ក្រចេះ៖ នៅឯខេត្តក្រចេះ បានបើកយុទ្ធនាការអន្ទាក់សូន្យ ដែលរៀបចំឡើងដោយក្រសួងបរិស្ថាន មន្ទីរបរិស្ថាន និងអង្គការអភិរក្សអន្តរជាតិ (CI) គម្រោងព្រៃឡង់បៃតង អង្គការ WWF អង្គការ WCS អង្គការ WEA អង្គការ Nature Life និងអង្គការ RECOFTC ដើម្បីបញ្ឈប់ការដាក់អន្ទាក់គ្រប់ប្រភេទ នៅក្នុងតំបន់ការពារ ធម្មជាតិកម្ពុជា ដើម្បីអភិរក្សសត្វព្រៃឱ្យនៅគង់វង្ស និងមានចំនួនសម្បូរឡើងវិញ ។

អន្ទាក់ដែលត្រូវបានប្រមូលនៅក្នុងតំបន់ការពារ ដែលអង្គការ អភិរក្ស បានជួយគាំទ្រ មានចំនួនប្រហែល ២០០០ ទៅ២៥០០អន្ទាក់ក្នុងមួយឆ្នាំៗ ដែលអន្ទាក់ទាំងនោះ មានដូចជា អន្ទាក់ខ្សែកាប និង អន្ទាក់ខ្សែនីឡុង សម្រាប់ចាប់សត្វទាំងតូចទាំងធំ។

មានសត្វព្រៃមួយចំនួន ត្រូវបានប្រទះឃើញជាប់អន្ទាក់ និងមួយចំនួនទៀត ក៏ត្រូវបានរឹបអូសពី​អ្នកប្រមាញ់។ អន្ទាក់ គឺជាឃាតករសម្ងាត់ ដែលបាននឹងកំពុងសម្លាប់សត្វព្រៃជារៀងរាល់ថ្ងៃ។ ដែលនេះជាការបញ្ជាក់ឲ្យដឹងពីតំណាងអង្គការអភិរក្សអន្តរជាតិ។

ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន បានឱ្យដឹងថា សព្វថ្ងៃ អន្ទាក់ បាននឹងកំពុង គំរាមកំហែងជីវិតសត្វស្ទើរគ្រប់ប្រភេទ នៅក្នុងតំបន់ការពារ រួមមានទាំងបក្សី សត្វជើងពីរ ជើងបួន ដូចជា ពពួកក្រចកជើងចំពាមជាដើម។ វាជាការចាំបាច់ត្រូវរៀបចំនូវវិធានការពហុវិស័យ ដែលនឹងអាចជាចលករ ជំរុញការផ្លាស់ប្តូរ ដើម្បីបញ្ចប់វិបត្តិអន្ទាក់ និងការជួញដូរសត្វព្រៃខុសច្បាប់ នៅទូទាំងប្រទេសកម្ពុជា។

វិបត្តិ អន្ទាក់បាននាំឱ្យសត្វភាគច្រើនត្រូវងាប់នៅនឹងកន្លែង ដោយសារគ្មានចំណី ខ្សោះជាតិទឹក និងសុខភាពខ្សោយជាដើម។ បើទោះបីសត្វទាំងនោះ មានសំណាងរួចខ្លួនក្រោយជាប់អន្ទាក់​ក៏​ដោយ ប៉ុន្តែរបួស ដែល បង្កដោយអន្ទាក់នោះ អាចធ្វើឱ្យសត្វទាំងនោះត្រូវពិការ ឬរបួសរ៉ាំរ៉ៃ រហូតត្រូវបាត់បង់ជីវិតវិញក៏មាន។ ហេតុនេះហើយ ទើបអន្ទាក់ បានក្លាយជាឃាតករ​លាក់មុខ​នៅតាមព្រៃ រង់ចាំសម្លាប់សត្វតូច-ធំ មិនរើសមុខ ហើយវាក៏បានក្លាយជាក្តីបារម្ភសម្រាប់អ្នកការពារ និងអភិរក្សសត្វព្រៃនៅកម្ពុជា និងក្នុងពិភពលោក។

ឯកឧត្តម នេត្រ ភក្ត្រា បានបញ្ជាក់ថា ការ​បញ្ចប់វិបត្តិអន្ទាក់ ​និងជួញដូរសត្វព្រៃខុសច្បាប់ ត្រូវតែ ផ្តើម​ចេញពីសកម្មភាព ​នៃការចូលរួមរបស់ប្រជាពលរដ្ឋមូលដ្ឋាន និងការអនុវត្តច្បាប់ឱ្យបាន​តឹងរឹង​ពីអាជ្ញាធរមូលដ្ឋាន ដោយរាប់ចាប់ពីប្រជាពលរដ្ឋក្នុងភូមិ ​ដល់អ្នកផ្តល់សេវាដឹកជញ្ជូន អ្នកលក់​ដូរម្ហូបអាហារនៅទី ផ្សារ ក្នុងក្រុង ​និងទីប្រជុំជន រហូតដល់ម្ចាស់ភោជនីយដ្ឋាន ​និងអតិថិជន។ ការចូលរួមរបស់ប្រជាពលរដ្ឋ ​សហគមន៍ គឺដើរតួយ៉ាងសំខាន់ក្នុងការផ្តល់សុវត្ថិភាពដល់ការរស់រាន នៃសត្វព្រៃគ្រប់ប្រភេទ ក្នុងទីជម្រក​ ព្រៃធម្មជាតិ​ និងក្នុងការចូលរួមបញ្ឈប់ការប្រើប្រាស់ និង​ការដាក់​អន្ទាក់ ក្នុងដែនជម្រកធម្មជាតិសម្រាប់ សត្វព្រៃ។

ក្រសួងបរិស្ថាន បានអំពាវនាវដល់ប្រជាពលរដ្ឋទាំងអស់ ​ឱ្យបញ្ឈប់ការទទួលទានសាច់សត្វព្រៃ ឬជាវផលិតផលពីសត្វព្រៃដទៃទៀតជាដាច់ខាត៕

អត្ថបទ៖ សេង ម័រ