​បាល់ទាត់៖ ​អតីត​ខ្សែប្រយុទ្ធ​ក្រុម​ជំរើសជាតិ​អា​ហ្ស​ង់​ទីន Carlos Tevez ត្រូវបានតែងតាំង​ជា​អ្នកចាត់ការ​នៃ​ក្លិប​បាល់ទាត់​អា​ហ្ស​ង់​ទីន Rosario Central នេះ​បើតាម​ការ​បញ្ជាប់​របស់​ក្លិប​កាលពី​ថ្ងៃ​អង្គារ​ម្សិលមិញ​។

​​អតីត​ខ្សែប្រយុទ្ធ​ក្រុម​បិសាច​ក្រហម Manchester United, Manchester City និង Juventus រូបនេះបាន​ចុះហត្ថលេខា​ដឹកនាំ​ក្លិប​បាល់ទាត់​នៅ​លី​គ​កំពូល​អា​ហ្ស​ង់​ទីន​មួយ​រយៈពេល ១២ខែដែលជា​ការងារ​ដំបូង​នៃ​អាជីព​ជា​គ្រូបង្វឹក​របស់ខ្លួន​។ ​បុរស​វ័យ ៣៨ឆ្នាំ​រូបនេះ​បានសំរេច​ចិត្ត​ចូលនិវត្តន៍​ពី​អាជីព​បាល់ទាត់​កាល​ដើមខែ​សីហា​នេះ បន្ទាប់ពី​ប្រកប​អាជីព​ជាមួយ​ក្លិប​ដើម Boca Junior ជា​លើក​ទី៣ ពោលគឺ Boca Junior ជា​ក្លិប​ដែល​គេ​បានចាប់ផ្តើម​អាជីព​តាំងពី ២០ឆ្នាំមុន​។ ​​Carlos Tevez ធ្លាប់​ប្រកប​បាល់ទាត់​អាជីព​ជាមួយ​ក្លិប​ជាច្រើន​ដូចជា Juventus, Corinthians, Shanghai Shenhua និង​ពីរលើក​ជាមួយ Boca Junior​។

​​ចំណែក​នៅ Premier League វិញ Carlos Tevez បានរួម​ចំណែក​យ៉ាងសំខាន់​ក្នុងការ​ជួយសង្គ្រោះ West Ham ពី​ការ​កាត់ចោល​កាលពី​ឆ្នាំ២០០៧ មុនពេល​ផ្លាស់​មកកាន់ Manchester United ឈ្នះ​ពាន Premier League ពីរលើក និង​បន្តទៅ Manchester City នៅ​ឆ្នាំ២០០៩ និង​ឈ្នះ​ពាន Premier League មួយ​លើក​នៅ​ឆ្នាំ២០១២​។ ​​សរុប​រួម​រយៈពេល ៧ឆ្នាំ​នៅ​ទឹកដី​អង់គ្លេស Tevez បង្ហាញខ្លួន​សរុប ២០២ប្រកួត​រកបាន ៨៤គ្រាប់​។ ​​Carlos Tevez ត្រូវបាន​កោះហៅ​ចូល​ក្រុម​ជំរើសជាតិ​អា​ហ្ស​ង់​ទីន​នៅ​ឆ្នាំ២០០៤ នៅពេល​អា​ហ្ស​ង់​ទីន​ជួប​អេ​ក្វា​ដ័​រ និង​សរុប​បង្ហាញខ្លួន​បាន ៧៦លើក ស៊ុត​បញ្ចូល​ទី​បាន ១៣គ្រាប់​៕

​អត្ថបទ​៖​នាង សុភា​វុ​ធ