ភ្នំពេញ៖ នៅឆ្នាំ២០២១-២០២២ អត្រានៃការសម្រាលកូនដោយឆ្មបជំនាញមានចំនួន៩៩% និងការសម្រាលកូននៅមូលដ្ឋានសុខាភិបាលមានចំនួន៩៧% ជាហេតុធ្វើឲ្យអត្រាមរណភាពមាតា ទារក បានថយចុះពី១៧០ នៅឆ្នាំ២០១៤ មកនៅ១៥៤ ក្នុងទារកកើតរស់ ១០០,០០០នាក់។

ការថ្លែងរបស់លោកជំទាវសាស្រ្តាចារ្យ តាន់ វួចឆេង រដ្ឋលេខាធិការក្រសួងសុខាភិបាល យ៉ាងដូច្នេះក្នុងសិក្ខាសាលាលើកទី២១ នៃសមាគមសម្ភព និងរោគស្រី្តវិទ្យាកម្ពុជា ក្រោមប្រធានបទ«លើកកម្ពស់សុខភាពមាតា និងទារក»នាព្រឹកថ្ងៃទី២៥ ខែមិថុនា ឆ្នាំ២០២២នេះ ដោយមានការចូលរួមពីសមាជិក សមាជិកា សមាគម អស់លោក លោកស្រី ជាវាគ្មិនមកពីកាណាដា អង់គ្លេស ថៃ តាមវីដេអូផងដែរ។

លោកជំទាវរដ្ឋលេខាធិការ​ បានបន្តទៀតថា គោលដៅរបស់សមាគម គឺដើម្បីលើកកម្ពស់​មនសិកា​ជាតិ និងអន្តរជាតិ ​ព្រមទាំងបង្កើនស្មារតីទទួលខុសត្រូវ ​លើកិច្ចសហប្រតិបតិ្តការ និងការជឿន​លឿន​នៃវិទ្យាសាស្រ្តតាមការចូលរួមចំណែកបំពេញតួនាទី ​និងមុខដំណែងក្នុងសង្គមជាតិ និង​អន្តរជាតិ ជំរុញ​ឲ្យមាន​សន្ទុះ​កាន់តែខ្លាំង​រាល់​សកម្មភាពបណ្តុះបណ្តាល និងស្រាវជ្រាវវិទ្យាសាស្ត្រ​តាមរយៈការចុះជួយពង្រឹងចំណេះដឹង ​និងចំណេះធ្វើ ​នៅនឹងកន្លែងធ្វើការងារ ក៏ដូចជាការជួបជុំគ្នា​ផ្នែកគរុកោសល្យ ​និងវិទ្យាសាស្រ្ត។

លោកជំទាវ សាស្រ្តាចារ្យ តាន់ វួចឆេង ​សង្ឃឹម​យ៉ាង​មុតមាំថា​ សមាគមសម្ភព និងរោគស្រី្តកម្ពុជា នឹង​ចូលរួមយ៉ាងសកម្មក្នុងការកាត់បន្ថយអត្រាមរណៈឲ្យខាងតែបាននូវអត្រាគ្រោះថ្នាក់ និង​ស្លាប់​របស់ម្តាយ និងទារក កុមារ នៅកម្ពុជា ដែលប្រឈមនឹងគ្រោះថ្នាក់នេះ។

បើតាមលោកសាស្រ្តាចារ្យ ប៉ិច សុធី ប្រធានរៀបចំទិវាសិក្ខាសាលាលើកទី២១ និងលោក​សាស្រ្តាចារ្យ គុំ កាណាស់ ជាប្រធានសមាគមសម្ភព និងរោគស្រី្តវិទ្យាកម្ពុជា បានលើកឡើង​ស្រដៀងគ្នាថា​ ទិវាសិក្ខាសាលានេះ នឹងផ្តល់ជារួមនូវចំណេះដឹង​ និងការពិភាក្សា ​និងការធ្វើ និងផ្តល់នូវបច្ចុប្បន្នភាព​ ដល់សមាជិក សមាជិកា ដែលជាគ្រូពេទ្យផ្នែកសម្ភព និងរោគស្រី្ត។

លោកសាស្រ្តាចារ្យ គុំ កាណាល់ បានបញ្ជាក់ទៀតថា ​សិក្ខាសាលារយៈពេលដ៏ខ្លីមួយថ្ងៃនេះ ពិតជា​ប្រយោជន៍ណាស់សម្រាប់សមាជិក សមាជិកា សមាគមក្នុងការក្រេបយកចំណេះដឹង​ជុំវិញ​ការលើក​កម្ពស់សុខភាពមាតា​ និងទារក ជាពិសេសត្រូវចេះដោះស្រាយឲ្យបានទាន់ពេលវេលា និង​ចេះដោះស្រាយនូវជំងឺរួមផ្សំដែលនឹងអាចកើតឡើងនៅពេលជាមួយគ្នា៕ អត្ថបទ រដ្ឋា