​អ៊ុយ​ក្រែ​ន​៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ថ្លែង​ទៅកាន់​អ្នក​មក​ចូលរួមក្នុង​ពិធី​បុណ្យ​តន្ត្រី Glastonbury នៅ​ប្រទេស​អង់គ្លេស​កាលពី​ថ្ងៃ​សុក្រ​។ ថ្លែង​តាម​បណ្ដាញ​វីដេអូ​ទៅ​កាន់​អ្នក​បាន​មក​ជួបជុំ​នៅក្នុង​កម្មវិធី​តន្ត្រី​របស់​អង់គ្លេសលោក Zelenskyy បាន​ជំរុញ​ឲ្យ​មនុស្ស​ទាំងអស់ផ្សព្វផ្សាយ​ការពិត​ អំពី​ការវាយលុក​របស់​រុស្ស៊ី​លើ​អ៊ុយ​ក្រែ​ន​។​

​លោក​បាន​ថ្លែង​នៅក្នុង​សារ​មួយ​ថា យើង​នៅក្នុង​ប្រទេស​អ៊ុយ​ក្រែ​ន​ចង់​រស់នៅក្នុង​ជីវិត​ដូចដែល​យើងធ្លាប់មាន ហើយ​រីករាយ​នឹង​សេរីភាព និង​រដូវក្តៅ​ដ៏​អស្ចារ្យ​នេះ ប៉ុន្តែ​យើង​មិនអាច​ធ្វើដូច្នេះបាន​ទេ ព្រោះ​រឿង​អាក្រក់​បំផុត​បានកើត​ឡើង ប្រទេស​រុស្ស៊ីបាន​បំផ្លាញសន្តិភាព​របស់​យើង​។ ​លោក​និយាយថា​ មនុស្ស​កាន់តែច្រើន​ចូលរួម​ជាមួយ​យើង​ក្នុងការ​ការពារ​សេរីភាព និង​ការពិត ហើយមិនយូរ​នោះទេ​សង្គ្រាម​របស់​រុស្ស៊ី​លើ​អ៊ុយ​ក្រែ​ន​នឹង​បញ្ចប់​។ ​លោក Zelenskyy និយាយថា​ ប្រទេស​របស់លោក​បានទទួល​រួចមកហើយ ផលប្រយោជន៍​ច្រើនជាងត្រូវបាន​ផ្តល់​បេក្ខភាព​ជា​សមាជិកភាព​សហភាព​អឺរ៉ុប ហើយ​ប្រជាជន​គួ​តែមាន​មោទនភាព​ចំពោះជំហាន​រីកចម្រើន​របស់​ពួកគេ​។

លោក Zelenskyy និយាយថា ស្ថានភាព​បេក្ខភាព​មិន​ធ្លាក់​ពីលើ​មេឃនោះទេ ហើយ​អ៊ុយ​ក្រែ​ន​បានធ្វើ​អ្វីៗ​ជាច្រើនដើម្បី​ទទួលបាន​។ លោក​បន្ថែមថា ​កុំ​ទាន់​សប្បាយចិត្ត ព្រោះថាវា​ជាការ​ទះកំផ្លៀង​ទីក្រុង​មូ​ស្គូ ប៉ុន្តែ​ត្រូវមាន​មោទនភាព​ចំពោះ​ការ​ទះដៃ​សម្រាប់​អ៊ុយ​ក្រែ​ន​។​ ​រដ្ឋ​សមាជិក​សហភាព​អឺរ៉ុប​មិនបាន​ព្រមព្រៀង​ លើ​ការផ្តល់​សមាជិកភាពពេញលេញ​ដល់​ប្រទេស​អ៊ុយ​ក្រែ​ន​ដែល​ហែកហួរ​ដោយ​សង្គ្រាម​នោះទេ ទោះបីជា​សភា​អឺរ៉ុប​បាន​បោះឆ្នោត​លើស​លប់​កាលពី​ថ្ងៃព្រហស្បតិ៍ ​ដើម្បី​ផ្តល់​បេក្ខភាព​ដល់​ប្រទេស​នេះ​ក៏ដោយ៕

អត្ថបទ៖ ប៊ុនថន