ភ្នំពេញ៖ ប្រភេទបារីអេឡិចត្រូនិច ដែលមានការយល់ច្រឡំជាឧបករណ៍ ផ្ដាច់បារី ការពិតទៅគឺ​មានផ្ទុក​នូវសារធាតុញៀន និងផ្ទុកទាំងសារធាតុដែលចូលទៅបំផ្លាញការលូតលាស់របស់ខួរក្បាល និងបំផ្លាញដល់សួតផងដែរ។ នេះជាការបញ្ជាក់របស់វេជ្ជបណ្ឌិតជំនាញនៃអង្គការចលនា​ដើម្បី​សុខភាពកម្ពុជា។

បារីអេឡិចត្រូនិច បានក្លាយជាប្រធានបទមានការចាប់អារម្មណ៍ខ្លាំង មួយរយៈពេលចុង​ក្រោយ​នេះ។ ពាក់ព័ន្ធនឹងបញ្ហាបារីអេឡិចត្រូនិចនេះ ​លោកវេជ្ជបណ្ឌិត មុំ គង់ ជានាយកប្រតិបត្តិនៃអង្គការ​ចលនាដើម្បីសុខភាពកម្ពុជា លើកឡើងថា ការប្រើប្រាស់បារីអេឡិចត្រូនិក គ្រប់ប្រភេទគឺសុទ្ធ​តែ​ប៉ះពាល់​បំផ្លាញដល់សុខភាព។

លោកវេជ្ជបណ្ឌិតបញ្ជាក់ថា បារីអេឡិចត្រូនិចផ្ទុកនូវសារធាតុញៀន នីកូទីន និងមានផ្ទុកនូវ​សារធាតុ​ជាច្រើន​ផ្សេងទៀត ដែលប៉ះពាល់សរីរាង្គសំខាន់ៗ ក្នុងសារពាង្គកាយ អ្នកប្រើប្រាស់។ ផល​ប៉ះពាល់​សំខាន់គឺ ប៉ះពាល់ដល់ការលូតលាស់វិវត្តរបស់ខួរក្បាល​ និងប៉ះពាល់បំផ្លាញដល់សួត។

ក្នុងនាមជាអ្នកជំនាញមួយរូប លោកវេជ្ជបណ្ឌិតអំពាវនាវ​ឱ្យគណៈគ្រប់គ្រងសាលារៀន និងអាណា​ព្យាបាល​ត្រូវតាមដានសិស្សនិងកូន​ ចំពោះបញ្ហានេះ។ ក្នុងករណីរកឃើញត្រូវសហការជាមួយ សមត្ថកិច្ច​ដើម្បីដល់ការចុះទៅបិទទីតាំងលក់ ​បារីអេឡិចត្រូនិចទាំងនោះ។

បច្ចុប្បន្នសមត្ថកិច្ចជំនាញក៏កំពុងធ្វើការស្វែងរក ​ដើម្បីឈានដល់ការទប់ស្កាត់ការប្រើប្រាស់ និង​បញ្ឈប់​ការធ្វើអាជីវកម្មផងដែរ។ ​ជាក់ស្ដែងមន្ទីរប្រឆាំង​គ្រឿងញៀន ​ក៏បានចាត់តាំងកម្លាំងជំនាញ​ចុះទៅ​ជ្រាវស្រាវដល់ទីតាំងដែលមានការលក់ដូរ ​និងអ្នកទិញប្រើប្រាស់បារីអេឡិចត្រូនិក (E-Cigarette) ។ នៅពេលសមត្ថកិច្ចចុះទៅស្រាវជ្រាវតាមជំនាញ​ គឺមិនឃើញមានធ្វើសកម្មនោះទេ ដោយសារ​មុខសញ្ញាបានឃើញការផ្សព្វផ្សាយព័ត៌មាន​តាមបណ្ដាញសង្គមជាមុន។

មន្ទីរប្រឆាំងគ្រឿងញៀន​សំណូមពរទៅប្រជាពលរដ្ឋផ្ដល់ដំណឹងជា​សម្ងាត់​ តាម​រយៈលេខទូរស័ព្ទ 011248888(Mobitel), 015222226 (Smart), 066661661(Metfone) ឬ ប្រអប់សំបុត្រអេឡិចត្រូនិច (E-Box) Page: Anti-drug Department។

ពាក់ព័ន្ធនឹងការប្រើប្រាស់បារីអេឡិចត្រូនិច​ ក្រសួងអប់រំ យុវជន និងកីឡា កាលពីឆ្នាំ ២០២១ កន្លងទៅ ក្រសួងបានចេញសេចក្ដីណែនាំហាម​មិនឱ្យគ្រឹះស្ថានសិក្សាសាធារណៈ ​និងឯកជន ចាប់ដៃគូសហការជាមួយ​ឧស្សាហករថ្នាំជក់ ​ទទួលការ​ឧបត្ថម្ភគាំទ្រ ឬចុះអនុស្សរណៈយោគយល់​គ្នាជាមួយឧស្សាហករថ្នាំជក់​ ផ្ដល់ទីកន្លែង ​ឬទីធ្លាគ្រឹះស្ថានសិក្សាសាធារណៈ​ និងឯកជន សម្រាប់រៀបចំកម្មវិធីផ្សព្វផ្សាយ​ ឬពិព័រណ៍​ដែលជាកម្មវិធីរបស់ឧស្សាហកម្មថ្នាំជក់ និងត្រូវចូល​រួម​លុប​បំបាត់សកម្មភាពប្រើប្រាស់ផលិតផលថ្នាំជក់តាមគ្រប់រូបភាព។

កន្លងទៅអាជ្ញាធរជាតិប្រយុទ្ធប្រឆាំងគ្រឿងញៀន ​បានចេញសេចក្តីណែនាំ លេខ ០០១/១៤ ស.ណ.ន ចុះថ្ងៃទី២៥ ខែកុម្ភៈ ឆ្នាំ២០១៤ ស្តីពីការចាត់វិធានការ​ បង្ការ បញ្ឃប់​ការប្រើប្រាស់ ការ​ធ្វើអាជីកម្ម និងការនាំចូលផលិតស៊ីហ្សា (SISHA) ​និងបារីអេឡិចត្រូនិក (E-Cigarette) នៅព្រះរាជណាចក្រកម្ពុជា ៕ អត្ថបទ៖ គឹមហុក