ភ្នំពេញ៖ ខណៈដែល ប៊ូយ៉ុង គ្រុប ដែលជាក្រុមហ៊ុនពហុធុរកិច្ចដ៏ធំរបស់សាធារណរដ្ឋកូរ៉ បានពង្រីកបន្ថែមលើការវិនិយោគសាងសង់សាលារៀននៅកម្ពុជា ឯកឧត្តមរដ្ឋមន្ត្រីក្រសួងអប់រំ យុវជន និងកីឡា បានលើកឡើងថា គឺជាសញ្ញាមួយដែលបង្ហាញថា ជាទីកន្លែងនៃការស្វែងយល់ត្រិះរិះ ក៏ដូចជាផ្លាស់ប្ដូរនូវបទពិសោធន៍ ចំណេះដឹង អរិយធម៌ និងវប្បធម៌ រវាងប្រទេសទាំងពីរឲ្យល្អប្រសើរថែមទៀត។

នៅក្នុងពិធីបើកការដ្ឋានសាងសង់សាលាចំណេះទូទៅ វ៉ូជុង កម្ពុជា កាលពីថ្ងៃទី២២ មិថុនា ឆ្នាំ២០២២នេះ នៅរាជធានីភ្នំពេញ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា សាលារៀនដែលកូរ៉េដាក់ទុនវិនិយោគឡើងនាពេលនេះ ក៏ជាសញ្ញាមួយដ៏ល្អ និងសបញ្ជាក់ឲ្យឃើញថា នឹងអាចបង្កើនទំនាក់ទំនងយ៉ាងស្អិតរមួតបន្ថែមទៀត រវាងប្រជាជនទាំងពីរ កម្ពុជា-កូរ៉េ។ ជាមួយគ្នានេះ ឯកឧត្តម បានសម្តែងការអរគុណដល់ភាគីកូរ៉េ ដែលបានបណ្ដាក់ទុនវិនិយោគបន្ថែមទៀត ក្រៅពីវិស័យសំណង់ និងអចលនទ្រព្យជាដើម ដែលនេះជាកតាលីករជម្រុញសេដ្ឋកិច្ចកម្ពុជាឲ្យ ឆ្ពោះទៅមុខមួយកម្រិតទៀត ដើម្បីឆ្លើយតបទៅនឹងសេចក្តីត្រូវការនៃការរីកចម្រើនសេដ្ឋកិច្ច និងសង្គមនៅកម្ពុជា។

លោកបណ្ឌិត លី ជុងគឿន អគ្គនាយក នៃក្រុមហ៊ុន ប៊ូយ៉ុង គ្រុប បាននិយាយថា ការសម្រេចបន្ថែមទុនវិនិយោគនៅកម្ពុជា ដោយសារកត្តាសុខសន្តិភាព និងភាពដឹកនាំដ៏ឆ្នើមរបស់ប្រមុខរាជរដ្ឋាភិបាលកម្ពុជា ជាពិសេសការគ្រប់គ្រងបានយ៉ាងល្អក្នុងស្ថានភាពនៃវិបត្តិកូវីដ១៩។

លោកឲ្យដឹងទៀតថា សាលាចំណេះទូទៅ វ៉ូជុង កម្ពុជានេះ ជាគម្រោងមួយក្នុងចំណោមគម្រោងទាំងអស់ ដែលមានទីតាំងស្ថិតនៅក្នុងបរិវេណទីក្រុង ប៊ូយ៉ុង ថោន ក្នុងគោលបំណងដើម្បីបំពេញរាល់តម្រូវការចាំបាច់ជូនដល់អតិថិជនដែលបានទិញលំនៅឋានក្នុងទីក្រុងនេះ ក្នុងនោះរួមមាន អគារពាណិជ្ជកម្ម មជ្ឈមណ្ឌលកីឡា និងនគម្រោងអគារផ្សេងៗជាច្រើនទៀត។

ក្រុមហ៊ុន ប៊ូយ៉ុង គ្រុប ជាក្រុមហ៊ុនយក្សមួយ មានមូលដ្ឋាននៅប្រទេសកូរ៉េខាងត្បូង ដែលបានវិនិយោគគម្រោងលំនៅឋាន មជ្ឈមណ្ឌលពាណិជ្ជកម្មជាច្រើននៅប្រទេសកូរ៉េខាងត្បូង និងបណ្តាប្រទេសជាច្រើនទៀត។ គម្រោងទីក្រុងដែលមានឈ្មោះថា ប៊ូយ៉ុង ថោន ត្រូវបានបើកដំណើរការដ្ឋានរបស់ខ្លួនកាលពីឆ្នាំ២០១៣មកម្ល៉េះ ដែលបានបណ្ដាក់ទុនប្រមាណ ១,១ពាន់លានដុល្លារ៕ អត្ថបទ៖ ឈិតបូរ៉ាវី