ភ្នំពេញ ៖ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាលដំណាក់កាលទី២ បានអញ្ជើញបើកសិក្ខាសាលា ស្តីពីសមិទ្ធផលការងារផ្អែកលើលក្ខខណ្ឌ និងវេទិកាចែករំលែកចំណេះដឹង នៃគម្រោងលើកកម្ពស់គុណភាព និងសមធម៌សុខាភិបាលដំណាក់កាលទី២។

​សិក្ខាសាលាខាងលើនេះ បានប្រារព្ធឡើងនាព្រឹកថ្ងៃទី២១ ខែមិថុនា ឆ្នាំ២០២២នេះ និងមានការចូលរួមពីឯកឧត្តម ហ៊ុល បុណ្ណារ័ត្ន ប្រធាននាយកដ្ឋានសហប្រតិបត្តិការពហុភាគី នៃអគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុល នៃក្រសួងសេដ្ឋកិច្ច និងហិរញ្ញវត្ថុ តំណាងធនាគារពិភពលោក និងដៃគូពាក់ព័ន្ធនានា ព្រមទាំងមន្ទីរសុខាភិបាល នៃរដ្ឋបាលខេត្តរាជធានីទាំង២៥។ 

លោកជំទាវ វេជ្ជបណ្ឌិត យក់ សម្បិត្ត បានថ្លែងអំណរគុណ និងកោតសរសើរ ដល់មន្រ្តីសុខាភិបាលគ្រប់លំដាប់ថ្នាក់ អាជ្ញាធរមូលដ្ឋាន និងដៃគូអភិវឌ្ឍន៍ទាំងអស់ ដែលបានចូលរួមចំណែកក្នុងការប្រយុទ្ធ នឹងជំងឺកូវីដ-១៩ នៅកម្ពុជា ក្នុងរយៈពេលជាង ២ឆ្នាំកន្លងមកនេះ ដែលជោគជ័យនេះ កើតឡើងពីការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាអគ្គមេបញ្ជាការដឹកនាំចង្អុលបង្ហាញផ្ទាល់។  

លោកជំទាវ រដ្ឋលេខាធិការ បានបន្តទៀតថា គម្រោងលើកកម្ពស់គុណភាព និងសមធម៌សុខាភិបាលដំណាក់កាលទី១ បានទទួលលទ្ធផលគួរជាទីមោទនៈ ហើយសិក្ខាសាលានាថ្ងៃនេះ ជាការចាប់ផ្តើមគម្រោងដំណាក់កាលទី២ ដែលនឹងផ្តល់នូវបទចំណេះដឹងថ្មីៗ និងបទពិសោធន៍ជាមេរៀនល្អ ដែលទទួលបានពីដំណាក់កាលទី១ សម្រាប់អនុវត្តដំណាក់កាលទី២។

លោកជំទាវ រដ្ឋលេខាធិការ បានលើកទឹកចិត្តសិក្ខាកាមទាំងអស់ចែករំលែកនូវបទពិសោធន៍ល្អៗសម្រាប់ជាធាតុចូលបន្ថែម ព្រមទាំងស្វែងយល់បន្ថែមពីនីតិវិធីអនុវត្តគម្រោង ដើម្បីធានាការអនុវត្តគម្រោងប្រកបដោយប្រសិទ្ធភាព និងប្រសិទ្ធផល និងសូមថ្លែងអំណរគុណដល់ធនាគារពិភពលោក និងដៃគូទាំងអស់ដែលបានចូលរួមចំណែកលើកកម្ពស់សេវាសុខាភិបាលនៅកម្ពុជា។

ទន្ទឹមគ្នានោះដែរ ឯកឧត្តម ហ៊ុល ប៊ុណ្ណារ័ត្ន បានសម្តែងនូវការកោតសរសើរដល់ក្រសួងសុខាភិបាល និងដៃគូទាំងអស់ ដែលបានសហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងការអនុវត្តគម្រោងលើកកម្ពស់គុណភាព និងសមធម៌សុខាភិបាលដំណាក់កាលទី១ ដោយជោគជ័យទៅតាមគោលដៅដែលបានកំណត់។ 

ជាមួយគ្នានោះដែរ លោកស្រី Shou Zhang តំណាងធនាគារពិភពលោក បានបញ្ជាក់ថា គម្រោងដំណាក់កាលទី២ នឹងផ្តោតលើការប្រយុទ្ធនឹងជំងឺមិនឆ្លង ហើយសិក្ខាសាលានាថ្ងៃនេះ គឺជាការចាប់ផ្តើមនៅលើដំណើរផ្លូវរយៈពេល៥ឆ្នាំ ជាមួយគ្នាជាបន្តទៀត ព្រមទាំងសម្តែងនូវសេចក្តីសង្ឃឹមថាសិក្ខាសាលានាថ្ងៃនេះនឹងផ្តល់នូវសារៈសំខាន់សម្រាប់ការអនុវត្តដំណាក់កាលទី២៕

អត្ថបទ ៖ រដ្ឋា