ភ្នំពេញ៖ ឱកាសការងារជាងបីពាន់កន្លែង តាមក្រុមហ៊ុនឯកជន ផ្តល់ជូនយុវជន និងសិស្សនិសិត្ស ដែលកំពុងរកការងារធ្វើ នៅក្នុងពិព័រណ៌ការងាររយៈពេលពីរថ្ងៃ ដែលចាប់បើកដំណើការពីថ្ងៃទី២៣ ខែមិថុនានេះ នៅរាជធានីភ្នំពេញ។

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំ​ពិព័រណ៍ការងារខ្នាតមធ្យម នៅអគារ កាំពុ ជិតស្ពានអាកាសក្បាលថ្នល់ ដែលមានក្រុមហ៊ុន​ចូលរួម​ចំនួន ២៣ និងបង្ហាញពីតម្រូវការកម្លាំងពលកម្មសរុបជាង ៣ពាន់កន្លែង នៅថ្ងៃទី២៣ និង២៤ ខែមិថុនា ឆ្នាំ២០២២នេះ ក្រោមកិច្ចសហការជាមួយសហភាពសហព័ន្ធយុវជនកម្ពុជា រាជធានី​ភ្នំពេញ និងឧបត្ថម្ភ​គាំទ្រដោយអង្គការអន្តរជាតិខាងការងារ។

នៅក្នុងពិធីបើកវិធីពិព័រណ៌ការងារ នៅព្រឹកថ្ងៃទី២៣ ខែមិថុនានេះ ឯកឧត្តម ហៃ ហ៊ុនឡេង ប្រតិភូរាជរដ្ឋាភិបាលទទួលបន្ទុកជាប្រធានទីភ្នាក់ងារជាតិមុខរបរ និងការងារបានមានប្រសាសន៍ថា ព្រឹត្តិការណ៍នេះ គឺជា​ចរន្តដ៏សំខាន់មួយដែលទីផ្សារការងារបាន​ចាប់ផ្តើមស្រូបយកកម្លាំង​ពលកម្ម​ជាថ្មីឡើងវិញ ​បន្ទាប់ពីការរីករាលដាលនៃជំងឺកូវីដ-១៩ និងកាន់តែមានសន្ទុះវិជ្ជមានប្រកប​ដោយ​សក្តានុពល។

កម្មវិធីនេះ រៀបចំឡើងក្នុងគោលបំណងដើម្បីជួបជុំគ្នាដោយងាយស្រួលនៅមួយកន្លែង រវាង​ភាគី​និយោជក អ្នកផ្តល់ការអប់រំបណ្ដុះបណ្ដាល​ និងអ្នកស្វែងរកការងារ ដើម្បីផ្សព្វផ្សាយព័ត៌មាន​ឱកាស​ការងារ តាមរយៈការដាក់ពាក្យស្នើសុំការងារ ​និងព័ត៌មានស្តីពីការបណ្តុះបណ្តាលជំនាញ ព្រមទាំង​សិក្ខាសាលាចែករំលែកបទពិសោធន៍​ ការប្រឹក្សា​យោលបល់ការងារ អាជីព ​និង​ត្រៀមខ្លួន​ចូល​ការងារ ដោយវាគ្មិនដែលមានបទពិសោធន៍ជ្រាលជ្រៅក្នុងទីផ្សារការងារ។

លោក ហួត ថារ៉ា ប្រធានផ្នែកបណ្តុះបណ្តាលធនធានមនុស្ស នៃធនាគារ កាណាឌីយ៉ា ក.អ និងលោក កែវ លីវណ្ណ ប្រធានផ្នែកធនធានមនុស្ស នៃក្រុមហ៊ុនធនារ៉ាប់រង ដាយ អ៊ិឈិ បានលើកឡើងថា ឱការងារជាច្រើនមុខតំណែងបានផ្តល់ជូន​ ក្នុងពិព័រណ៌ការងារនះ ទៅ​កាន់អ្នកស្វែងរកការងារ។

ក្រុមហ៊ុនសង្ឃឹមថា តាមរយៈពិព័រណ៌នេះ នឹងទទួលបានយុវជន​តាមរយៈការដាក់ពាក្យ​ចូល​បំពេញ​ការងារ​ ជាដើម្បីបំពេញមុខដំណែងដែលក្រុមហ៊ុនកំពុងជ្រើសរើស។

នៅថ្ងៃដំបូងនៃពិព័រណ៍ការងារនេះ មានយុវជន និងសិស្សនិសិត្ស ជាច្រើនកុះករ ចូលរួម ស្វែងយល់ សាកសួរព័ត៌មាន ​និងដាក់ពាក្យបម្រើការងារ ​នៅតាមបញ្ជរក្រុមហ៊ុនក្នុងពិព័រណ៌។

ក្រុមយុវជនដែលជានិស្សិតមកពីសាលាផ្សេងៗគ្នា ​បាននិយាយថា កម្មវិធីនេះពិតជា​មាន​សារៈសំខាន់​ណាស់ ​និងអត្ថប្រយោជន៍​ជាច្រើនក្នុងការចូលរួម ​ពោលក្រៅពីការតាំងបង្ហាញការងារ ពួកគេ​នឹងអាចទទួលបាននូវចំណេះដឹង ​និងបទពិសោធន៍ ​អំពីការត្រៀមខ្លួនចូលការងារ និង​សហគ្រិនភាពរបស់វាគ្មិនល្អៗ​ដែលមានបទពិសោជន៍ក្នុងទីផ្សារការងារ។

សូមបញ្ជាក់ថា ព្រឹត្តិការណ៍នេះ គឺជាចរន្តដ៏សំខាន់មួយដែលទីផ្សារការងារបាន​ចាប់ផ្តើមស្រូបយក​កម្លាំង​ពលកម្មជាថ្មីឡើងវិញ បន្ទាប់ពីការរីករាលដាលនៃជំងឺកូវីដ-១៩ និងកាន់​តែមានសន្ទុះវិជ្ជមាន​ប្រកប​ដោយសក្តានុពល៕ អត្ថបទ ឈិត បូរ៉ាវី