តាកែវ៖ ក្នុងរយៈពេលប៉ុន្មានថ្ងៃកន្លងមកនេះ កំលាំងអាវុធហត្ថខេត្តតាកែវ ទទួលបទបញ្ជាពីលោក ឯក ឆេងហ៊ួត ព្រះរាជអាជ្ញាខេត្តតាកែវថ្មី ចុះបង្ក្រាបទីតាំងល្បែងខុសច្បាប់ នឹងចាប់ខ្លួនអ្នកញៀន​ល្បែងចំនួន១៣នាក់ បញ្ជូនទៅតុលាការចាត់ការតាមនីតិវិធីនៃច្បាប់ ។

លោក ង៉ែត ចន្ធី មេបញ្ជាការរងកងរាជអាវុធហត្ថខេត្តតាកែវ ដែលបានដឹកនាំកំលាំង​ចុះទៅចាប់អ្នក​ញៀនល្បែងដល់ទីតាំងល្បែងនៅតាមបណ្ដាលស្រុកមួយចំនួននៅក្នុងខេត្តតាកែវ បានថ្លែងប្រាប់ទូរទស្សន៍BTV ឱ្យដឹងថា កម្លាំង​កងរាជអាវុធហត្ថ​របស់មន្ទីរស្រាវជ្រាវ និងបង្ក្រាប​បទល្មើសខេត្តតាកែវ ​ចំនួន ១៦នាក់ ដោយមានការដឹកនាំសម្របសម្រួលនីតិវិធីពីលោក ស្រ៊ីវ គឹមស្រស់ ព្រះរាជអាជ្ញារងខេត្តតាកែវ ចុះបង្ក្រាបទីតាំង​ជល់មាន់​ភ្នាល់ដាក់​ប្រាក់​ខុសច្បាប់​តាម​ទូរទស្សន៍អនឡាញ នៅតាមបណ្ដាលស្រុកមួយចំនួនក្នុងខេត្តតាកែវ ដោយបានធ្វើការឃាត់​ខ្លួន​មនុស្ស​ចំនួនជាង១០នាក់ បញ្ជូន​ទៅកាន់តុលាការ ដើម្បីចាត់ការទៅតាមច្បាប់។

លោក ឯក ឆេងហ៊ួត បានថ្លែងប្រាប់​ទូរទស្សន៍ប៊ីធីវី ថា មនុស្សទាំង១៣នាក់​ដែលសម្ថកិច្ច​បានចាប់​បញ្ជូន​មក​អយ្យការ ត្រូវ​បាន​លោក​ចោទ​ប្រកាន់​ពី​បទ​លេងល្បែងស៊ីសង ​ហើយបាន​បញ្ជូន​ទៅ​ចៅក្រមស៊ើបសួរ ដើម្បីចាត់ការទៅតាមច្បាប់»។

ពាក់ព័ន្ធ​នឹងសំណុំរឿងនេះ លោក អ៊ាក ផល្លា ប្រធានសាលាដំបូងខេត្តតាកែវ បានថ្លែងឱ្យដឹងថា លោកមិនទាន់​បាន​ឃើញ​សំណុំរឿង​អ្នកលេងល្បែង​ស៊ីសង​ខុសច្បាប់​នេះ​បញ្ជូន​មកចៅក្រម​នៅឡើយទេ ។

បើយោងតាមប្រភពពីបងប្អូនប្រជាពលរដ្ឋនៅក្នុងខេត្តតាកែវ ខេត្តតាកែវ នាពេលបច្ចុប្បន្ននេះ កំពុងតែល្បីល្បាញរឿងលេងល្បែងស៊ីសងខុសច្បាប់ នៅតាមបណ្ដាលក្រុងស្រុកទាំង១០ ជាពិសេសនៅក្នុងស្រុកបាទី ​ស្រុកគីរីវង់ ​ស្រុកត្រាំកក់ និងក្រុងដូនកែវ។

ទីតាំងល្បែងជល់មាន់តាមអនឡាញ និងល្បែងឡូតូ ​ឆ្នោតវៀតណាម ​បានបើកយ៉ាងរំភើយ​ដោយ​គ្មាន​ការរំខានពីអាជ្ញាធរ​ និងសមត្ថកិច្ចមូលដ្ឋាន ​ជាពិសេសសមត្ថកិច្ចនគបាល​គឺ​បណ្ដាល​មកពីមន្រ្តីទាំងអស់នោះ បានទទួលសំណែនក្រាស់ក្រែល​ពីមេល្បែងស៊ីសង ។

ក្រុមប្រជាពលរដ្ឋក្នុងខេត្តតាកែវ បានសំណូមពរដល់លោកព្រះរាជអាជ្ញាខេត្តតាកែវថ្មី ឯក ឆេងហ៊ួត ដែលទើបនឹងផ្លាស់មកពីខេត្តកំពត ហើយ​ដែល​មានស្នាដៃល្អកន្លងមក​ នឹងធ្វើការបង្រ្កាបក្រុម​លេងល្បែងស៊ីសងខុសច្បាប់នេះ ដោយគ្មានប្រណី ជា​ពិសេសកាស៊ីណូ​នៅភ្នំដិន ​ដែល​បើកលេងជល់មាន់​ យ៉ាងចំហ និងមេល្បែង​ដុះស្នឹមដ៏ធំ​នៅក្នុងស្រុកត្រាំកក់ «អង់តាសោម» ដែលមានបងប្រុសជាស្នងការរង​ធ្វើជាខ្នងបង្អែក៕