ភ្នំពេញ៖ ឯកឧត្តមទេសរដ្ឋមន្រ្តី គន់ គីម អនុប្រធានទី១ នៃគណៈកម្មាធិការជាតិគ្រប់គ្រង​គ្រោះមហន្តរាយ បានជំរុញទៅភាគីពាក់ព័ន្ធត្រូវធានាឲ្យបាននូវការផ្ដល់ស្បៀងអាហារ ការ​ផ្ដល់សេវាសុខាភិបាលជូនប្រជាពលរដ្ឋ ដែលអាចនឹងរងគ្រោះដោយបញ្ហាទឹកជំនន់ នៅ​ឆ្នាំ២០២២នេះ ។

ក្នុងកិច្ចប្រជុំបូកសរុបរបាយការណ៍ប្រចាំឆមាស (៦ខែ) ដើមឆ្នាំ២០២២ ឯកឧត្តម គន់ គីម បានមានប្រសាសន៍ា កម្ពុជាជាប្រទេសងាយរងគ្រោះ ដោយការប្រែប្រួលអាកាសធាតុ ពិសេស មុខសញ្ញាគ្រោះថា្នក់ទឹកជំនន់ ហើយគ្រោះមហន្តរាយទឹកជំនន់តែងតែជួបប្រទះញឹកញាប់ ធ្វើឱ្យ មានការខូចខាត បាត់បង់មានទំហំធំជាងបើប្រៀបទៅនឹងមុខសញ្ញាគ្រោះថ្នាក់ដទៃ ដែលកើតមាននៅក្នុងប្រទេស។

ឯកឧត្តម បានបន្តថា ស្ថានភាពគ្រោះមហន្តរាយទឹកជំនន់កន្លងមក គណៈកម្មាធិការជាតិគ្រប់គ្រង​គ្រោះមហន្តរាយ បានត្រៀមរៀបចំបច្ចុប្បន្នភាព​ ផែនការត្រៀមបម្រុងសម្រាប់ឆ្លើយតប សង្គ្រោះបន្ទាន់ គ្រោះមហន្តរាយ ដែលមានមុខសញ្ញាគ្រោះទឹកជំនន់ ខ្យល់ព្យុះ រន្ទះបាញ់ រាំងស្ងួន និងគ្រោះមហន្តរាយបង្កឡើងដោយបនុស្សផងដែរ ។

ឯកឧត្តមទេសរដ្ឋមន្ត្រី បានបន្ថែមថា គោលបំណងនៃផែនការ គឺការកំណត់ត្រៀមទុកជាស្រេចនូវ​យន្តការ និងធនធានរបស់ស្ថាប័ន មានទាំងកម្លាំងមនុស្ស សម្ភារៈ មធ្យោបាយគ្រប់ប្រភេទ ការផ្ដល់ជំនួយ​សង្គ្រោះបន្ទាន់។ល។ ឱ្យសមស្របទៅនឹងតម្រូវការ របស់ប្រជាជនរងគ្រោះដោយ​គ្រោះទឹកជំនន់ ពិសេសក្រុមងាយរងគ្រោះដូចជា ស្ត្រី កុមារ ចាស់ជរា ជនមានពិការភាព និង​អ្នកទីទ័លក្រ ទទួលបាននូវសេវាសុខភាព ទឹកស្អាត អនាម័យ ជម្រកស្នាក់នៅបណ្ដោះអាសន្ន ការអប់រំ ការការពារ និងស្បៀងអាហារ ។

ឯកឧត្តម គន់ គីម បានសង្កត់ធ្ងន់ថា ពលរដ្ឋរងគ្រោះដោយទឹកជំនន់ គ្មានជម្រកស្នាក់នៅ​ត្រូវ​ជម្លៀស​ទៅកាន់ទីទួលសុវត្ថិភាពបានទាន់ពេលវេលា និងមានសុវត្ថិភាព ត្រូវការពារសុវត្ថិភាព​ពី​ហានិភ័យនានា ដែលអាចកើតមានជាយថាហេតុ ។

ជាមួយនេះ ឯកឧត្តម បានប្រកាសទទួលនូវជំនួយនានា របស់អង្គការអន្តរជាតិ តំណាងបេសកកម្ម និងស្ថានទូតបរទេស ដែលមានទីតាំងនៅកម្ពុជា និងមាននិវេសនដ្ឋាននៅបរទេសអាច​ចូលរួម​ក្នុង​ប្រតិបត្តិការសង្គ្រោះបន្ទាន់ ​និងការឆ្លើយតបគ្រោះមហន្តរាយ ។

គួរបញ្ជាក់ផងដែរថា ផែនការត្រៀមបម្រុងសម្រាប់ឆ្លើយតបសង្គ្រោះបន្ទាន់​គ្រោះមហន្តរាយនេះ​គឺជាផែនការ ដែលបានធ្វើបច្ចុប្បន្នភាពជាលើកទី៣ ដើម្បីត្រៀមសម្រាប់ឆ្លើយតបសង្គ្រោះបន្ទាន់​ទឹកជំនន់ដែលអាចកើតមាននៅ ក្នុងឆ្នាំ២០២២ នេះដោយឈរលើការប្រកាសឲ្យដឹងមុនពីមុខ​សញ្ញាគ្រោះថ្នាក់​ដែលបានព្យាករណ៍ដោយសា្ថប័ន ​ជំនាញរបស់រាជរដ្ឋាភិបាលកម្ពុជា៕ អត្ថបទ បាន សុខរិទ្ធិ