រុស្ស៊ី៖ ប្រធានសន្តិសុខរបស់រុស្ស៊ីកាលពីថ្ងៃអង្គារបាននិយាយថា ទីក្រុងមូស្គូនឹងឆ្លើយតបទៅនឹងការសម្រេចចិត្តរបស់ប្រទេសលីទុយអានី ក្នុងការហាមឃាត់ការឆ្លងកាត់ការដឹកជញ្ជូនទំនិញតាមរថភ្លើងពីប្រទេសរុស្ស៊ី ទៅកាន់តំបន់នៅសមុទ្របាល់ទិករបស់រុស្ស៊ី ហើយការឆ្លើយតបនេះនឹងផ្តល់ផលប៉ះពាល់អវិជ្ជមានខ្លាំងលើប្រជាជនលីទុយអានី ដោយបន្ថែមលើភាពតានតឹងដែលមានខ្ពស់រួចទៅហើយនៅក្នុងតំបន់។
ការហាមឃាត់លើទំនិញដែលស្ថិតនៅក្រោមការដាក់ទណ្ឌកម្មរបស់សហភាពអឺរ៉ុប ត្រូវបានប្រកាសដោយអាជ្ញាធរប្រទេសលីទុយអានីកាលពីដើមខែនេះ និងបានជំរុញឱ្យមានការខឹងសម្បារ និងការរិះគន់យ៉ាងចាស់ដៃពីទីក្រុងមូស្គូ ដោយវិមានក្រឹមឡាំងបានថ្កោលទោសទង្វើនេះថា ជាវិធានការមិនធ្លាប់មានពីមុនមក និងខុសច្បាប់។ លោក Nikolai Patrushev រដ្ឋមន្ត្រីដ៏មានឥទ្ធិពលរបស់ក្រុមប្រឹក្សាសន្តិសុខវិមានក្រឹមឡាំងបានទៅពិនិត្យតំបន់ Kaliningrad កាលពីថ្ងៃអង្គារ និងបានប្តេជ្ញាក្នុងអំឡុងពេលកិច្ចប្រជុំសន្តិសុខជាតិថា នឹងមានវិធានការលើបម្រាមនេះ។ រុស្ស៊ីច្បាស់ជានឹងឆ្លើយតបចំពោះសកម្មភាពបង្កជម្លោះបែបនេះ ហើយផលវិបាករបស់ពួកគេនឹងជះឥទ្ធិពលអវិជ្ជមានយ៉ាងខ្លាំងដល់ប្រជាជនលីទុយអានី។
រដ្ឋាភិបាលលីទុយអានីបានបញ្ជាក់ក្នុងសេចក្តីថ្លែងការណ៍ថា ការដឹកជញ្ជូនអ្នកដំណោះ និងទំនិញដែលមិនជាប់ទណ្ឌកម្មទៅ និងមកពីដែនដីតំបន់ Kaliningrad កាត់តាមប្រទេសលីទុយអានីនៅបន្តគ្មានការបង្អាក់នោះទេ ហើយបម្រាមលើការដឹកជញ្ជូនឆ្លងកាត់នៃទំនិញជាប់ទណ្ឌកម្ម គ្រាន់តែជាផ្នែកមួយនៃកញ្ចប់ទណ្ឌកម្មទី៤ នៃទណ្ឌកម្មរបស់សហភាពអឺរ៉ុបលើប្រទេសរុស្ស៊ី។ មន្ត្រីជាន់ខ្ពស់លីទុយអានីបានរិះគន់ប្រតិកម្មរបស់រុស្ស៊ី ចំពោះចំណាត់ការនេះថា ជាបំណងដោយវិមានក្រឹមឡាំងដើម្បីបំប៉ោងយុទ្ធនាការឃោសនា ដោយព្យាយាមបង្កើតរូបភាពនៃការបិទច្រក ដែលផ្តោតលើការប្រើប្រាស់ក្នុងស្រុក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
