ភ្នំពេញ៖ នគរបាលខណ្ឌចំការមន សហការជាមួយនគរនបាលខណ្ឌដូនពេញ និងនគរបាលនាយកដ្ឋានព្រហ្មទណ្ឌ អនុវត្តតាមបញ្ជារបស់ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ចេញប្រតិបត្តិការបង្រ្កាបជនសង្ស័យជនជាតិចិនចំនួន ១៤នាក់ ប្រើប្រាស់កាំភ្លើងខ្លី និងកាំបិតជំរិតទារប្រាក់ជនរងគ្រោះជនជាតិចិន ៣ម៉ឺនដុល្លារ នៅខណ្ឌចំការមន រាជធានីភ្នំពេញ។

ការបង្រ្កាបចាប់ខ្លួនជនសង្ស័យជនជាតិចិនទាំងនោះ បានធ្វើកាលពីយប់ថ្ងៃទី២៥ ខែមីនា ឆ្នាំ២០២១ នៅចំណុចទីតាំងHOTEL POSITANO ស្ថិតនៅភូមិ៦ សង្កាត់ផ្សារកណ្តាល១ ខណ្ឌដូនពេញ រាជធានីភ្នំពេញ។

បើតាមសេចក្តីរាយការណ៍ពីកម្លាំងនគរបាលខណ្ឌចំការមន ដែលចុះប្រតិបត្តិការណ៍ឱ្យដឹងថា ក្នុងចំណោមជនសង្ស័យទាំង ១៤នាក់នោះ មាន ០៤នាក់ជាមេខ្លោងនៃការចាប់ជំរិតទារប្រាក់ពីជនរងគ្រោះ ដោយឡែក ១០នាក់ទៀត ជាជនជាប់ពាក់ព័ន្ធក្នុងសកម្មភាពប្រព្រឹត្តបទល្មើសនេះ។

ក្នុងនោះ ដកហូតនូវវត្ថុតាងរួមមាន៖ រថយន្ត០១គ្រឿងម៉ាកស្តារិច ពណ៌ខ្មៅ,កូនកាំបិតបត់ចំនួន០៤ដើម,ខ្នោះដៃចំនួន ០៤ខ្នោះ,ដំបងឆក់ចំនួន ០១ដើម,ដំបងដែករលាស់ ០២ដើម,សម្លៀកបំពាក់ផ្លាស្ទិកពណ៌សចំនួន ០១កំប្លេ។

សូមរំលឹកថា កាលពីថ្ងៃទី២០ ខែមីនា ឆ្នាំ២០២១ មានជនរងគ្រោះម្នាក់ជនជាតិចិនមានឈ្មោះ ហាង វិន ស៊ូន ភេទប្រុស អាយុ ៣៦ឆ្នាំ ស្នាក់នៅខុនដូព្រីនផ្លាហ្សា នៅចំណុចកំណាត់ផ្លូវនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ត្រូវបានជនជាតិចិនម្នាក់តេទូរស័ព្ទប្រាប់ជនរងគ្រោះឱ្យទៅយកសំណាកធ្វើតេស្តរកវីរុសកូវីដ១៩ នៅក្រសួងសុខាភិបាល។ បន្តិចក្រោយមកស្រាប់តែមានជនសង្ស័យ ០២នាក់បើករថយន្ត ០១គ្រឿងម៉ាកស្តារិចពណ៌ខ្មៅ មិនចាំស្លាកលេខ មកទទួលជនរងគ្រោះកន្លែងស្នាក់នៅខុនដូព្រីនផ្លាហ្សា។

លុះជនរងគ្រោះឡើងជិះរថយន្ត ជនសង្ស័យក៏បានដឹកជនរងគ្រោះមកចូលខុនដូ ស្តាយឡាញ ម្តុំផ្សារឌុយមិច ហើយជួបបក្ខពួកជនសង្ស័យ ០២នាក់ទៀត នាំចូលជណ្តើរយន្តជាន់ទី៣០ ហើយនាំចូលបន្ទប់មួយ ក៏ចាប់ជនរងគ្រោះដាក់ខ្នោះដៃ នឹងខ្នោះជើង និងបានយកកាំភ្លើងខ្លី និងកូនកាំបិត ភ្ជង់គំរាមទារប្រាក់៣ម៉ឺនដុល្លារ។

ក្រុមជនសង្ស័យក្រោយពីទទួលបានប្រាក់នោះហើយ ក៏នាំខ្លួនជនរងគ្រោះទៅចោលនៅខុនដូមួយកន្លែងទៀតមិនស្គាល់ទីតាំង។ បន្ទាប់មកពួកគេជនសង្ស័យក៏បាននាំគ្នាគេចខ្លួនបាត់ រីឯជនរងគ្រោះក៏បានគេចខ្លួនរួច និងទៅដាក់ពាក្យប្តឹងនៅប៉ុស្តិ៍នគរបាលរដ្ឋបាលសង្កាត់ទន្លេបាសាក់ ខណ្ឌចំការមន។

ក្រោយពីទទួលបាននូវបណ្តឹងនោះហើយ កម្លាំងនគរបាលខណ្ឌចំការមន សហការជាមួយកម្លាំងនគរបាលនាយកដ្ឋានព្រហ្មទណ្ឌ ស្រាវជ្រាវហើយឈានទៅសហការជាមួយកម្លាំងនគរបាលខណ្ឌដូនពេញ បង្រ្កាបចាប់ខ្លួនជនសង្ស័យ១៤នាក់ស្ថិតនៅចំណុចខាងលើ។

ជនសង្ស័យនិងវត្ថុតាងកម្លាំងនគរបាលព្រហ្មទណ្ឌនៃអធិការដ្ឋាននគរបាលខណ្ឌចំការមនបានកសាងសំណុំរឿងបញ្ជូនខ្លួនទៅតុលាការចាត់ការតាមផ្លូវច្បាប់៕ អត្ថបទ៖ បាន ចក់