការចាក់វ៉ាក់សាំង​ដូសទី៤។

យោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុង​ក្របខណ្ឌទូទាំង​ប្រទេសបានបង្ហាញថា គិតត្រឹមថ្ងៃទី២០ខែមិថុនាម្សិលមិញ កុមារ និងអាយុវវ័យ អាយុពី១២ ​ដល់ក្រោម១៨ឆ្នាំ នៅទូទាំងប្រទេសកម្ពុជា ​បានចាក់វ៉ាក់សាំងដូសជំរុញទី៤ ប្រភេទPfizer មានចំនួនជាង ៣៤ម៉ឺននាក់ និងវ៉ាក់សាំងប្រភេទ Sinovac មានចំនួនជាង៥ពាន់នាក់។

ចាប់ពីតាំងពីថ្ងៃទី១ ខែវិច្ឆិកា ឆ្នាំ២០២១មក ប្រទេសកម្ពុជា ​បើកដំណើរការសេដ្ឋកិច្ចធម្មតា ជាមួយ​វត្តមាន​ជំងឺកូវីដ-១៩ ក្រោយពេលរាជរដ្ឋាភិបាលទទួល​បានជោគជ័យ លើនយោបាយចាក់វ៉ាក់សាំង​កូវីដ ស្រោចលើប្រជាពលរដ្ឋបានជាច្រើនលាននាក់៕ អត្ថបទ៖ទូច សោភ័ណ