ភ្នំពេញ៖ មន្រី្តសុខាភិបាល នៃមនី្ទរសុខាភិបាលរាជធានីភ្នំពេញ ប្រចាំគោលដៅទាំង៩ខណ្ឌ បានចុះអប់រំ និងដាក់ថ្នាំអាបេត តាមខ្នងផ្ទះប្រជាពលរដ្ឋ ដើម្បីបង្ការជំងឺគ្រុនឈាម។

ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី២២ ខែមិថុនា ឆ្នាំ២០២២នេះថា ក្រោយពីទទួលបានសម្ភារៈបរិក្ខារ និងថ្នាំអាបេត ពីក្រសួងសុខាភិបាល មនី្ទរសុខាភិបាលរាជធានីភ្នំពេញ បានធ្វើការបែងចែក និងប្រគល់ថ្នាំអាបេត ព្រមទាំងសារអប់រំសុខភាព ជូនការិយាល័យស្រុកប្រតិបតិ្តទាំងអស់ ដើម្បីយកថ្នាំអាបេត ទៅដាក់ក្នុងពាងទឹកសម្លាប់ដង្កូវទឹក និងលុបបំបាត់ជម្រកមូសខ្លា តាមសហគមន៍ងាយរងគ្រោះ ដោយក្រុមការងារគ្រូពេទ្យ ធ្វើដំណើរដើរពីផ្ទះមួយ ទៅផ្ទះមួយ របស់ប្រជាពលរដ្ឋ ក្នុងរដ្ឋបាលខណ្ឌទាំង៩ នៅជាយរាជធានីភ្នំពេញ ដែលមិនឋិតនៅកណ្តាលក្រុង ដោយសរុបថ្នាំអាបេតប្រគល់ជូន មានចំនួន១១តោន។

ប្រធានមនី្ទរសុខាភិបាលរាជធានីភ្នំពេញ បានបន្តទៀតថា មន្រី្តសុខាភិបាល សហការជាមួយ​អាជ្ញាធរ​មូលដ្ឋាន បានចុះទៅដល់សហគមន៍ងាយរងគ្រោះ ​និងកន្លែងកម្មករស្នាក់នៅ ​ដើម្បីអប់រំ ផ្សព្វផ្សាយ​សម្អាតនាម័យបរិស្ថាន ​និងចែកថ្នាំអាបេដ​ ដើម្បីបង្ការជំងឺគ្រុនឈាម ព្រមទាំងផ្សព្វផ្សាយ​ពីវិធានការ ​ការពារទប់ស្កាត់ និងបង្ការនូវជំងឺកូវីដ-១៩ ​ជាពិសេសជំរុញឲ្យប្រជាពលរដ្ឋទាំងអស់ អញ្ជើញទៅទទួលវ៉ាក់សាំងបង្ការជំងឺកូវីដ-១៩ ឲ្យបានគ្រប់ៗគ្នាផងដែរ។

ជាមួយគ្នានេះ រដ្ឋមន្រី្តក្រសួងសុខាភិបាលឯកឧត្តម សាស្រ្តាចារ្យ ម៉ម ប៊ុនហេង ក៏បានណែនាំដល់​មនី្ទរសុខាភិបាលរាជធានី-ខេត្តទាំងអស់​ ត្រូវត្រៀមលក្ខណៈទុកជាមុន និងមានផែនការច្បាស់លាស់ សម្រាប់អន្តរាគមន៍ ​ត្រូវចាត់ចែងការផ្តល់សេវា ​និងកន្លែងសម្រាកព្យាបាលជំងឺគ្រុនឈាម នៅ​ក្នុងមនី្ទរ​ពេទ្យឲ្យបានល្អ និងត្រូវបញ្ជូនអ្នកជំងឺ​ទៅមនី្ទរពេទ្យផ្សេងទៀត ក្នុងករណីដែលមាន​ករណី​ជំងឺគ្រុនឈាមហួសសមត្ថភាពនៅក្នុងមនី្ទរពេទ្យណាមួយ ដោយមិនទុកឲ្យមានការយឺតយ៉ាវ​ក្នុងការ​ទទួល​បានសេវាពិនិត្យ ​និងព្យាបាលឡើយ៕អត្ថបទ រដ្ឋា