ភ្នំពេញ៖ នៅថ្ងៃទី២២ ខែមិថុនានេះ អង្គការUSAID របស់សហរដ្ឋអាមេរិច និងក្រសួងបរិស្ថាន បានប្រកាសអនុវត្តយុទ្ធនាការចាប់ផ្តើមការផ្លាស់ប្តូរឥរិយាបថសង្គម ដើម្បីកាត់បន្ថយការទិញ និងការហូបសាច់សត្វព្រៃនៅកម្ពុជា ។

ក្នុងឱកាសបើកយុទ្ធនាការនេះឯកឧត្តម នេត ភក្ត្រា រដ្ឋលេខាធិការក្រសួងបរិស្ថាន បានថ្លែងថា ក្រសួងបរិស្ថាន នឹងបង្កើនការអនុវត្តច្បាប់ចាប់ជនល្មើសបញ្ជូន​ទៅតុលាការ ករណីជនណា​ប្រព្រឹត្តបទល្មើសប៉ះពាល់ដល់បណ្តាសត្វព្រៃជិតផុត។

ឯកឧត្តម នេត ភក្ត្រា បានថ្លែងថា នៅឆ្នាំ២០២១កន្លងទៅ ក្រសួងបរិស្ថានបានបង្ក្រាប​បទល្មើស​សត្វព្រៃ បានចំនួន៨៦២១ករណី​ នៅក្នុងនោះមានបទល្មើសសត្វព្រៃប្រមាណ ៨០០ករណី បាន​បញ្ជូន​សំណុំរឿង​ទៅតុលាការ នៅក្នុងនោះ​ក៏មានបទល្មើសសំខាន់ៗ​នានាទៀត​ដែលត្រូវចាប់​បញ្ជូនទៅតុលាការផងដែរ ​ដូចជាបទល្មើសដឹកជញ្ជូនឈើខុសច្បាប់ ​កាប់បំផ្លាញឈើខុសច្បាប់ ការបរបាញ់សត្វខុសច្បាប់ និងការរុករានដីព្រៃខុសច្បាប់ជាដើម ។

ដើម្បីជម្រុញពលរដ្ឋនៅតំបន់ព្រៃបញ្ឈប់ ការកាប់ព្រៃ និងការបាញ់សត្វខុសច្បាប់ ឯកឧត្តម នេត ភក្ត្រា ក៏បានលើកឡើងដែរថា ក្រសួងបរិស្ថាន ​នឹងបង្កើនការអនុវត្តច្បាប់ បង្កើនការ​ល្បាតឃាត់ខ្លួន​ជនល្មើស ​ហើយក្រៅពីនេះ ​ក្រសួងក៏បង្កើនសកម្មភាពបង្កើតសេដ្ឋកិច្ច ​បង្កើតមុខរបរ នៅតាម​មូលដ្ឋាន កាត់បន្ថយការពឹង​អាស្រ័យ​លើធម្មជាតិ ​និងអប់រំផ្សព្វផ្សាយ បង្ហាញអំពីផលប៉ះពាល់​ពី​បញ្ហាដាក់អន្ទាក់​ និងការហូបសាច់សត្វព្រៃខុសច្បាប់ ជាដើម។

ឯកឧត្តម បញ្ជាក់ថា ក្រសួងបរិស្ថាន ក្នុងមួយឆ្នាំៗ បានចុះល្បាតប្រមូលអន្ទាក់ទាក់សត្វនៅ​ក្នុងព្រៃ​បានប្រមាណពី ៤ម៉ឺន ទៅ៦ម៉ឺនអន្ទាក់ ​ហើយឯកឧត្តម ​បានប៉ាន់ប្រមាណថា អន្ទាក់ដែល​ប្រមូលបាន​នោះ​គឺមានប្រមាណតែ២០%​ និងមាន៨០% ទៀត ដែលមន្ត្រីអនុវត្តច្បាប់​យើងបាន​នឹងកំពុងចុះល្បាតដើរប្រមូលជារៀងរាល់ថ្ងៃ។

ទោះយ៉ាងណាក៏ដោយ លោក រីឆាត ឈិន ប្រធាន​ការិយាល័យកំណើនសេដ្ឋកិច្ចប្រកប​ដោយ​ចីរភាព ទីភ្នាក់ងារជំនួយអាមេរិក​ USAID បានថ្លែងថា សត្វព្រៃ គឺជាផ្នែកមួយដ៏សំខាន់​នៃ​មរតកជាតិ​របស់ប្រទេសកម្ពុជា ​និងដើរតួនាទីយ៉ាងសំខាន់ក្នុងការធានាសេវាកម្មប្រព័ន្ធអេកូឡូស៊ី ដែលផ្តល់​អត្ថប្រយោជន៍ដល់ប្រជាជន និងសេដ្ឋកិច្ច។

លោក ក៏បានអំពាវនាវអោយគ្រប់ភាគីពាក់ព័ន្ធទាំងអស់ ចូលរួមសហការ ពង្រឹងការយល់ដឹង​ជា​សាធារណៈ ក្នុងគោលដៅ ផ្លាស់ប្ដូរឥរិយាបថ ​ដើម្បីការពារព្រៃឈើនិងសត្វព្រៃ តាម​រយៈការ​ផ្សព្វផ្សាយ​សារគន្លឹះសំខាន់ៗ ស្ដីពី ការកាត់បន្ថយតម្រូវការទិញ និងហូបសាច់សត្វព្រៃ ដើម្បី​ចូលរួម​ការពារព្រៃឈើនិងសត្វព្រៃ និងធានាចីរភាព​នៃជីវភាព​រស់នៅ​របស់សហគមន៍​៕ អត្ថបទ ស៊ុម សុខជា