ភ្នំពេញ៖ ជាថ្មីម្តងទៀត កងទ័ពបំរើការងារនៅក្រសួងការពារជាតិ នៅថ្ងៃទី ២២ខែមិថុនានេះ បន្តទៅចាក់វ៉ាក់សាំងដូសជំរុញទី៥ ដើម្បីបង្កើនអង់ទីគ័រទប់ទល់នឹងការវាយលុកពីជំងឺកូវីដ-១៩ និងធានាសុវត្ថិភាពបន្ថែមទៀត ក្នុងពេលបំពេញការងារ។

កងទ័ពដែលបានចូលចាក់វ៉ាក់សាំង ក្នុងមន្ទីរពេទ្យព្រះកេតុមាលា នៅថ្ងៃទី២២ ខែមិថុនានេះ បានប្រាប់BTVឱ្យដឹងថា បន្ទាប់ពីចាក់វ៉ាក់សាំងដូសជំរុញទី៥រួចរាល់ ​ជួយបង្កើនទំនុកចិត្ត និង​ធានាសុវត្ថិភាព​ បន្ថែមទៀតពេលបំពេញការងារ ​បើទោះបីបច្ចុប្បន្នស្ថានភាពជំងឺកូវីដ-១៩ នៅប្រទេសកម្ពុជា មានភាពល្អប្រសើរក្តី។

ក្រៅពីនេះ ពួកគេបានអគុណដល់ថ្នាក់ដឹកនាំក្រសួងការពារជាតិ និងជាពិសេសសម្តេចតេជោ ហ៊ុន សែន ​នាយករដ្ឋមន្រ្តី ​នៃព្រះរាជាណាចក្រកម្ពុជា ដែលបានស្វះស្វែងរកវ៉ាក់សាំង​ចាក់ជូន​ដល់កងទ័ព ​និងប្រជាពលរដ្ឋទាំងប្រទេសផងដែរ។

វេជ្ជបណ្ឌិត សេង ឈុន នាយករងមន្ទីពេទ្យព្រះកេតុមាលា​ បានឱ្យដឹងដែរថា ​បច្ចុប្បន្ន មន្ទីរពេទ្យ បន្តចាក់វ៉ាក់សាំងដូសមូលដ្ឋាន រហូតដល់ដូសជំរុញទី៥ជូនដល់កងទ័ព ​គ្រួសារកងទ័ព ​និងពលរដ្ឋ។ ក្រៅពីការងារចាក់វ៉ាក់សាំង មន្ទីរពេទ្យក៏មមាញឹកបញ្ចូលទិន្ន័យកាតចាក់វ៉ាក់សាំង​ ជូនពលរដ្ឋ ដែលធា្លប់ ​ចាក់វ៉ាក់សាំងកូវីដ-១៩ដូសមូលដ្ឋាន ​រៀបចំដោយក្រសួងការពារជាតិ​ ប៉ុន្តែដូសជំរុញ ពួកគេទៅចាក់ នៅទីតាំងដែលរៀបចំដោយក្រសួងសុខាភិបាលវិញ។

លោកវេជ្ជបណ្ឌិត បានក្រើនរំលឹកដល់កងទ័ព និងប្រជាពលរដ្ឋទូទៅ ដែលមិនទាន់ចាក់វ៉ាក់សាំង ត្រូវរួសរាន់ទៅទទួលការចាក់វ៉ាក់សាំងឲ្យបានគ្រប់ៗគ្នា។

ចាប់ពីតាំងពីថ្ងៃទី១ ខែវិច្ឆិកា ឆ្នាំ២០២១មក ប្រទេសកម្ពុជា បើកដំណើរការសេដ្ឋកិច្ចធម្មតា ជាមួយវត្ត​មាន​ជំងឺកូវីដ-១៩ ក្រោយពេលរាជរដ្ឋាភិបាលទទួលបានជោគជ័យ​លើ​នយោបាយ​ចាក់វ៉ាក់សាំង ស្រោចលើប្រជាពលរដ្ឋបានជាច្រើនលាននាក់។ ​បច្ចុប្បន្ន ​ការចាក់វ៉ាក់សាំងកូវីដ-១៩ ត្រូវរាជ​រដ្ឋាភិបាល បន្តចាត់ទុកជាយុទ្ធសាស្រ្តដ៏សំខាន់មួយ ដើម្បីធានានិរន្តរភាពការរស់​នៅធម្មតាជាមួយជំងឺនេះ ៕ អត្ថបទ៖ ទូច សោភ័ណ