ភ្នំពេញ៖ រាជធានីភ្នំពេញ និងខេត្តចំនួន២ទៀត មានខេត្តពោធិ៍សាត់ និងខេត្តសៀមរាប បានទទួលនូវជ័យលាភី ក្នុងការអនុវត្តគម្រោងអភិវឌ្ឍន៍មូលដ្ឋាន មានការរីកចម្រើន និងបម្រើសេវាជូនប្រជាពលរដ្ឋឲ្យបានល្អ ។

ឯកឧត្តម ប៉ុក សុគន្ធណារ៉ា អគ្គលេខាធិការសមាគមក្រុមប្រឹក្សាថ្នាក់ក្រោមជាតិ បានមាន​ប្រសាសន៍​ថា សម្រាប់ជ័យលាភីលេខ១ ​បានទៅ​លើក្រុងពោធិ៍សាត់ ​អនុវត្តគម្រោងទំនប់​បង្ហៀរទឹកក្បាល​ហុង​ស្ទឹងពោធិ៍សាត់, លេខ២. បានទៅលើស្រុកបន្ទាយស្រី ខេត្តសៀមរាប អនុវត្តគម្រោងផ្ទះមួយ អំពូលភ្លើងមួយ និងលេខ៣. បានទៅលើសង្កាត់ទឹកល្អក់ទី១ ស្ថិតក្នុងខណ្ឌទួលគោក រាជធានីភ្នំពេញ អនុវត្តគម្រោង ហេដ្ឋារចនាសម្ព័ន្ធផ្លូវបេតុងសហគមន៍ភូមិ១៥-១៦ ។

ឯកឧត្តម បានបន្តថា ចំពោះកម្មវិធីពានរង្វាន់នេះ ត្រូវបានផ្សព្វផ្សាយ​យ៉ាង​ទូលំទូលាយ​ដើម្បីឲ្យគ្រប់​បណ្ដារាជធានីខេត្ត ​បានចូលរួមដាក់​គម្រោង​របស់ខ្លួន ​ដែលគិតថា​អនុវត្តបានល្អលើការបម្រើសេវា​ជូន​ពលរដ្ឋ ឬអភិវឌ្ឍន៍​មូលដ្ឋាន ធ្វើការប្រឡងប្រណាំង ​ហើយត្រូវបានជ្រើសយកគម្រោង​ដែល​អនុវត្ត​បានល្អ មកធ្វើបទបង្ហាញនៅរាជធានីភ្នំពេញ ​ហើយក៏បានរកឃើញ​នូវ​ជ័យលាភីទាំង៣នេះ ។

ឯកឧត្តម ប៉ុក សុគន្ធណារ៉ា បានបញ្ជាក់ថា គណៈកម្មការដែលវាយតម្លៃ ទៅលើជ័យលាភីនេះ មាន​ខាងក្រសួងមហាផ្ទៃ ក្រសួងរៀបចំដែន ​នគរូបនីយកម្ម ​និងសំណង ​សាលារាជធានី ដៃគូអភិវឌ្ឍន៍​នៅទីក្រុងប៉ារីស ​ប្រទេសបារាំង​ សមាគមអន្តរជាតិអភិបាលក្រុងប្រើប្រាស់ភាសាបារាំង និង​ភាគីមួយ​ចំនួនទៀត ។

ឯកឧត្តម ម៉ម សារិន ប្រធានសមាគម​ជាតិក្រុមប្រឹក្សារាជធានីខេត្ត និងជាប្រធានក្រុមប្រឹក្សា​រាជធានី​ភ្នំពេញ មានប្រសាសន៍ថា សមាគម​មានរៀបចំការធ្វើដំណើរទស្សនកិច្ចសិក្សាផ្លាស់ប្តូរ​បទពិសោធន៍​រវាងខេត្តជាប់ជ័យលាភី ​ទៅដល់បណ្ដាខេត្តផ្សេងៗ​ ដើម្បីដកស្រង់យកបទពិសោធ៍មកអនុវត្ត ទាក់ទង​នឹង​ការអភិវឌ្ឍ​តំបន់ប្រជុំជន​ ជាពិសេសពាក់ព័ន្ធ​នឹងការផ្ដល់សេវាជូន​ប្រជាពលរដ្ឋ​នៅ​ក្នុងមូលដ្ឋាន ។

ឯកឧត្តម បានរំពឹងថា ​គណៈប្រតិភូគ្រប់ខេត្ត នឹងដកស្រងយកបទពិសោធន៍ពីរាជធានីខេត្ត​ជ័យលាភី អនុវត្តន៍​តាមបណ្ដាខេត្តរៀងខ្លួន​ ឲ្យកាន់តែល្អប្រសើរ ៕ អត្ថបទ បាន សុខរិទ្ធិ