ភ្នំពេញ៖ ដើម្បីរួមចំណែកក្នុងការសម្រេចគោលដៅយុទ្ធសាស្រ្ត របស់រាជរដ្ឋាភិបាល ក្រសួងសុខាភិបាល បាននិងកំពុងអនុវត្តយុទ្ធសាស្រ្តសុខាភិបាល​ ដែលមានសង្គតិភាពជាមួយ​នឹងយុទ្ធសាស្រ្តចតុកោណ ​តាមរយៈពង្រឹងការគ្រប់គ្រងប្រព័ន្ធសុខាភិបាល ជាពិសេសការលើកកម្ពស់ ការផ្តល់សេវាថែទាំសុខភាពមានគុណភាព សុវតិ្ថភាព ប្រសិទ្ធភាព និងប្រកបដោយសមធម៌ ​ជូនប្រជាពលរដ្ឋកម្ពុជា នៅក្នុងគ្រប់ភូមិសាស្រ្តទូទាំងប្រទេស ដោយមិនគិតពីលក្ខខ័ណ្ឌសេដ្ឋកិច្ច និងសង្គមកិច្ច។

រដ្ឋមន្រី្តក្រសួងសុខាភិបាល ឯកឧត្តម សាស្រ្តាចារ្យ ម៉ម ប៊ុនហេង បានបញ្ជាក់ថា ក្រសួងសុខា​ភិបាល កំពុងពង្រីកការគ្របដណ្តប់ និងលើកកម្ពស់គុណភាពសេវា នៅក្នុងគ្រប់ភូមិសាស្រ្តទូទាំង​ប្រទេស ក្នុងនោះ ក្រសួង បានពង្រីក និងសាងសង់មនី្ទរពេទ្យ ដូចជានៅខេត្តរតនគិរី មណ្ឌលគិរី ប៉ៃលិន ឧត្តរមានជ័យ សៀមរាប ប៉ៃលិន និងខេត្តត្បូងឃ្មុំ ព្រមទាំងការពង្រីក​មណ្ឌលសុខភាព​បន្ថែមទៀត ដែលជាការពង្រីកនូវការថែទាំសុខភាពបឋមជូនដល់ប្រជាពលរដ្ឋ ព្រោះថា​ការថែទាំ​សុខភាពបឋម គឺសំខាន់ខ្លាំងណាស់ ​បានជួយធ្វើឲ្យអត្រាមរណៈភាពមាតា ទារក និងកុមារ បានធ្លាក់ចុះ គួរឲ្យកត់សម្គាល់។

ជាពិសេសដោយយោងតាមលទ្ធផលបឋម នៃការអង្កេតប្រជាសាស្ត្រ ​និងសុខភាពកម្ពុជា ឆ្នាំ​២០២១-២០២២ ប្រៀបធៀប នឹងលទ្ធផលនៃការអង្កេតប្រជាសាស្ត្រ ​និងសុខភាពកម្ពុជា ឆ្នាំ២០១៤ គឺអត្រាមរណភាពមាតា ​ទារក និងកុមារ បានបន្តធ្លាក់ចុះថែមទៀត រវាងឆ្នាំ២០១៤ និងឆ្នាំ២០២១-២០២២។

ឯកឧត្តម រដ្ឋមន្រី្ត បានសង្កត់ធ្ងន់ថា អាទិភាពឆ្នាំ២០២២ និងឆ្នាំបន្ត ក្រសួងសុខាភិបាល បន្តពង្រីក​ហេដ្ឋា​រចនាសម្ព័ន្ធរូបវន្តមនី្ទរពេទ្យបង្អែក មណ្ឌលសុខភាព និងបន្ទប់រង់ចាំសំរាប់សំរាលកូន បង្កើន​ការបំពាក់ ឧបករណ៍បរិក្ខារពេទ្យ និងបច្ចេកវិទ្យាទំនើប ​នៅមនី្ទរពេទ្យបង្អែកថ្នាក់ខេត្ត និងថ្នាក់ស្រុក​ប្រតិបតិ្តទៅតាមកម្រិតធនធានដែលមាន ​និងបង្កើនការផ្គត់ផ្គង់បណ្តាញ ​ឬប្រភពទឹកស្អាត និង​អគ្គិសនី ​ជាពិសេសនៅក្នុងមូលដ្ឋានសុខាភិបាលក្នុងតំបន់ជនបទ ​ដើម្បីផ្តល់សេវាមានគុណភាព លើកកម្ពស់បរិស្ថានអនាម័យល្អ និងរក្សាសុវតិ្ថភាព អ្នកជំងឺ និងបុគ្គលិកសុខាភិបាល ព្រមទាំង​ពង្រីកហេដ្ឋារចនាសម្ព័ន្ធព័ត៌មានវិទ្យា ​ការប្រាស្រ័យទាក់ទង ​និងបច្ចេកវិទ្យា ដោយរាប់​បញ្ចូល​ទាំងផ្នែករឹង និងផ្នែកទន់ និងផ្តល់ការបណ្តុះបណ្តាលគ្រប់គ្រាន់ស្តីពីការប្រើប្រាស់ ICT ៕

អត្ថបទ រដ្ឋា