សហរដ្ឋអាមេរិក៖ អ្នកដំណើរតាមអាកាសនៅសហរដ្ឋអាមេរិក កំពុងប្រឈមភាពចលាចលរដូវក្តៅនៅតាមអាកាសយានដ្ឋាននៅទូទាំងប្រទេស ដោយជើងហោះហើររាប់ពាន់ជើងត្រូវបានលុបចោលដោយសារតែខ្វះបុគ្គលិក និងតម្លៃសំបុត្រឡើងថ្លៃខ្ពស់ ខណៈការកើនឡើងតម្លៃប្រេងឥន្ធនៈ។
យ៉ាងហោចណាស់ជើងហោះហើរ ១៥,០០០ជើងត្រូវបានលុបចោលនៅអាមេរិកកាលពីចុងសប្តាហ៍កន្លងទៅនេះ ដោយជើងហោះហើរចំនួន ១,០០០ជើងត្រូវបានលុបចោលកាលពីថ្ងៃអាទិត្យ ដោយបន្ថែមលើជើងហោះហើរត្រូវបានលុបចោលដែលបានរាយការណ៍ចំនួន ១៤,០០០ជើងកាលពីថ្ងៃសុក្រ និងថ្ងៃសៅរ៍។ ក្រុមហ៊ុនអាកាសចរណ៍នៅទូទាំងពិភពលោកបានព្យាយាម ដាក់ជំនួសបុគ្គលិករាប់ពាន់នាក់ដែលត្រូវបានកាត់រំសាយ អំឡុងការរាតត្បាតជំងឺ Covid-19 កាលពី ២ឆ្នាំកន្លងទៅនេះ។ បុគ្គលិកដែលមានស្រាប់បានធ្លាក់ខ្លួនឈឺ ខណៈវីរុសកូរ៉ូណាបានបន្តរាលដាល។ ដោយមានតម្រូវការក្នុងការដឹកជញ្ជូនអ្នកដំណើរ ក្នុងពេលរដូវកាលវិស្សមកាលរដូវក្តៅនៅសហរដ្ឋអាមេរិកកំពុងធ្វើឡើង អ្នកវិភាគក្រុមហ៊ុនឧស្សាហកម្មអាកាសចរណ៍ កំពុងព្យាករណ៍ពីស្ថានភាពធ្ងន់ធ្ងរសម្រាប់អ្នកដំណើរ និងជម្លោះយូរអង្វែងសម្រាប់ឧស្សាហកម្មនេះ។
តម្លៃប្រេងដែលកំពុងតែកើនឡើងបានបន្ថែមការលំបាកសម្រាប់អ្នកធ្វើដំណើរ ដោយតម្លៃសំបុត្រយន្តហោះលើផ្លូវធ្វើដំណើរមួយចំនួនកើនឡើងជាងទ្វេដង។ មន្ត្រីរដ្ឋាភិបាលអាមេរិកបានដាក់សម្ពាធលើប្រធានក្រុមហ៊ុនអាកាសចរណ៍សហរដ្ឋអាមេរិកជាច្រើន ដើម្បីធ្វើឲ្យប្រសើរឡើងសេវាដឹកអ្នកដំណើរអំឡុងកិច្ចប្រជុំមួយកាលពីសប្តាហ៍មុន និងបានគំរាមដាក់ទណ្ឌកម្មក្រុមហ៊ុនអាកាសចរណ៍ដែលមិនបានការពារអតិថិជនរបស់ខ្លួន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
