ភ្នំពេញ៖ ដើម្បីរួមចំណែកក្នុងការលើកកម្ពស់គុណភាពអប់រំនៅកម្ពុជា សាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជាហៅកាត់ ខេមតិច (CamTech) និងក្រុមហ៊ុនហួរវៃ ថេកណឡជី (ខេមបូឌា) បានចុះហត្ថលេខាជាមួយគ្នាដើម្បីពង្រីកហេដ្ឋារចនាសម្ព័ន្ធអប់រំបណ្តុះបណ្តាលជំនាញបច្ចេកទេសរបស់ខេមតិចឲ្យឈានឡើងទៅមួយកម្រិតទៀត។

ពិធីចុះអនុស្សរណៈនៃការយោគយល់គ្នានេះ បានប្រព្រឹត្តទៅកាលរសៀលថ្ងៃទី២៣ ខែមិថុនា ឆ្នាំ២០២២នេះ នៅសាកលវិទ្យាល័យ ខេមតិច ស្ថិតនៅខណ្ឌជ្រោយចង្វារ រាជធានីភ្នំពេញ រវាងអ្នកឧកញ៉ាបណ្ឌិត ពុង ឃាវសែ ស្ថាបនិក និងជាប្រធានក្រុមប្រឹក្សាភិបាល នៃសាកលវិទ្យាល័យខេមតិច និងលោក យ៉ៅ យូយ៉ា (Yao Yuya) អគ្គនាយក នៃតំបន់អាស៊ីប៉ាស៊ីហ្វិក នៃក្រុមហ៊ុន ហួរវៃ ថេកណឡជី (ខេមបូឌា) ក្រោមអធិបតីភាពរបស់ឯកឧត្តម ឆែម គាតរឹទ្ធី រដ្ឋមន្រ្តីប្រតិភូអមនាយករដ្ឋមន្រ្តី និងលោក ឆាង ជៀន(Chang Jian) អនុប្រធានបេសកម្ម នៃស្ថានទូតសាធារណៈរដ្ឋប្រជាមានិតចិនប្រចាំនៅកម្ពុជា។

លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យ ខេមតិច នៅក្រោយចប់ពិធី​ចុះហត្ថលេខា បានមានប្រសាសន៍ប្រាប់បណ្តាញអ្នកសារព័ត៌ថា ការចាប់ដៃគូជាមួយគ្នានេះ ធ្វើឡើង​ក្នុងទិសដៅពង្រឹងកិច្ចសហប្រតិបត្តិការ រវាងសាកលវិទ្យាល័យ និងវិស័យឯកជនលើការ​អភិវឌ្ឍបំណិន ការស្រាវជ្រាវ និងនវានុវត្តន៍ផ្នែកខាងវិទ្យាសាស្រ្ត និងបច្ចេកវិទ្យា និងដើម្បីពង្រីក​ហេដ្ឋា​រចនាសម្ព័ន្ធអប់រំរបស់សាលា ​ខេមតិច ឲ្យឈានឡើងទៅមួយកម្រិតទៀត ដែលអាច​ប្រកួតប្រជែង​ជាមួយសាកលវិទ្យាល័យធំៗ​នៅក្នុងសាកលលោក និងធានាឲ្យបាននូវគុណភាព​អប់រំមួយទទួលស្គាល់ជាអន្តរជាតិ។

លោកបានឲ្យដឹងទៀតថា នៅថ្ងៃខាងមុខ សាកលវិទ្យាល័យ ខេមតិច នឹងមានកិច្ចសហការជាមួយ​ក្រុមហ៊ុនដទៃទៀត ក៏ដូចជាជាមួយសាកលវិទ្យាល័យផ្សេងៗទៀតនៅប្រទេសចិន ដើម្បីឲ្យ​មានការ​ផ្លាស់ប្តូរនិស្សិត ផ្លាស់ប្តូរសាស្រ្តាចារ្យ ​និងផ្តល់អាហារូបករណ៍ដល់និស្សិតកម្ពុជា អាចបន្តការសិក្សា​នៅប្រទេសចិន ក៏ដូចជាទទួលត្រឡប់មកវិញនូវនិស្សិតចិន​ ដែលស្រលាញ់ ចូលចិត្តវប្បធម៌ និងចង់សិក្សានៅកម្ពុជាវិញតាមរយៈសាលា ខេមតិច។

សូមបញ្ជាក់ថា សាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជា​ ហៅកាត់ ខេមតិច ត្រូវបាន​ផ្តួចផ្តើមឡើងដើម្បីដោះស្រាយបញ្ហាកង្វះខាតធនធានមនុស្សដែលមានជំនាញ ជា​ពិសេសជំនាញបច្ចេកទេស ​និងបច្ចេកវិទ្យានៅកម្ពុជា ​ក៏ដូចជានៅក្នុងតំបន់៕អត្ថបទ៖ ឈិតបូរ៉ាវី