កោះកុង៖ អត្រាកុមារកើតជំងឺគ្រុនឈាម និងជំងឺរាករុះ បានកើតមានច្រើនក្នុង១ថ្ងៃ ១០នាក់ ចូលពិនិត្យ និងសម្រាកព្យាបាលនៅក្នុងមន្ទីរពេទ្យបង្អែកខេត្តកោះកុង ប៉ុន្តែ ពុំមានកុមារណានាក់បាត់បង់ជីវិតនោះទេ។

​២ខែអំឡុងពេលរដូវវស្សានេះ មានកុមារជាច្រើននាក់ បានទទួលផលប៉ះពាល់ ព្រោះតែបញ្ហាជំងឺគ្រុនឈាម និងជំងឺរាករុះ ដោយម្តាយឪពុក និងអាណាព្យាបាល សម្រុកនាំចូលមន្ទីរពេទ្យដើម្បីពិនិត្យព្យាបាល។

លោកស្រីវេជ្ជបណ្ឌិត ឆែ ហ្សឺឌី ប្រធានផ្នែកអគារកុមារ នៃមន្ទីរពេទ្យបង្អែកខេត្តកោះកុង បានឱ្យដឹងថា អត្រាកុមារចូលសម្រាកព្យាបាលនៅមន្ទីរពេទ្យនៅពេលនេះ គឺកើនឡើងពី៥០ ទៅ៦០ភាគរយ បើធៀបនឹងឆ្នាំ២០២១។ តែទោះយ៉ាងណាក្តី ពុំមានកុមារណាមួយបានបាត់បង់ជីវិតនោះទេ ពោលគឺបានជាសះស្បើយវិលត្រឡប់ទៅផ្ទះដោយសុវត្ថិភាព។

អំឡុងពេលកុមារសម្រាកព្យាបាលជំងឺ ក្រុមគ្រូពេទ្យ ក៏បានអប់រំណែនាំផងដែរអំពីរបៀបធ្វើអនាម័យថែទាំសុខភាព ចៀសវាងបន្តកើតមានជំងឺគ្រុនឈាម ជំងឺរាករុះ និងជំងឺរលាកបំពង់ក ជាថ្មីម្តង ពេលត្រឡប់ទៅលំនៅឋានរបស់ខ្លួនវិញ។

ម្តាយឪពុក និងអាណាព្យាបាលកុមារ បាននិយាយថា ប៉ុន្មានថ្ងៃមកនេះ អាកាសធាតុហាក់ប្រែប្រួលច្រើនប ង្កឱ្យមានភ្លៀងផង ក្តៅផង ទើបអាចផ្តល់ឱកាសឱ្យមូសខ្លាពងកូន។ ចំពោះជំងឺរាករុះវិញ បណ្តាលមកពីការបរិភោគអាហារមិនស្អាតល្អជាដើម។

ប្រជាពលរដ្ឋ ម្តាយឪពុក និងអាណាព្យាបាល មានទំនុកចិត្តច្រើនទៅលើក្រមសីលធម៌វិជ្ជាជីវៈ សេវាពិនិត្យ និងព្យាបាលជំងឺដល់កូនៗរបស់ពួកគេ ពីសំណាក់ក្រុមគ្រូពេទ្យនៅក្នុងមន្ទីរពេទ្យបង្អែកខេត្តកោះកុង ថ្វីត្បិតច្រកទ្វារព្រំដែនបើកអាចឆ្លងដែនទៅរកព្យាបាលជំងឺនៅប្រទេសជិតខាងក៏ដោយ៕ អត្តបទ៖ ឈឹម មករា