​​អ៊ុយ​ក្រែ​ន​៖ កងកម្លាំង​អ៊ុយ​ក្រែ​ន​បាន​ជីក​រូង​ដី​សម្រាប់​ជា​កន្លែង​ការពារ​ចុងក្រោយ ​ទប់ទល់​នឹង​ការ​វាយ​រុល​ទៅ​មុខ​របស់​ទាហាន​រុស្ស៊ី​កាលពី​ថ្ងៃ​ពុធនៅ​ក្នុង​ខេត្ត Luhansk ជា​កន្លែង​ដែល​កងកម្លាំង​រុស្ស៊ី​ឥឡូវនេះ​គំរាម​វាយលុក​ទីក្រុង​ធំៗចំនួន​ ២ ​ដែល​កំពុង​ត្រូវ​បាន​រារាំង​ដោយ​កងកម្លាំង​អ៊ុយ​ក្រែ​ន​។

​ការ​រំពឹង​ទុក​របស់​រុស្ស៊ី​ថា​ នឹង​បាន​គ្រប់គ្រង​ទីក្រុង​ដែល​កំពុង​ក្លាយ​ជា​សមរភូមិ​ប្រយុទ្ធ​ដ៏​ក្ដៅ​គគុក Sievierodonetsk និង Lysychansk បាន​ធ្វើ​ឱ្យ​មេបញ្ជាការ​អ៊ុយ​ក្រែ​ន​មាន​ជម្រើស​យ៉ាង​មុតមាំ​ក្នុង​ការ​ស្នាក់នៅ និង​ប្រយុទ្ធដោយ​ប្រថុយប្រថាន​នឹង​ការ​កាត់ផ្ដាច់​ខ្សែត្រៀម​ផ្គត់ផ្គង់ និង​ការឡោមព័ទ្ធ​ក្រុម​អ្នកការពារ​រាប់​ពាន់​នាក់ ឬ​ដកថយ និង​បាត់បង់​មជ្ឈមណ្ឌល​ទីក្រុង​សំខាន់ៗ​ចុងក្រោយ​នៅ​ខេត្ត Luhansk។ ដែល​ជា​ផ្នែក​មួយ​នៃ​តំបន់ Donbas ភាគ​ខាងកើត​អ៊ុយ​ក្រែ​ន​។ ​អភិបាល​តំបន់ Luhansk លោក Serhiy Haidai បាន​ទទួល​ស្គាល់​ថា អស់​ជាច្រើន​សប្តាហ៍​មក​ហើយដែល​ទាហាន​រុស្ស៊ី​មានប្រៀប​ឈ្នះ និង​បាញ់​ស្រោច​កាំភ្លើង​ធំ និង​គ្រាប់​រ៉ូ​កែ​តទៅ​លើ​កងកម្លាំង​អ៊ុយ​ក្រែ​ន មុន​ពេល​ព្យាយាម​រុល​ទៅ​មុខ​ដោយ​រថក្រោះ និង​កងទ័ព​ថ្មើរជើង​។

យុទ្ធសាស្ត្រ​នេះ​បាន​ឈាន​ដល់​របកគំហើញ​មួយ​កាលពី​ថ្ងៃ​ពុធ ខណៈ​កងកម្លាំង​រុស្ស៊ី​បាន​ដណ្តើម​យក​ភូមិ​យុទ្ធសាស្ត្រ​ចំនួន​បី​គឺ​ភូមិ Mirna Dolina, Podlisne​ និង​ភូមិ Toshkivka។ នោះ​អាច​ជា​ការ​បើកផ្លូវ​ឲ្យ​កងទ័ព​រុស្ស៊ី​វាយ​ដណ្ដើម​យក​ខេត្ត Luhansk និង​ខេត្ត​ជាប់​នោះគឺ​ខេត្ត Donetsk ដែល​ខេត្ត​ទាំង​២​ ស្ថិត​ក្នុង​តំបន់​មួយ​ត្រូវ​គេ​ស្គាល់​ថា​ជា​តំបន់ Donbas៕

អត្ថបទ៖ សុខមាន