ព្រះសីហនុ៖ ដើម្បីកែលម្អសោភ័ណភាពទីក្រុង រដ្ឋបាលខេត្ដ បានកសាងរូបសំណាកដែលជានិមិត្ដសញ្ញាតំណាងខេត្ដ និងរូបសំណាកតំណាងវប្បធម៌ប្រពៃណីប្រវត្ដិសាស្ដ្រ សម្រាប់ទាក់ទាញភ្ញៀវទេសចរ និងប្រជាពលរដ្ឋថតរូបលម្ហែកម្សាន្ដ។

ការដ្ឋានអ៊ុតកៅស៊ូ AC ស្រទាប់ទីមួយ នៃរង្វង់មូលសីហរាជមុខបី ស្ថិតនៅសង្កាត់លេខ១ ក្រុង-ខេត្តព្រះសីហនុ បាននឹងកំពុងដំណើរការ ដើម្បីឈានទៅរកការបញ្ចប់ និងបើកបើកឱ្យធ្វើចរាចរ​សាកល្បង នៅថ្ងៃទី២៥ ខែមិថុនានេះ។

ឯកឧត្តម គួច ចំរើន អភិបាលខេត្តព្រះសីហនុ បានឱ្យដឹងថា ការកែលម្អសួនច្បារ​នៅរង្វង់មូល​សីហរាជមុខបី ឱ្យកាន់តែមានសោភ័ណភាពបន្ថែមទៀត ​ដើម្បីបម្រើដល់វិស័យទេសចរណ៍ ខណៈប្រជាពលរដ្ឋ ​ក៏ដូចជាភ្ញៀវទេសចរ ​អាចទៅ ​ទស្សនាលេងកម្សាន្ត និងថតផ្តិតយករូបភាព​ផ្ទៃសមុទ្របានថែមទៀតផង។

ឯកឧត្តម បានសំណូមពរប្រជាពលរដ្ឋ ក៏ដូចជាភ្ញៀវទេសចរ​ ចូលរួមថែរក្សាអនាម័យ បរិស្ថាន នៅរង្វង់មូលសួនច្បារសីហរាជមុខបីឱ្យបានល្អ។

ខេត្ដព្រះសីហនុ មានរូបសំណាកវប្បធម៌ជាច្រើន ​ដូចជារូបសំណាក ​រង្វង់មូលតោពីរ (និមិត្ដសញ្ញាខេត្ដព្រះសីហនុ) រូបសំណាកព្រះអង្គធំ (ព្រះពុទ្ធប្រក់នាគ) រង្វង់មូលត្រីដូហ្វីន រង្វង់មូល​ព្រះសេវព្រះនាងអោម៉ា រង្វង់មូលសម្ដេចសង្ឃ រាជទេពវង្ស រង្វង់មូលព្រះថោងនាងនាគ និងរង្វង់មូលសីហរាជមុខបី ។ល។ ដែលក្នុងចំណោមរូបសំណាកទាំងអស់នោះ រូបសំណាកតោពីរ និងរូបសំណាកព្រះថោងនាងនាគ ទទួលបានការទាក់ទាញខ្លាំងជាងគេ៕អត្ថបទ៖ គង់ ប៊ុនថា