មីយ៉ាន់ម៉ា៖ យោធាសហភាពមីយ៉ាន់ម៉ានៅថ្ងៃសៅរ៍នេះ បានបង្ហាញកម្លាំងដ៏សំខាន់មួយ សម្រាប់ទិវាកងកម្លាំងប្រដាប់អាវុធប្រចាំឆ្នាំ ខណៈខ្លួនកំពុងព្យាយាមបញ្ឈប់ការតវ៉ា ដែលរីករាលដាលកាន់តែខ្លាំងប្រឆាំងនឹងរបបគ្រប់គ្រងរបស់ខ្លួន ជាច្រើនសប្ដាហ៍បន្ទាប់ពីការដណ្ដើមអំណាច។
ប្រទេសនេះស្ថិតក្នុងភាពច្របូកច្របល់ ចាប់តាំងពីក្រុមឧត្តមសេនីយ៍បានបណ្ដេញ និងឃុំឃាំងមេដឹកនាំស៊ីវិលលោកស្រី Aung San Suu Kyi កាលពីថ្ងៃទី១ ខែកុម្ភៈដែលបានបង្កឱ្យមានការបះបោរដ៏ធំទាមទារ ឱ្យមានលទ្ធិប្រជាធិបតេយ្យឡើងវិញ។ ក្រុមសកម្មជនប្រឆាំងរដ្ឋប្រហារបានអំពាវនាវ ឱ្យមានការធ្វើបាតុកម្មជាថ្មីនៅថ្ងៃសៅរ៍នេះ នៅពេលដែលយោធានឹងដង្ហែក្បួនកងទ័ព និងអាវុធនៅរដ្ឋធានីណៃពិដោ។
ការធ្វើបាតុកម្មជាច្រើននាពេលកន្លងទៅ គេបានឃើញកងទ័ព និងគ្រឿងសព្វាវុធរួមទាំងរថក្រោះយន្តហោះចម្បាំង និងមីស៊ីលជាច្រើនដង្ហែក្បួន នៅចំពោះមុខមេបញ្ជាការកងទ័ព ហើយបច្ចុប្បន្នជាមេបញ្ជាការយោធាគឺលោកឧត្តមសេនីយ៍ Min Aung Hlaing។ យោងតាមសមាគមជួយអ្នកទោសនយោបាយ ដែលមិនស្វែងរកប្រាក់ចំណេញបានឲ្យដឹងថា គិតត្រឹមថ្ងៃទី២៥ ខែមីនា មនុស្សសរុបចំនួន ៣២០នាក់បានស្លាប់ និងចាប់ខ្លួនជិត ៣០០០នាក់ចាប់តាំងពីរដ្ឋប្រហារ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
