​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​ថា ​ស្ថានភាព​នៅ​ជួរមុខ​នៅ​តំបន់​ភាគ​ខាងកើត​របស់​ប្រទេស ​គ្មាន​ការ​ផ្លាស់ប្ដូរ​គួរ​ឱ្យ​កត់សម្គាល់​នោះ​ទេ​កាលពី​ថ្ងៃ​អង្គារ​។

នៅ​ក្នុង​សុន្ទរកថា​ប្រចាំថ្ងៃ​លោក Zelenskyy និយាយថា កងទ័ព​អ៊ុយ​ក្រែ​ន​កំពុង​ពង្រឹង​ការការពារ​របស់​ខ្លួន​នៅ​ក្នុង​តំបន់ Luhansk ជា​កន្លែង​មាន​ស្ថានភាព​អាក្រក់​បំផុត ហើយ​កំពុងតែ​រុល​ទៅមុខ​នៅ​ក្នុង​តំបន់ Kherson ដែល​ត្រូវបាន​ដណ្តើម​កាន់កាប់​ដោយ​កងកម្លាំង​រុស្ស៊ី​។ លោក Zelenskyy និយាយ​ថា រុស្ស៊ី​កំពុង​បាញ់​ផ្លោង​លើ​ទីក្រុង Kharkiv និង​កំពុង​ដាក់​សម្ពាធ​ខ្លាំង​ក្នុងទិសដៅ​នៅ​តំបន់ Donetsk​។ ពួកគេ​បាន​បំផ្លាញ និង​សម្លាប់​ដើម្បី​បង្ហាញ​ដល់​មេបញ្ជាការ​របស់​ពួកគេ​ថា ​មិន​ឈរ​នៅ​មួយកន្លែង​នោះទេ​។ លោក​បាន​បញ្ជាក់​ជាថ្មី​ពី​ការ​អង្វរ​សុំ​របស់លោក​ ចំពោះ​អាវុធ​ពី​ប្រទេស​លោកខាងលិច​។ ជីវិត​របស់​មនុ​ស្ស​រាប់​ពាន់​នាក់​ពឹង​ផ្អែក​ដោយផ្ទាល់​ លើ​ល្បឿន​របស់​ដៃគូ​របស់​យើង លើ​ល្បឿននៃ​របៀប​ដែល​ពួកគេ​អនុវត្ត​ការសម្រេចចិត្ត​ដើម្បី​ជួយ​អ៊ុយ​ក្រែ​ន​។​

​លោក Zelenskyy កាលពី​ថ្ងៃ​អង្គារ​បានបង្ហាញ​ក្តី​សង្ឃឹមថា ដៃគូ​នានា​នឹង​រក្សា​ពាក្យសំដីរបស់​ពួកគេ និង​ជួយ​ដោះដូរ​អ្នក​ប្រយុទ្ធ​អង្គភាព Azov។ ថ្លែង​ក្នុង​សន្និសីទ​សារព័ត៌មាន​ជាមួយ​នាយករដ្ឋមន្ត្រី​លុច​សំបួរលោក Xavier Bettel ក្នុង​ទីក្រុង Kyiv លោក Zelenskyy បាន​និយាយថា ចំណាត់​ការ​នៃ​ការផ្លាស់ប្តូរ​អ្នកការពារ​នៅ​រោងចក្រ​ដែកថែប Azovstal នៅ​ទីក្រុង Mariupol កំពុង​ធ្វើឡើង​។ ប្រធានាធិបតី​អ៊ុយ​ក្រែ​ន​បានបង្ហាញ​ការព្រួយបារម្ភ​ ចំពោះ​ស្ថានភាព​សុខភាព របស់​អ្នកប្រយុទ្ធ​អ៊ុយ​ក្រែ​ន​ដែល​កំពុង​ជាប់ឃុំ​។ អ្វីដែល​កំពុង​កើតឡើង​ជាមួយ​ពួកគេ​នៅពេលនេះដោយមានរបួស និង​អ្វី​ដែលជា​ជំនួយ​ពួកគេ​កំពុង​ទទួលបាន យើង​មិន​បានដឹង​អំពី​វា​នោះទេ​។ លោក Zelenskyy និយាយថា រុស្ស៊ី​នឹងមិន​បញ្ឈប់​សង្គ្រាម​នៅ​អ៊ុយ​ក្រែ​ន​នោះទេ ហើយនឹង​ព្យាយាម​ឈ្លា​នពាន​បណ្តា​ប្រទេស​បាល់​ទិ​ក រួមទាំង​ប្រទេស​លី​ទុយ​អា​នី ដែល​បាន​រារាំង​ទីក្រុង​មូ​ស្គូ​មិន​ឲ្យ​ដឹកជញ្ជូនទំនិញ​មួយចំនួន​ តាមផ្លូវ​រថ​ភ្លើង​ទៅកាន់​ទីក្រុង Kaliningrad តំបន់​បាល់​ទិ​ករ​បស់​រុស្ស៊ី៕

អត្ថបទ៖ ប៊ុនថន