ភ្នំពេញ៖ គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា រយៈពេល៥ខែ ដើមឆ្នាំ២០២២នេះ គ្រោះមហន្តរាយពីធម្មជាតិដែលបង្កឡើងដោយខ្យល់កន្ត្រាក់ និងរន្ទះបាញ់នៅប្រទេសកម្ពុជា មានការថយចុះពាក់កណ្តាល បើប្រៀបធៀបនឹងរយៈពេលដូចគ្នាកាលពីឆ្នាំ២០២១។

របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងទៀតថា ស្ថានភាព​អាកាសធាតុ​សម្រាប់៥ខែ ឆ្នាំ២០២២នេះ មានភាពល្អប្រសើរជាងឆ្នាំ២០២១ ពោលគឺដោយ​សារ​កម្ពុជា​ទទួលរងកម្រិតកម្ដៅខ្សោយពុំក្តៅខ្លាំង​ដូចឆ្នាំ២០២១ ​ហើយ​ភ្លៀងកក់ខែកើតមាន​ច្រើន​ក្នុងរដូវប្រាំង​ ដែលបានកាត់បន្ថយការប្រឈមនូវការកង្វះខាតទឹក​ប្រើប្រាស់ ​និងទឹកសម្រាប់​ការ​បង្កបង្កើនផល ព្រមទាំងពុំសូវទទួលរង​ឥទ្ធិពល​ពីព្យុះក្នុងតំបន់ទៀតផង។

របាយការណ៍ បន្តថា ករណីខ្យល់កន្ត្រាក់បានកើតឡើងចំនួន ៧៩លើក ​បណ្តាលឲ្យផ្ទះរលំ និង​ខូចខាតធ្ងន់ចំនួន ៥២៧ខ្នង ផ្ទះរបើកដំបូល ​១៧៧៧ខ្នង មនុស្សស្លាប់ ២នាក់ និងរបួស១៦នាក់។ ចំណែកករណីរន្ទះបាញ់ បានបណ្ដាលឱ្យស្លាប់ ២២នាក់ និង ១៧នាក់ទៀត រងរបួស ព្រមទាំង​បណ្ដាលឲ្យងាប់​សត្វគោ-ក្របីសរុប ៥៣ក្បាល។

ជារួមផលប៉ះពាល់ដោយខ្យល់កន្ត្រាក់ និងរន្ទះបាញ់ ក្នុងរយៈពេល ៥ខែ នៃឆ្នាំ២០២២ ធៀប​រយៈពេល​ដូចគ្នាឆ្នាំ២០២១ មានការថយចុះប្រមាណពាក់កណ្តាល ហើយគណៈកម្មាធិការជាតិ​គ្រប់គ្រងគ្រោះមហន្តរាយ បាននិងកំពុងបង្កើនការផ្សព្វផ្សាយចូលជ្រៅដល់មូលដ្ឋាន​អំពី​វិធានការការពារ​នៃគ្រោះមហន្តរាយនេះ។

របាយការណ៍បញ្ជាក់ថា ខ្យល់កន្ត្រាក់ និងរន្ទះបាញ់ តែងកើតមានរៀងរាល់ឆ្នាំ ទោះតិច ឬច្រើន។ ដូច្នេះ ត្រូវតែមានការប្រុងប្រយ័ត្នជាប់ជានិច្ច ពិសេសក្នុងរដូវវស្សានេះ។ ប្រការសំខាន់ គឺការ​ប៉ះពាល់​ដោយ​ជំនន់ទឹកភ្លៀង ​ដោយសារស្ថានភាព​អាកាសធាតុ ​មានអំណោយផល នាំឲ្យ​មានភ្លៀងធ្លាក់ច្រើន។

ទន្ទឹមគ្នានេះ នាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធានទី១គណៈកម្មាធិការជាតិគ្រប់គ្រង​គ្រោះមហន្តរាយ បានអំពាវនាវជូនដល់ប្រជាពលរដ្ឋ និងអាជ្ញាធរដែនដីគ្រប់លំដាប់ថ្នាក់ឱ្យមាន​ការ​ត្រៀម​លក្ខណៈ ​និងប្រុងប្រយ័ត្នក្នុងរដូវវស្សានេះ​ ដែលគ្រោះមហន្តរាយដោយធម្មជាតិអាច​នឹង​កើតមានជាយថាហេតុ៕