ឧត្ដរមានជ័យ៖ មន្រ្តីអភិរក្សសំណង់បុរាណ នៃក្រសួងវប្បធម៌ និងវិចិត្រសិល្បៈ សហការ​ជាមួយ​មន្ទីរវប្បធម៌ ​និងវិចិត្រសិល្បៈខេត្តឧត្តរមានជ័យ បន្តគម្រោងជួសជុលកែ​លម្អរ​សោភណភាព​ស្ពានទ័ព ​ដែលរងការខូចខាតផ្នែកហេដ្ឋារចនាសម្ព័ន្ធនានា ​ឲ្យមានភាពល្អប្រសើរឡើង ។

លោក ហុង យឿន ប្រធានមន្ទីរវប្បធម៌ និងវិចិត្រសិល្បល្បៈ ខេត្តឧត្តរមានជ័យ​ បានឲ្យដឹងថា ស្ពានទ័ពនេះ ដែលស្ថិតនៅក្នុងភូមិសាស្រ្តឃុំជើងទៀន ​ស្រុកចុងកាល់ ត្រូវបានកសាងឡើង​ក្នុង​រាជព្រះបាទជ័យវរ្ម័នទី៧ ​ដែលមានបណ្តោយប្រវែង ១៥០ម៉ែត្រ ទទឹងប្រវែង១៦,៥០ម៉ែត្រ និងកម្ពស់ ១០ម៉ែត្រ ​ដែលកន្លងមក មានព្រៃដុះហ៊ុមព័ទ្ធ​ច្រើន ​មិនសូវមានអ្នកស្គាល់ប៉ុន្មាននោះទេ។

លោក បានបញ្ជាក់ថា ចំពោះការជួសជុលស្ពានទ័ព គឺជាផែនការគម្រោងរបស់ក្រសួង ដែលមាន​ក្រុមការងារ​នាយកដ្ឋានការពារអភិរក្សសំណង់បុរាណ​ជាអ្នកចុះសិក្សាធ្វើការជួសជុល សហការ​ជាមួយមន្រ្តីជំនាញខេត្ត/ស្រុក ដើម្បីឲ្យតំបន់នេះមានការទាក់ទាញទៅថ្ងៃខាងមុខ។

លោកស្រី ម៉ម វណ្ណារី ប្រធានការិយាល័យនាយកដ្ឋានការពារ និងអភិរក្សសំណង់បុរាណរបស់​ក្រសួង​វប្បធម៌ និងវិចិត្រសិល្បៈ ​បានបញ្ជាក់ថា នេះគឺជាគម្រោងលើកទី៧ហើយសម្រាប់​ក្រុមការងារ​អភិរក្ស​សំណង់បុរាណ។

លោកស្រី បានបន្តថា ចំពោះការជួសជុល គឺដោយសារតែថ្មផ្នែកខាងកើតមុខទឹកហូរ​ ត្រូវបានរលុះ ហើយ​ក្រុមការងារ បានជីកជុំវិញរណ្តៅជម្រៅដល់ទៅ ៤ម៉ែត្រចុះក្រោម ដើម្បីដាក់​ថ្មតាម​ជញ្ជាំង​ដែល​ពុកផុយ ​ដោយប្រើថ្មថ្មីប្រភេទថ្មបាយក្រៀម៕អត្ថបទ៖ ឃិន សារិទ្ធ